Bakı, 16 mart, AZƏRTAC

Bu gün dünya yenə çox ziddiyyətli, qarmaqarışıq bir dönəm yaşayır. Bütün baş verənlər hər birimizdən, hər bir dövlətdən olduqca ehtiyatlı, hazırlıqlı, soyuqqanlı, balanslı, rasional, realist və praqmatik olmağı tələb edir. Xoşbəxtliyimizdəndir ki, Prezident, qalib Sərkərdə, Müzəffər Ali Baş Komandan İlham Əliyev də müdrik, uzaqgörən, praqmatik, təmkinli siyasət kursu yürütməklə ölkəmizi öz axarı ilə bu təbəddülatlı dünyamızda inkişafa, tərəqqiyə doğru aparır.

AZƏRTAC xəbər verir ki, bu sözləri Milli Məclisin Ailə, qadın və uşaq məsələləri komitəsinin sədr müavini, filologiya elmləri doktoru, professor Jalə Əliyeva söyləyib.

Deputat bildirib ki, martın 15-də Azərbaycan həm iqtisadi, həm də enerji təhlükəsizliyimizin təmin edilməsi istiqamətində daha bir uğura imza atdı. Belə ki, Birləşmiş Ərəb Əmirliklərinin (BƏƏ) “Masdar” şirkəti tərəfindən Azərbaycanda inşa ediləcək 230 MVt gücündə Qaradağ Günəş Elektrik Stansiyasının təməlqoyma mərasimi keçirildi. Prezident İlham Əliyevin iştirakı ilə keçirilən tədbirdə önəmli mesajlar verildi, gələcəyimizə, inkişafımıza yönələn mühüm çağırışlar edildi.

Çıxışında “Bu gün Qaradağ Günəş Elektrik Stansiyasının təməli qoyulur. Bu münasibətlə sizi və bütün Azərbaycan xalqını ürəkdən təbrik etmək istəyirəm. Doğrudan da çox önəmli bir hadisədir. 230 meqavat gücündə olan bu stansiya həm ölkəmizin enerjiyə artan tələbatını ödəyəcək, eyni zamanda, ixrac imkanlarımızı da genişləndirəcək. Mən çox şadam ki, bu böyük layihənin icraçısı dünyada tanınmış və bu sahədə böyük təcrübəsi olan “Masdar” şirkətidir. Qeyd etdiyim kimi, “Masdar” şirkətinin bu sahədə çox böyük təcrübəsi var, bir çox ölkələrdə uzun illər uğurla fəaliyyət göstərir” deyən dövlətimizin başçısı bildirdi ki, bu şirkətin Azərbaycana sərmayə qoyması çox təqdiredici haldır.

Çünki vurğulandığı kimi, bu, bir daha onu göstərir ki, Azərbaycan xarici sərmayə üçün çox cəlbedici, açıq ölkədir.

Deputat, həmçinin bildirib: “Bəli, Azərbaycanda çox gözəl investisiya iqlimi var, ölkəmiz xarici tərəfdaşlar qarşısında üzərinə düşən bütün öhdəliklərini yerinə yetirir. Böyük həcmdə xarici sərmayənin Azərbaycanda qeyri-neft sektoruna qoyulması əsas prioritetlərdən biridir”.

Dövlətimizin başçısı qeyd etdi ki, bu gün Azərbaycan xam neft, təbii qaz, neft məhsulları və elektrik enerjisini ixrac edən ölkədir. Bizdə elektrik enerjisinin ixracı nöqteyi-nəzərdən böyük potensial var. Dörd qonşu ölkəyə ixracı artıq təmin etmişik və əminik ki, gələcəkdə digər bazarlara da elektrik enerjisi ilə çıxacağıq. Bunu nəzərə alaraq, hər bir yeni stansiyanın inşa olunması bizim ixrac imkanlarımızı da artırır.

Deputat diqqətə çatdırıb ki, ümumiyyətlə, ölkəmizdə bərpaolunan enerji növlərinin həddindən artıq böyük potensialı var. Bu səbəbdən dünyanın aparıcı enerji şirkətləri Azərbaycanla bu sahədə əməkdaşlığa böyük maraq göstərirlər. Bu baxımdan, əminik ki, yaxın gələcəkdə yeni layihələrin icrasına start veriləcək.

Eyni zamanda, işğaldan azad edilmiş ərazilərdə böyük potensial mövcuddur. Aparılan dəqiq hesablamalarla məlum olub ki, günəş, külək enerji növlərinin istehsalı təxminən 9-10 min meqavata çata bilər.

Artıq ilkin addımlar da atılır, bp şirkəti ilə generasiya gücü 200 meqavatdan çox olan günəş elektrik stansiyasının inşası ilə bağlı danışıqlar gedir və ümid edirik ki, bu danışıqlar da uğurla nəticələnəcək.

Dövlətimizin başçısının da qeyd etdiyi kimi, xoşbəxtlikdən Azərbaycanda zəngin neft və qaz yataqları vardır və bu yataqların istismarı və işlənilməsi uğurla gedir.

Müasir infrastruktur var-həm nəqliyyat, həm kommunikasiya, həm də elektrik xətləri ixrac bazarları ilə bizi birləşdirir.

“Mən bütün sərmayə maraqlarını, biznes maraqlarını nəzərə alaraq onu da bildirməliyəm ki, əgər iki ölkə arasında yaxın dostluq əlaqələri olmasaydı, yəqin ki, bu layihəni də biz görməzdik” deyən dövlətimizin başçımızın sözlərinə görə, bütün bu amillərin vəhdəti çox gözəl bir imkan yaradır. Hesab edirik ki, biz bu imkandan böyük səmərə ilə istifadə edirik və edəcəyik.

“Bəli, yolumuz, hədəfimiz inkişafa, tərəqqiyə, intibaha doğrudur. Bu yoldan da bizi heç kim, heç bir güc döndərə, yayındıra bilməyib və bilməyəcək. Qələbələr, zəfərlər, uğurlar, nailiyyətlər bizimdir, bizimlədir və bizimlə olacaq!”, - deyə deputat qeyd edib.