SİYASƏT


İtaliyada yaşayan soydaşlarımız Ermənistanın ölkəmizə qarşı təxribatları ilə bağlı aksiya keçiriblər

Bakı, 13 oktyabr, AZƏRTAC

İtaliyanın Milan şəhərində Ermənistanın işğalçı siyasətinə etiraz və müstəqil Azərbaycan dövlətinə dəstək məqsədilə aksiya keçirilib.

Diasporla İş üzrə Dövlət Komitəsindən AZƏRTAC-a bildiriblər ki, Azərbaycan-İtaliya Gənclər Assosiasiyasının təşkilatçılığı ilə baş tutan tədbirdə Milan şəhərində təhsil alan azərbaycanlı tələbələr iştirak ediblər. Azərbaycan bayrağının dalğalandırıldığı aksiyada “Qarabağ Azərbaycandır!”, “Ermənistana inanmayın!”, “Ermənistanın təcavüzünə son qoyulsun!”, “Gəncə üçün dua edək” şüarlarının yazıldığı plakatlar nümayiş etdirilib.

Tədbirdə çıxış edən Azərbaycan Mədəniyyət Assosiasiyasının sədri Mais Nuriyev işğalçı Ermənistanın ölkəmizə 27 sentyabr hücumundan, Azərbaycan Ordusunun buna cavab olaraq özünümüdafiə və ərazi bütövlüyü hüquqlarını həyata keçirdiyini bildirib. Faşist mahiyyətli dövlətin xalqımıza qarşı törətdiyi vəhşiliklərə, vandalizm aktlarına diqqəti cəlb edən soydaşımız Ermənistan tərəfinin Gəncəni bilərəkdən və xaincəsinə raket atəşinə tutmasını amansız terror aktı kimi qiymətləndirib.

Aksiya iştirakçıları dünya birliyini torpaqlarımızın işğaldan azad olunması, ərazi bütövlüyümüzün bərpa edilməsi ilə bağlı Azərbaycanın haqlı və ədalətli mövqeyini dəstəkləməyə çağırıblar.

Eyni zamanda, Azərbaycan həqiqətlərini İtaliya ictimaiyyətinə dolğun şəkildə çatdırmaq üçün İtaliya-Azərbaycan Birliyinin rəhbəri Fərid Abbasov və Roma şəhərində yaşayan soydaşımız Məryəm Mehdiyeva “Roma Capitole” radiosunun qonağı olublar. Verilişdə Ermənistanın sentyabrın 27-dən başlayaraq ölkəmizə qarşı hərbi təxribatlar törətdiyi və mülki əhalini raket atəşinə məruz qoyduğu nəzərə çatdırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.