Bakı, 11 noyabr, AZƏRTAC

Günün, Zəfərin, Qələbən, Dastanın mübarək, can-canım Azərbaycanım!

Sevin, gül, şadlan Azərbaycanım, qəlbi dağlı, Qələbəyə, Zəfərə təşnə olmuş Azərbaycan xalqım!

Sənin Günündür, Sənin Qələbəndir, Sənin Zəfərindir, sənin Dastanındır, Sənin Salnaməndir, sənin HAQQINdır!

Bunu Sən HAQQ edirdin, HAQQ etdiyini də almaq, əldə etmək Sənin HAQQINıydı…

HAQQını da dişinlə-dırnağınla, əzminlə, qeyrətinlə sökə-sökə aldın…

Milli Məclisin deputatı, professor Jalə Əliyeva tarixi Qələbəmizlə bağlı yazısını bu təbrik sözləri ilə başlayıb.

Deputat AZƏRTAC-ın müxbirinə bildirib ki, 32 illik qanlı münaqişəyə, kirli, məkrli çevrələrin dəstəyi, faşist, nasist, rasist, terrorist Ermənistanın əli ilə başladılmış, alovlandırılmış Qarabağ münaqişəsinə cəmi 44 gün ərzində son qoyuldu…

Son qoydun igid, qəhrəman Azərbaycan xalqım, müzəffər, qalib Ordum, Dövlət Babam, Xilaskar oğul, Qəhrəman Sərkərdəm İlham Heydər oğlu!

Cəmi 44 günlük qəhrəmanlıq dastanı ilə yağı, murdar düşmənin və onun qanlı havadarlarını kürəyi yerə vuruldu, yerə vurdun, təslim edildi, təslim, rəzil etdin!

Biz çox dedik, biz çox xəbərdar etdik, amma havalanmış, başı dumanlanmış düşmən az eşitdi, özünü eşitməzliyə, karlığa, korluğa vurdu və sonunda da layiq olduğu, haqq etdiyini, gərəkən cavabını aldı…

Özü də həm hərb meydanında, savaşda, döyüşdə, həm siyasət, diplomatiya meydanında…

Biz Kişi kimi döyüşdük, Nər kimi vuruşduq…

Düşmən kimi etmədik, dinc, mülki insanları hədəf almadıq…

Biz edə də, mülki, dinc insanları hədəf ala da bilməzdik…

Biz bu ruhun, bu dəyərlərin sahibi deyilik…

Bunu ancaq və ancaq xəstə, murdar, şərəfsiz düşmən, gözləri qandan doymayan insanlıq cəlladları-ermənilər edə bilərdi…

Bizim ölçüyə, müqayisəyəgəlməz fərqimiz də elə bunda idi, bundadır…

Sentyabrın 27-nə qədər, ikinci Qarabağ savaşına qədər bizi görməyən, görmək istəməyən bütün dünya, beynəlxalq aləm də qarşısında başqa Azərbaycan gördü və görməyə məcbur oldu…

Elə bir Azərbaycan, elə bir Zəfər dastanı gördü ki, özü də hələ şok, çaşqınlıq içindədir…

Bəli, cəmi 44 günün içində qəlbi sınıq xalqdan Qalib, Müzəffər Azərbaycan xalqına çevrildi, qanı, canı ilə dünya hərb tarixində yeni səhifə açdı, yeni Salnamə yazdı…

Dünya yenidən Azərbaycanı gördü və görməyə, etiraf etməyə məcbur oldu…

Bunların müəllifi, memarı isə Müzəffər Ali Baş Komandan oldu!

İlk növbədə və hər şeydən əvvəl ona minnətdar və borcluyuq.

Var olun, Ali Baş Komandanım, Qalib Sərkərdəm!

Bunlara görə, Ali Baş Komandanımızın rəşadətli Azərbaycan Ordusuna, Azərbaycan əsgərinə borcluyuq.

Var olun, haqqınız heç zaman ödənilməz və ölçüyəgəlməz Azərbaycan əsgəri!

Bunlara görə, Şəhidlərimizə borcluyuq, qarşılarında Azərbaycan var olduqca, baş əyirik!

Baş tacı, and yerimizsiniz!

Bəli, noyabrın 10-da Azərbaycan, Rusiya prezidentlərinin və Ermənistan baş nazirinin imzaladıqları birgə bəyanatla 32 illik münaqişəyə son qoyuldu, düşmən sülhə məcbur etmə ilə sülhə məcbur və təslim edildi, 44 günlük İkinci Vətən Müharibəsi Qələbəmizlə başa çatdı!

Ali Baş Komandanın Azərbaycan xalqına tarixi Qələbə müraciətində də deyildiyi kimi, bu bəyanat bizim şanlı qələbəmizdir.

“Şadam ki, bu gün bu müjdəni Azərbaycan xalqına verirəm. Hesab edirəm ki, bu bəyanatın imzalanmasının səbəblərindən biri də dünən qeyd etdiyimiz parlaq qələbəmizdir, tarixi qələbəmizdir, Şuşanın işğaldan azad edilməsidir, Şuşa Qarabağın tacıdır! Şuşanın azad edilməsi həm böyük siyasi, həm böyük strateji, eyni zamanda, çox böyük mənəvi məna daşıyır. Biz Şuşaya qayıtdıq, biz Şuşanı qaytardıq, biz Şuşada yaşayacağıq və işğaldan azad edilmiş digər bütün torpaqlarda həyat qaynayacaq”, - deyən Müzəffər Ali Baş Komandan bildirdi ki, insanlar o torpaqlara qayıdacaq, orada yaşayacaq, insanlarımızın 30 illik həsrətinə son qoyulur və qoyulacaq.

Bəli, biz qayıdırıq, Azərbaycan qayıdır!

Bəli, Azərbaycan öz ərazi bütövlüyünü bərpa edir.

Bəli, xoşbəxtik ki, biz öz Vətənimizə, doğma Qarabağımıza qayıdırıq, Qarabağımızın tacı olan Şuşaya qayıdırıq və bu torpaqlarda əbədi yaşayacağıq!

Bundan sonra heç kim bizi o torpaqlardan tərpədə bilməz!

Bəli, bəli, bəli!

Bizim Qələbəmiz, bizim Zəfərimiz, bizim Haqqımızdır!

Cəmi 4 günə Kəlbəcərimizə, cəmi 9 günə Ağdamımıza, cəmi 20 günə laçın vüqarlı Laçınımıza, Qazaxımızın illərdir işğal altında olan kəndlərinə də qayıdacağıq.

Füzulimizdə, Cəbrayılımızda, Zəngilanımızda, Qubadlımızda, Şuşamızda, Xocalımızın, Xocavəndimizin, Tərtərimizin, Ağdərəmizin kənd və qəsəbələrində olduğu kimi, Kəlbəcərimizdə, Ağdamımızda, Laçınımızda da üçrəngli Qələbə, Zəfər bayrağını asacağıq, dalğalandıracağıq!

Bizik bu torpaqların yiyəsi, bizik bu torpaqların qanuni, əzəli-əbədi sahibləri

Bizim olan bizimdir, bizim olanı biz qazandıq, bizim olan bizim də olacaq!

9 bəndlik bəyanat, orada əksini tapanlar bizim Qələbəmizdir, Qələbəmizin etirafıdır.

Heç kim də heç nədən rahatsız olmasın, əsassız fikirlərə, xəyallara qapılmasın, Qələbəmizin dadını çıxarsın.

Diktə edən də bizik, diktə edən də biz olduq, diktə edən də biz olacağıq.

Qarabağ Azərbaycandır və nida işarəsi.