SİYASƏT
Jalə Əliyeva: Füzuli aeroportundan dünyaya mesajlar verdik
Bakı, 28 oktyabr, AZƏRTAC
2021-ci il oktyabrın 26-sı Azərbaycanın və Türkiyənin, türk dünyasının tarixinə qızıl hərflərlə yazılacaq yeni bir tarix, yeni bir zəfər oldu. Həmin gün yaşanan sevincimizə, zəfərimizə yenə dostlarımız sevindi, düşmənlərimiz kor oldu. Həmin gün Füzuli Beynəlxalq Hava Limanının açılışı, nəinki Azərbaycan, bütövlükdə region üçün böyük əhəmiyyət daşıyacaq, gücə güc, inkişafa inkişaf qatacaq Zəngəzur dəhlizinin təməlinin qoyulması kimi tarixi hadisələr yaşandı. Özü də hər zaman yanımızda olan qardaş Türkiyənin Prezidenti Rəcən Tayyib Ərdoğanın iştirakı ilə.
Torpaqlarımızın işğalına son qoyulmasından, tarixi Zəfərimizin qazanılmasından sonra Prezident Rəcəb Tayyib Ərdoğanın işğaldan azad olunmuş torpaqlarımıza ikinci gəlişi dünyaya bir mesaj, həm də birlik, bərabərlik, sarsılmazlıq və həmrəylik nümayişi oldu.
Bu fikirləri AZƏRTAC-a açıqlamasında, Milli Məclisin Ailə, qadın və uşaq məsələləri komitəsinin sədr müavini, filologiya elmləri doktoru, professor Jalə Əliyeva söyləyib.
Deputat deyib: “Dünya bir daha gördü və eşitdi ki, Azərbaycanla Türkiyə həmrəydir, Azərbaycan-Türkiyə dostluq və qardaşlığı sarsılmazdır, əbədidir. Azərbaycanla Türkiyə iki dövlət, bir millətdir. Azərbaycanın sevinci Türkiyənin sevinci, kədəri isə kədəridir və əksinə. Artıq kədər tarixlərinə də birlikdə son qoyulur, sevincli anlar, sevinc tarixləri birə yazılır və yaşanır”.
“Sizin səfərinizin çox böyük önəmi var. Siz işğaldan azad edilmiş torpaqlara ikinci dəfədir ki, səfər edirsiniz. Dörd ay bundan əvvəl Sizinlə bərabər Şuşa şəhərində olmuşuq, bu gün isə Füzulidə və Zəngilandayıq. Şuşa şəhərində imzalanan Şuşa Bəyannaməsi tarixi sənəddir. Bu Bəyannamə bizim əlaqələrimizi rəsmən müttəfiqlik səviyyəsinə qaldırmışdır”, - deyən Müzəffər Ali Baş Komandanımız İlham Əliyevin bəyan etdiyi kimi, Füzuli Beynəlxalq Hava Limanının açılışında birlikdə iştirak bir daha bizim birliyimizi göstərir, gücümüzü nümayiş etdirir. Bu, Türkiyə ilə Azərbaycanın iki qardaş ölkə kimi hər zaman bir-birinin yanında olduğunun növbəti isbatıdır. Füzuli Beynəlxalq Hava Limanının inşasının cəmi səkkiz ay davam etdi. Bu hava limanının inşasında Azərbaycan və Türkiyə şirkətləri iştirak etdilər. Yəni, bu, bizim birgə uğurumuzdur.
Eyni zamanda, Zəngilan rayonunda birinci özəl sərmayə layihəsinin təməli qoyuldu ki, bu layihə də Türkiyə və Azərbaycanın birgə layihəsidir. Yəni, bu, bir daha onu göstərir ki, bütün işlərdə, o cümlədən işğaldan azad edilmiş torpaqlarda gedən quruculuq, bərpa işlərində də biz çiyin-çiyinə bir yerdə irəliləyirik.
“Bəli, Prezident İlham Əliyevin vurğuladığı kimi, Zəngilanın Ağalı kəndindəki bu rəsmi mərasim tarixdə qalacaq. Adətən rəsmi mərasimlər paytaxtlarda keçirilir. Ancaq bu rəsmi mərasimlər bölgədə keçiririk. Həm Şuşada, həm də bu gün Zəngilanda rəsmi mərasimlərin keçirilməsi, Türkiyə və Azərbaycanın Dövlət himnlərinin səslənməsi, atılan birgə addımlar tarixdə əbədi qalacaq. Ölkələrimiz bu tarixi birlikdə yazır, - deyə J.Əliyeva diqqətə çatdırıb.
Deputat deyib ki, həmçinin “Biz İkinci Qarabağ savaşının birinci ildönümünü yaşayırıq. Dünən Qubadlı şəhərinin azad olunmasının birinci ildönümünü qeyd edirdik. İki həftə bundan sonra Şuşanın azad olunmasını qeyd edəcəyik, böyük Zəfər bayramı kimi qeyd edəcəyik”, - söyləyən Ali Baş Komandanımız onu da qeyd etdi ki, İkinci Qarabağ savaşının ilk saatlarından son dəqiqələrinə qədər Türkiyə Azərbaycanın yanında oldu. Türkiyə Prezidenti Rəcəb Tayyib Ərdoğan müharibənin elə ilk saatlarında Azərbaycana dəstək göstərdi, bütün dünyaya bəyan etdi ki, Azərbaycan tək deyil, Türkiyə Azərbaycanın yanındadır. Bu, bizə çox böyük siyasi və mənəvi dəstək, əlavə güc verdi.
Eyni zamanda, dövlətimizin başçısı “Əziz qardaşım, bu gün Azərbaycan xalqı haqlı olaraq Sizə öz təşəkkürünü bildirir. Bilirsiniz ki, Azərbaycanda hər kəs Sizi sevir, Sizə böyük hörmətlə yanaşır. Siz bizim Zəfərimiz üçün çox böyük işlər görmüsünüz və bu gün artıq quruculuq dövründə, bərpa dövründə yenə də bizimlə bərabərsiniz” deyərək bəyan etdi ki, bu, əsl qardaşlıq nümunəsidir, əsl dostluq nümunəsidir. Bu, həm Azərbaycan xalqına, həm Türkiyə xalqına, həm də bütün dünyaya bir mesajdır ki, biz bir yerdəyik, bizim birliyimiz sarsılmazdır və əbədidir.
Prezident Ərdoğan isə öz növbəsində bəyan etdi ki, növbəti səfər zamanı Azərbaycanın işğaldan azad edilən bölgələrinin qısa müddət ərzində həqiqətən necə dirçəldiyi, necə sürətlə inkişaf etdiyi açıq-aydın göründü. “Bu, hər igidin, hər siyasətçinin işi deyil. Bu qədər qısa müddətdə bu investisiyaları yatırmaq, bu işləri həyata keçirmək, inanıram ki, doğma yurdundan ayrılmağa məcbur qalmış azərbaycanlı qardaşlarım üçün buradan bir müjdə vermək imkanı yaradır. Çünki azərbaycanlı qardaşlarım ayrıldıqları torpaqlara, inanıram ki, ən qısa vaxtda son dərəcə gözəl şəkildə inşa edilən, canlandırılan bu yerlərə qayıtmaq imkanı əldə edəcəklər. Burada qarşımızdakı binaya, sol tərəfimizdəki binalara baxırıq. Bu binalar orijinal, tarixi üslubda son dərəcə gözəl bir şəkildə inşa edilir”, - deyən Türkiyə Prezidenti bildirdi ki, Füzulini bir tərəfdən Şuşa, digər tərəfdən cənub sərhədi boyunca Ağbənd, gələcəkdə isə Naxçıvan ilə birləşdirəcək yolların inşası bütövlükdə bölgədə çoxtərəfli daşımaların əsasını təşkil edəcək.
Bütövlükdə görülən işlər həm Azərbaycan, həm də regionumuz üçün qürurverici və ümidvericidir.
Prezident Rəcəb Tayyib Ərdoğan, eyni zamanda, Ermənistana mesajlar da verdi. Dedi ki, qarşı tərəf Azərbaycan ilə problemlərini həll etmək istiqamətində səmimi bir iradə göstərməlidir. Əgər Azərbaycan ilə bağlı səmimi iradə ortaya qoyarsa, Türkiyənin Ermənistan ilə əlaqələrinin də normallaşması üçün bir maneə qalmayacaq. Bütün bölgə üçün birlikdə qurulacaq firavan gələcəyi kiçik hesablara və daxili siyasətə qurban vermək vaxt itkisi mənasına gələcək. Dünyanın bu gözəl bölgəsində sülh içində yaşanacaq parlaq bir gələcək, əlbəttə ki, mümkündür. Bəli, biz yenə birlikdə öz həmrəyliyimizi, sarsılmazlığımızı nümayiş etdirdik, biz yenə birlikdə öz mesajımızı verdik. Söz, addım, seçim isə artıq qarşı tərəfindir. Hansı addım atılacaqsa, anında da ona müvafiq adekvat cavabı, qarşılığı olacaq.
J.Əliyeva, həmçinin vurğulayıb: “Bəli, biz kimsəyə, heç nəyə fikir vermədən birik, bərabərik, birgə Qələbə və Zəfərlərə imza atırıq, bundan sonra da bir olacaq, birlikdə yeni Qələbə və Zəfərlərə imza atacağıq.
Birliyimiz, Qələbə və Zəfərlərimiz mübarək olsun!”.