SİYASƏT


İstanbulda Azərbaycan Diasporuna Dəstək Fondunun təqdimatı olub

İstanbul, 13 sentyabr, AZƏRTAC 

Sentyabrın 13-də İstanbulda Azərbaycan Diasporuna Dəstək Fondunun təqdimat mərasimi keçirilib.

AZƏRTAC xəbər verir ki, tədbirdə çıxış edən Diasporla İş üzrə Dövlət Komitəsi sədrinin birinci müavini Valeh Hacıyev ermənilərin davamlı olaraq türklərə qarşı törətdikləri ağır cinayətlərdən bəhs edib. O, tarixən Azərbaycanda və Türkiyədə baş verən hadisələrin dünya ictimaiyyətinə çatdırılması istiqamətində işlərin artırılmasının vacibliyini vurğulayıb.

Valeh Hacıyev Azərbaycanın dünya ölkələri ilə əlaqələri, bu münasibətlərin dinamik inkişafı, həyata keçirilən iqtisadi layihələrin əhəmiyyəti barədə danışıb. Diqqətə çatdırılıb ki, Azərbaycan xalqının ulu öndəri Heydər Əliyevin başlatdığı uğurlu siyasi yol bu gün Prezident İlham Əliyev tərəfindən davam etdirilir. Ölkə başçısının rəhbərliyi ilə sürətlə inkişaf edən Azərbaycan dövlət müstəqilliyini qorumaq üçün bütün imkanlara sahibdir.

Sonra fondun təqdimatı ilə bağlı videoçarx nümayiş etdirilib.

Azərbaycan Diasporuna Dəstək Fondu 2018-ci il iyulun 6-da Prezident İlham Əliyevin Fərmanı ilə Diasporla İş üzrə Dövlət Komitəsinin tabeliyində yaradılmış publik hüquqi şəxsdir. Fondun əsas məqsədi Azərbaycanda həyata keçirilən islahatların və əldə olunmuş nailiyyətlərin dünyaya çatdırılmasıdır. Həmçinin ölkəmizin mənafelərinin müdafiəsi, milli-mənəvi dəyərlərimizin qoruması, tanıdılması, lobbiçilik fəaliyyətinin güclənməsi, diaspor təşkilatlarımızın mütəşəkkilliyinin möhkəmlənməsi əsas məqsədlər sırasındadır.

Tədbirdə təşkilatın və Azərbaycanın İstanbuldakı Baş Konsulluğunun əməkdaşları, Türkiyədə yaşayan azərbaycanlılar, ictimaiyyət nümayəndələri, mədəniyyət xadimləri, media təmsilçiləri iştirak ediblər.

Günel Məlikova

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.