MƏDƏNİYYƏT
İspaniyanın “Flamеnko” qrupu Heydər Əliyev Mərkəzində “Karmen” şousunu təqdim edəcək VİDEO
Bakı, 6 may, AZƏRTAC
İyunun 13-də Heydər Əliyev Mərkəzində İspaniyanın “Flamenko” qrupu tamaşaçılara məşhur “Karmen” əsərini yeni quruluşda - caz, ərəb musiqisi elementləri, salsa və flamenko rəqsinin sintezi ilə təqdim edəcək.
AZƏRTAC xəbər verir ki, fransız yazıçı Prosper Merimenin və bəstəkar Corc Bizenin “Karmen” operası əsasında səhnələşdirilmiş şou Antonio Andrade və onun qrupu tərəfindən müasir flamenko ruhunda hazırlanıb.
İki saata yaxın davam edəcək flamenko gecəsində izləyicilərə möhtəşəm vokal ifa və rəqs performansları təqdim olunacaq.
Şouda Karmen obrazını Malaqa şəhərindən olan rəqqasə və xoreoqraf Ursula Moreno yaradır. Nadir ifa texnikası, təkrarolunmaz plastikası və yüksək aktyorluq qabiliyyətinə görə onu “müasir flamenkonun ümidi” adlandırırlar. Malaqada Musiqi və Rəqs Kral Akademiyasını bitirmiş, flamenko ustadlarından dərs almış rəqqasə karyerası ərzində bir sıra uğurlara imza atıb. O, 2010-cu ildə Ronda Milli Flamenko Müsabiqəsində ikinci yerə, 2011-ci ildə isə həmin yarışmada “Ən yaxşı Kanya rəqqasəsi” mükafatına layiq görülüb. Malaqada Flamenko Mədəniyyət Mərkəzinin təsisçisi və rəhbəri olan Ursula Moreno hazırda pedaqoji fəaliyyəti göstərir, eyni zamanda, Antonio Andradenin truppasında solo karyerasını davam etdirir.
Qrupun rəhbəri Antonio Andrade Sevilya yaxınlığında yerləşən və flamenko ənənələri güclü olan Pueble-de-Kasalya kəndində anadan olub. O, bu qədim incəsənət növünün təsiri altında böyüyüb və kiçik yaşlarından gitarada ifa etməyə başlayıb. Karyerası boyu tanınmış flamenko ustaları ilə birgə çalışan Antonio Andrade Avropa ölkələri, ABŞ və Yaponiyada verdiyi konsertlərlə tamaşaçıların rəğbətini qazanıb.
Müasir “Karmen” şousunun debütü 1998-ci ildə Berlində “Alman Opera Evi”ndə olub. Səhnə performansının Bakıdan sonra Danimarka və İsveçrədə təqdimatları nəzərdə tutulur.