İQTİSADİYYAT


İtaliyanın Baş naziri: Azərbaycandan təbii qaz tədarükü 60 faizə çatır

İtaliyanın Baş naziri: Azərbaycandan təbii qaz tədarükü 60 faizə çatır

Roma, 4 dekabr, AZƏRTAC

İtaliyanın Azərbaycandan təbii qaz tədarükü hazırda 60 faiz səviyyəsinə çatır.

AZƏRTAC xəbər verir ki, bunu İtaliyanın Baş nazir Ciorcia Meloni deyib.

Baş nazir İtaliyanın Xarici İşlər Nazirliyi və Beynəlxalq Siyasi Araşdırmalar İnstitutunun təşkilatçılığı ilə Romada keçirilən 8-ci MED Aralıq dənizi Dialoq Forumunda ölkəsinin enerji təhlükəsizliyi məsələsinə toxunub. İtaliyanın strateji tərəfdaşları sayəsində Rusiya təbii qazından asılılığını azaltdığını bildirən C.Meloni deyib ki, Türkiyə, Yunanıstan və Albaniyadan keçən Trans-Adriatik boru kəməri (TAP) vasitəsilə Azərbaycandan təbii qaz tədarükü hazırda 60 faizə çatır. Baş nazir Əlcəzair kimi Aralıq dənizi ölkələrinin də İtaliyanın enerji təhlükəsizliyində əsas pay sahibi olduqlarını bildirib. Qeyd edib ki, İtaliyanın təbii qaz idxalının təxminən 45 faizi Aralıq dənizi ölkələrindən təmin olunur.

O, təkcə təbii qazın deyil, həm də yeni davamlı, rahat və əlçatan enerji növlərinin inkişafı və mübadiləsinin Avropanın enerji təhlükəsizliyinə çox böyük töhfələr verəcəyini qeyd edib.

C.Meloni İtaliya hökumətinin ölkənin Aralıq dənizindəki rolunu gücləndirməkdə qətiyyətli olduğunu bildirib. Qeyd edilib ki, İtaliya coğrafi mövqeyi, infrastrukturu, əməkdaşlıq əlaqələri və şirkətlərinin töhfəsi ilə Aralıq dənizi ilə Avropa arasında enerji körpüsü rolunu oynaya bilər.

 
Nihad Budaqov

AZƏRTAC-ın xüsusi müxbiri

Roma

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.