İDMAN
Jurnalistlər arasında Milli Mətbuat Gününə həsr edilmiş şahmat yarışının açılış mərasimi olub VİDEO
Bakı, 4 iyul, AZƏRTAC
Azərbaycan Şahmat Federasiyasının (AŞF) təşkilatçılığı ilə 22 İyul - Milli Mətbuat Gününə həsr olunan jurnalistlər arasında şahmat turnirinin açılış mərasimi keçirilib.
AZƏRTAC xəbər verir ki, tədbirdə gənclər və idman naziri Fərid Qayıbov, Medianın İnkişafı Agentliyinin (MEDİA) icraçı direktoru Əhməd İsmayılov, AŞF-in I vitse-prezidenti Faiq Həsənov və Milli Məclisin deputatı Bəhruz Məhərrəmov iştirak ediblər.
Azərbaycan Respublikasının Dövlət Himni səsləndirildikdən sonra Vətən müharibəsində dünyasını dəyişən şəhidlərimiz, o cümlədən son illərdə vəfat edən jurnalistlərin xatirəsi bir dəqiqəlik sükutla yad edilib.
Açılış mərasimində çıxış edən gənclər və idman naziri Fərid Qayıbov ölkəmizdə şahmatın inkişafından, eləcə də şahmatçılarımızın beynəlxalq səviyyələrdə əldə etdiyi uğurları xüsusilə vurğulayıb, yarışda iştirak edən media nümayəndələrinə uğurlar arzulayıb: "Bizim müxtəlif idman növlərində və şahmatda nailiyyətlərimiz var. Azərbaycan Şahmat Federasiyası digər federasiyalar kimi çox fəal işləyir. Belə yarışların keçirilməsini hər zaman dəstəkləmişik. Jurnalistləri qarşıdan gələn Mətbuat Günü münasibətilə təbrik edirəm. Bütün tərəfdaşlara və təşkilatçılara minnətdaram, iştirakçılara uğurlar arzulayıram”, - deyə nazir bildirib.
AŞF-in birinci vitse-prezidenti Faiq Həsənov qeyd edib ki, respublikada şahmatın inkişafı ümummilli lider Heydər Əliyevin adı ilə sıx bağlıdır. Məhz Ulu Öndərin dəstəyi və təşəbbüsü ilə paytaxtda və regionlarda çoxsaylı şahmat məktəbləri açılıb, müasir avadanlıq və kompüterlərlə təchiz edilib.
F.Həsənov diqqətə çatdırıb ki, dövlətimizin başçısı İlham Əliyev tərəfindən respublikada şahmata göstərilən diqqət və qayğı nəticəsində şahmatçılarımız dünya səviyyəsində böyük nailiyyətlər qazanırlar.
Federasiya rəsmisi jurnalistlər arasında yarışın maraqlı mübarizə şəraitində keçəcəyini bildirib: “Turnirin sistemi dəyişib, indi daha maraqlı olacaq. Hər zaman olduğu kimi güclülər yenə qalib gələcək, amma bir az çətin olacaq. Tədbirimiz ölkədə şahmata böyük diqqətin ayrıldığını bir daha nümayiş etdirir və təsadüfi deyil ki, Azərbaycan dünyada şahmat ölkəsi kimi tanınır”.
Medianın İnkişafı Agentliyinin icraçı direktoru Əhməd İsmayılov da tədbirin önəmli olduğunu vurğulayıb: "İdman saytları MEDİA-nın müsabiqələrində iştirak edirlər və daim fəaldırlar. Gələcəkdə idman jurnalistikasında peşəkarlığın artması istiqamətində işlər görüləcək. Mən də şahmatı sevirəm. Uşaq vaxtından bu idman növü ilə məşğul olmuşam. Jurnalistlərin belə turnirə müraciət etməsi bizi sevindirir. Bundan başqa, turnirin sonunda qaliblərlə qeyri-rəsmi şahmat turniri də təşkil edə və onlarla oynaya bilərik".
Milli Məclisin deputatı Bəhruz Məhərrəmov İkinci Qarabağ müharibəsində jurnalistlərin Azərbaycan həqiqətlərinin dünyaya çatdırılmasında böyük iş gördüyünü diqqətə çatdırıb. Deputat idman mediasında güclü qələm sahiblərinin olduğunu və onların idmanın inkişafında iştirak etdiyini qeyd edib.
Mərasimdə çıxış edən digər natiqlər də turnirdə yüksək rəqabət olacağına əminliklərini ifadə ediblər.
Açılış mərasimindən sonra püşkatma olub.
Qeyd edək ki, yarışın qalibləri Milli Mətbuat Günü ərəfəsində mükafatlandırılacaq. İlk üç yeri tutacaq komandaların hər bir üzvünə pul mükafatı, hədiyyələr və diplom təqdim olunacaq. Jurnalistlər arasında şahmat çempionatı ilk dəfə olaraq komanda şəkilində keçiriləcək. İki nəfərdən ibarət olacaq komandalar püşk nəticəsində müəyyənləşib. Turnirin yarış günləri iyulun 9 –da və 16-da təşkil olunacaq.
Turnirin bağlanışı mərasimində Təşkilat Komitəsi xüsusi nominasiyalar üzrə qalibləri elan edəcək.