CƏMİYYƏT
Jalə Əliyeva: Qarabağ Dirçəliş Fondunun yaradılması işğaldan azad edilmiş ərazilərimizdə həyatın bərpası baxımından önəmli addımdır
Bakı, 5 yanvar, AZƏRTAC
Bizi 28 illik işğaldan azad olunmuş Qarabağımıza, ona bitişik tarixi yurd yerlərimizə daha da yaxınlaşdıran, bizi bir daha elliklə qarabağlı, vətənli edən daha bir önəmli addım atıldı. Ötən gün Prezident, Müzəffər Ali Baş Komandan İlham Əliyev “Qarabağ Dirçəliş Fondu” publik hüquqi şəxsin yaradılması haqqında Fərman imzaladı. Ardınca dövlətimizin başçısı “Qarabağ Dirçəliş Fondunun Müşahidə Şurasının tərkibinin təsdiq edilməsi haqqında” Sərəncam imzaladı. Tərkibində dövlət və hökumət rəsmilərinin, tanınmış ziyalıların, korifey sənətçilərin yer aldığı bu Fond işğaldan azad edilmiş ərazilərdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsi məqsədilə təşkil olunur ki, bunun da önəmini uzun-uzadı anlatmağa yəqin ki, ehtiyac qalmır. Elə adından da məlum olur ki, bu Fond nə üçün, hansı məqsədlə təşkil olunur.
Bu fikirləri AZƏRTAC-a Milli Məclisin ailə, qadın və uşaq məsələləri komitəsinin sədr müavini Jalə Əliyeva bildirib.
Jalə Əliyeva deyib ki, 44 günlük Vətən müharibəsi, İkinci Qarabağ savaşı ilə 32 illik qanlı münaqişəyə son qoyduq, Ali Baş Komandanın rəhbərliyi və “vur” əmri ilə İgid Azərbaycan əsgəri öz “dəmir yumruğu”nu yağı düşmənin başına endirdi, onu məğlubiyyətə uğratdı, əzdi, məhv etdi, diz çökdürdü. Ötən əsrin 90-cı illərinin əvvəllərində uca zirvələrində bəlkə də cəmi bir və ya iki il dalğalandırılmış üçrəngli müqəddəs bayrağımız yenidən Şuşamızda, Laçınımızda, Kəlbəcərimizdə, Ağdamımızda, Füzulimizdə, Zəngilanımızda, Hadrutumuzda, Qubadlımızda, Cəbrayılımızda, yaralı Xocalımızın 9 kəndində, Suqovuşanımızda qürurla dalğalandırıldı. Birdəfəlik Qələbə bayrağını asdıq, ucaltdıq Vətən torpaqlarımızda. Bir kərə yüksələn bayrağın bir daha enməyəcəyini sübut etdik. Enməyəcək, enməyə də imkan verməyəcəyik. Bizim olanı, bizim haqqımız olanı daha heç kimə “güzəştə” getməyəcəyik!
Bəli, qalib ölkə, qalib xalq, qalib dövlət olaraq, bizi qarşıda növbəti yeni üfüqlər, yeni mərhələ, yeni proses gözləyir. Bu, işğaldan azad olunmuş Qarabağımızın bərpası, yenidən dirçəldilməsi, yenidən əvvəlki gözəlliyinə qaytarılmasıdır. Bu, uzun, çətin, şərəfli bir proses, bir mərhələdir.
Bu məsələdə də birgəliyimiz, həmrəyliyimiz, bir məqsədə yönəlməyimiz önəmlidir. Hamımızın fikri-zikri, amalı yalnız və yalnız bu olmalıdır: işğaldan azad olunmuş ərazilərimizin tezliklə bərpası, canlandırılması, ayağa qaldırılması və məcburi köçkünlərimizin yenidən ata-baba yurdlarına köçürülməsi, qaytarılması... 32 illik qanlı münaqişəni 44 günə başa vurduğumuz, birlikdə çözdüyümüz, birlikdə bacardığımız kimi, bunu da çözəcəyik, bunu da həll edəcəyik, bunu da bacaracağıq...
Heç təsadüfi deyil ki, cəmi bir neçə gün öncə, ötən ilin son günlərində hərtərəfli müzakirələrdən keçirib qəbul etdiyimiz qələbə büdcəsində də Qarabağımızın bərpası üçün nə az-nə çox, düz 2,2 milyard manatlıq vəsait nəzərdə tutulub. Bunun özü bərpa, dirçəliş, qayıdış istiqamətində önəmli addımdır. Bu gün imzalanan mühüm sənədlər də bu yolda növbəti qətiyyətli, vacib addımlardır, Qarabağımıza bir daha sahiblənməyimizdir.
Ali Baş Komandanımızın da dediyi kimi, bizi böyük işlər gözləyir, ölkəmiz üçün yeni dövr başlayır, quruculuq dövrü, inkişaf dövrü, torpaqlarımızın bərpası günləri bizi gözləyir. Bu dövr şərəfli dövr olacaq. Baxmayaraq ki, düşmən işğal etdiyi və artıq azad olunmuş torpaqlarda hər şeyi dağıdıb, biz bütün şəhərlərimizi bərpa edəcəyik, kəndlərimizi bərpa edəcəyik, Qarabağ bölgəsində cənnət yaradacağıq. Bizim xalqımız buna layiqdir. Bizim xalqımıza qələbə yaraşır və qələbə həmişə bizimlə olacaq!