Bakı, 23 oktyabr, AZƏRTAC

İstanbul şəhərində İslam Əməkdaşlıq Təşkilatı Müstəqil Daimi İnsan Hüquqları Komissiyası və Türkiyə hökumətinin birgə təşkilatçılığı ilə “İslamofobiya: insan hüquqlarının pozulması və irqçiliyin müasir formada nümayiş etdirilməsi” mövzusunda beynəlxalq seminar keçirilib.

Ombudsman Aparatının mətbuat xidmətindən AZƏRTAC-a bildiriblər ki, BMT-nin İnsan Hüquqları üzrə Ali Komissarlığının nümayəndəsinin, BMT-nin dini etiqad azadlığı üzrə xüsusi məruzəçisinin, İslam Əməkdaşlıq Təşkilatı Müstəqil Daimi İnsan Hüquqları Komissiyasının üzvlərinin, Türkiyənin ədliyyə nazirinin, İslam Əməkdaşlıq Təşkilatına üzv ölkələrin dövlət və Milli İnsan Hüquqları İnstitutlarının təmsilçilərinin, insan hüquqları sahəsində tanınmış ekspertlərin, alimlərin qatıldığı tədbirdə Azərbaycan Respublikasının İnsan Hüquqları üzrə müvəkkilinin (ombudsmanın) Aparat rəhbəri Aydın Səfixanlı da iştirak edib.

Aydın Səfixanlı “İslamofobiya: insan hüquqlarının pozulması və irqçiliyin müasir formada nümayiş etdirilməsi” mövzusunda keçirilən plenar sessiyada çıxış edərək Azərbaycan Respublikasının çoxmillətli və çoxdinli bir ölkə olduğunu bildirib. O, Azərbaycanda tarixən heç vaxt milli və dini zəmində ayrı-seçkiliyin və qarşıdurmanın baş vermədiyini bildirib, qarşılıqlı etimada və hörmətə əsaslanan mütərəqqi milli-mədəni və dini münasibətlərin mövcud olduğunu diqqətə çatdırıb.

Aparat rəhbəri qeyd edib ki, fərdlərin irqindən, inancından, etnik mənsubiyyətindən və digər hallardan asılı olmayaraq öz hüquq və vəzifələrindən eyni dərəcədə faydalandığı mühitin yaradılması Azərbaycan dövlətinin əsas məqsədlərindəndir. Azərbaycan Respublikası Konstitusiyasına əsasən irqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən və digər ictimai birliklərə mənsubiyyətindən asılı olmayaraq, hər kəsin hüquq və azadlıqlarının bərabərliyinə təminat verilir. Azərbaycanda multikulturalizm və tolerantlıq həyat tərzinə çevrilib.

Ermənistan-Azərbaycan Dağlıq Qarabağ münaqişəsindən bəhs edən A.Səfixanlı qeyd edib ki, Ermənistanın işğalı nəticəsində Azərbaycan torpaqlarının 20 faizi işğal edilib, bir milyondan çox soydaşımız etnik təmizləmə siyasəti nəticəsində öz yurdlarından didərgin düşüb, qaçqın və məcburi köçkünə çevrilib.

Aparat rəhbəri çıxışında, həmçinin insan hüquqlarının kobud pozuntusu olan islamofobiya hallarının aradan qaldırılması istiqamətində bir sıra təkliflər səsləndirib. Həmin təkliflər beynəlxalq seminarın yekun Bəyannaməsində nəzərə alınıb.

Ombudsman Aparatının rəhbəri tədbirin ikinci günü Türkiyənin İnsan Hüquqları və Bərabərlik Qurumunun təşkilatçılığı ilə “İslamofobiya ilə mübarizədə milli insan hüquqları təsisatlarının rolu” mövzusunda təşkil olunmuş sessiyada çıxış edib. O, Azərbaycan Ombudsmanının insan hüquqlarının müdafiəsi, o cümlədən ayrı-seçkiliyə qarşı mübarizə sahəsində fəaliyyəti barədə geniş məlumat verib, birgə əməkdaşlıq istiqamətlərindən danışıb, tədbir iştirakçılarının çoxsaylı suallarını cavablandırıb.