Bakı, 12 iyul, AZƏRTAC

İsrail dövləti həmişə Azərbaycanın ərazi bütövlüyünü dəstəkləyib.

AZƏRTAC xəbər verir ki, İsrailin Bakıdakı səfiri Corc Dik bu fikri Şuşa şəhərinə səfəri zamanı söyləyib.

Şmuel Din Elmas İsraildə çıxan aparıcı ivritdilli “Israel HaYom” qəzetində dərc olunmuş məqaləsində yazır ki, İkinci Qarabağ müharibəsi dövründə Şuşada erməni işğalçı ordusuna qarşı xüsusi əməliyyat keçirilib.

Məqalə müəllifi qeyd edib ki, İsrailin Azərbaycandakı səfiri Corc Dik Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının xarici siyasət məsələləri şöbəsinin müdiri Hikmət Hacıyev başda olmaqla Azərbaycanda akkreditə edilmiş diplomatik korpusun nümayəndələrinin Şuşa şəhərinə səfərində iştirak edib. İkinci Qarabağ müharibəsi dövründə Azərbaycan Ordusunun əsgər və zabitləri əsl igidlik və şücaət nümayiş etdirərək bu şəhər üzərində Azərbaycanın nəzarətini bərpa ediblər.

Hikmət Hacıyevin fikrincə, bu səfərin məqsədi xarici diplomatları Şuşada aparılan bərpa işlərinin gedişi, bu şəhərin orijinal memarlıq siması və Azərbaycan xalqının mədəni irsi ilə tanış etməkdən ibarət idi.

Hikmət Hacıyev vurğulayıb: “Xarici diplomatlar cari vəziyyətlə yerində tanış olur, ermənilər tərəfindən 30 il ərzində törədilmiş vandalizmin, Azərbaycan xalqının maddi və mədəni irsinin oğurlanmasının və məhv edilməsinin nəticələrini görürlər. İndiyə qədər Füzuli, Zəngilan, Cəbrayıl, Qubadlı, Laçın və Ağdam rayonlarına müxtəlif səfərlər təşkil edilib”.

Səfir Corc Dik Azərbaycan İnformasiya Agentliyinə müsahibəsində deyib: “İsrail dövləti 30 il ərzində həmişə Azərbaycanın ərazi bütövlüyünü dəstəkləyib. Biz şadıq ki, Azərbaycan öz ərazi bütövlüyünü bərpa edib”.

2020-ci il sentyabrın 27-dən noyabrın 10-dək davam etmiş İkinci Qarabağ müharibəsi dövründə Azərbaycan öz əsgər və zabitlərinin şücaəti və mərdliyi sayəsində, İsrail silahlarının texniki dəstəyi və Türkiyə hökumətinin köməyi ilə BMT Təhlükəsizlik Şurasının qətnamələrinə müvafiq olaraq öz ərazi bütövlüyünü bərpa edib. 2019-cu ilin sonunda mən Azərbaycana səfər edəndə fikrimə də gəlməzdi ki, tezliklə Şuşada ola bilərəm. Şuşaya gəlməyimə, Azərbaycanın bu tarixi şəhərini ziyarət etməyimə görə çox xoşbəxtəm”.

İsrailli ekspert Arye Qut qeyd edib ki, Azərbaycan uğurlu geosiyasi və geoiqtisadi təşəbbüslər sayəsində regionun ən güclü geosiyasi özəyinə və liderinə çevrilib. Onun iştirakı və razılığı olmadan Cənubi Qafqazda – dünyanın bu strateji regionunda heç bir siyasi, iqtisadi, nəqliyyat məsələsi həll edilə bilməz.

İsrailli ekspert vurğulayır: “Azərbaycan ilə İsrail arasında diplomatik əlaqələrin 30 illik tarixi ərzində yəhudi dövləti ilə əhalisinin əksəriyyəti müsəlmanlar olan dövlət arasında strateji münasibətlərin zəruri və həyat qabiliyyətli olması sübut edilib. Bizim dost ölkələrimiz həqiqətən əsl etibarlı strateji tərəfdaşlar kimi qarşılıqlı fəaliyyət göstərir, biz tarix boyu heç vaxt bir-birimizə xəyanət etməmişik, həmişə bir-birimizin yanında olmuşuq”.

Arye Qut deyib: “Azərbaycan mədəniyyətinin incisi, bu gün isə Azərbaycanın mədəni paytaxtı olan Şuşa 30 il erməni işğalçılarının əlində qalıb. Əsrlər boyu Azərbaycan mədəniyyətinin beşiyi olmuş bu şəhər Azərbaycan xalqına Üzeyir Hacıbəyli, Rəşid Behbudov, Xurşidbanu Natəvan, Bülbül, Xan Şuşinski və Niyazi kimi parlaq nümayəndələri bəxş edib. Bu şəhər bütün azərbaycanlılar üçün xüsusi məna və əhəmiyyət kəsb edir. Şuşanın işğaldan azad edilməsi müharibədə döyüş nöqtəsi oldu. Bu yaşayış məntəqəsi Azərbaycan Silahlı Qüvvələrinin yoluna işıq saçan bir mayakdır. Bu şəhərin tarixi və mədəni əhəmiyyəti ayrıca söhbətin mövzusudur. Burada isə mən yalnız Şuşa şəhərinin işğaldan azad edilməsinin Azərbaycan əsgəri, zabiti və ya komandiri üçün onun əhəmiyyətindən danışıram.

Yerusəlim yəhudilər üçün nə deməkdirsə, Şuşa da azərbaycanlılar üçün o deməkdir. Bu alınmaz qalada doğulmuş, dağ çayları kimi saf insanlar minilliklər boyu Azərbaycanın gözəlliklərini artırıblar”.

Jurnalist Şmuel Din Elmas İsraildə çıxan nüfuzlu ivritdilli “Israel HaYom” qəzetində dərc olunmuş məqaləsinin sonunda yazır: “İsrail dövlətinin ilk ərəb-xristian səfiri olan Corc Dik Pakistan, Türkiyə, Qətər və Liviyadan olan həmkarları ilə birlikdə diplomatların səfərində iştirak edib. Onlar Şuşa şəhərindəki məsciddə birgə dua ediblər”.