Şərur, 8 iyul, AZƏRTAC

İyulun 5-dən 7-dək Şərur Olimpiya-İdman Kompleksinin foyesində təşkil olunan istedadlı qadınların əl işlərindən ibarət sərgi-satış uğurla başa çatıb. Sərgi-satışda muxtar respublikanın Şərur rayonu üzrə 83 istedadlı qadının 460 rəsm və əl işinin satışı təşkil olunub.

AZƏRTAC xəbər verir ki, Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin və Şərur Rayon İcra Hakimiyyətinin təşkilatçılığı ilə baş tutan tədbirdə sulu və yağlı boya ilə işlənən tablolarla yanaşı, milli geyimlər, toxuculuq və bir-birindən maraqlı dekorativ-tətbiqi sənət nümunələri maraqla qarşılanıb.

Tədbirdə Şərur Rayon İcra Hakimiyyətinin başçısı İbrahim Məmmədov çıxış edərək bildirib ki, muxtar respublikanın hər yerində olduğu kimi, Şərur rayonunda da qadınlar yüksək dövlət qayğısı ilə əhatə ediliblər. Təsadüfi deyil ki, rayonda yaşayan qadınlardan 1-i Naxçıvan Muxtar Respublikası Ali Məclisinə deputat, 89-u yerli özünüidarəetmə orqanlarına üzv, onlardan da 8-i bələdiyyə sədri seçilib, 1-i rayon icra hakimiyyəti başçısının müavini, 19-u rayonda fəaliyyət göstərən təhsil müəssisəsinin rəhbəri vəzifəsinə təyin edilib. Qadınların dövlət qulluğunda, hüquq mühafizə orqanlarında təmsilçiliyi genişlənib.

Tədbirdə Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək deyib ki, müxtəlif fəaliyyət sahələri ilə məşğul olan qadınlar kimi, xüsusi istedadları ilə seçilən, rəssamlıq, toxuculuq, el sənəti nümunələrini yaratmağı özünə fəaliyyət sahəsi seçən və asudə vaxtını bu işlərə sərf edən qadınlara da xüsusi diqqət göstərilir. Bu mənada, xalq sənətinin müxtəlif sahələri ilə məşğul olan sənətkarların əl işlərindən ibarət sərgilərin təşkil olunması məqsədilə müvafiq qurumların qarşılıqlı fəaliyyəti həyata keçirilir, qadınların, o cümlədən istedadlı qadınların məşğulluğu təmin edilir, rifah hallarının yüksəldilməsi üçün əl işlərinin satışı təşkil olunur.

Muxtar respublikada qadınlar üçün yaradılan şəraitdən minnətdarlıqla söz açan Gülnar Səfərova deyib ki, hazırda Şərur rayonunun Xanlıqlar kənd tam orta məktəbində təsviri incəsənət müəllimi işləyir. Asudə vaxtlarında əl işləri hazırlayır, onları müxtəlif sərgilərə çıxarır. Burada da təşkil olunan sərgi-satışda hazırladığı dekorativ iş – kətan üzərində muncuqla iş, müxtəlif güllər, bəzək əşyaları sərgilənir.

İstedadlı qadınlardan İlhamə Abbasova, Xəyalə Əliyarova, Pərvin Allahverdiyeva, Müşviqə Mehdiyeva və başqaları qadınlara göstərilən qayğıya görə minnətdarlıqlarını bildiriblər.