İQTİSADİYYAT
“KASPİAN EYR KARQO SAMMİT” İŞİNƏ BAŞLAMIŞDIR
“Azərbaycan Hava Yolları” Dövlət Konserninin baş direktoru Cahangir Əsgərov açılış mərasimində çıxışında bildirmişdir ki, demokratik cəmiyyət quran Azərbaycan dünya iqtisadi sisteminə fəal inteqrasiya yolu tutmuşdur və bunun üçün bütün lazımi şəraitə, ilk növbədə, əlverişli coğrafi mövqeyə malikdir. Azərbaycan iki qitənin – Avropa və Asiyanın qovuşuğunda, transqafqaz nəqliyyat dəhlizinin mərkəzində yerləşir. Avropanı Qafqaz və Mərkəzi Asiya ölkələri ilə birləşdirən hava və dəniz yolları, magistral avtomobil və dəmir yolları buradan keçir. Azərbaycandan keçən və Avropanı Asiya ilə birləşdirən təkcə Böyük İpək yolunun xatırlanması bu regionun böyük coğrafi əhəmiyyətindən xəbər verir. Böyük İpək yolunun ənənələri bu gün də, lakin daha geniş səpkidə inkişafdadır və getdikcə daha çox regionu, xüsusən də, bütün dünyanı daha da yaxınlaşdıran və əlçatar edən avianəqliyyat vasitəsilə qarşılıqlı surətdə faydalı əməkdaşlığa cəlb edir. Ona görə bu zirvə toplantısının regionda yük daşımalarının qovşaq şəhəri olan Bakıda keçirilməsinin özü də rəmzi mənaya malikdir. Bununla əlaqədar “Kaspian Eyr Karqo Sammit”inin hər il Azərbaycan paytaxtında keçirilməsini təklif etmək istərdim.
Avropa və Asiyanın 380 milyon əhalisi olan 11 ölkəsini birləşdirən İqtisadi Əməkdaşlıq Təşkilatının bu yaxınlarda Bakıda IX zirvə toplantısı keçirilmişdir. Dövlətimizin başçısı İlham Əliyev toplantıda çıxış edərək demişdir ki, Azərbaycan regional və beynəlxalq əməkdaşlığın imkanlarına çox diqqətlə yanaşır və bir çox beynəlxalq layihələrin üzvüdür.
1994-cü ildə ümummilli lider Heydər Əliyev Azərbaycanın neft yataqlarının işlənilməsi haqqında Qərbin bir qrup şirkəti ilə neft müqaviləsi imzalamışdır. “Əsrin müqaviləsi” adlandırılan bu sənəd Azərbaycanın iqtisadi siyasətinin öncül istiqamətlərini illərlə öncədən müəyyən etmişdir.
Azərbaycan yük daşımalarının səmərəli şəkildə təşkilində də müəyyən uğurlar qazanmışdır. 2005-ci ildə Bakı Yük Terminalı (BYT) istifadəyə verilmişdir. O, bütün müasir tələblərə cavab verir və MDB-də analoji obyektlər arasında ikinci yeri tutur.
Artıq bu gün demək olar ki, beynəlxalq aviadaşımaların geniş şaxəli şəbəkəsində mühüm pillələrdən birinə çevrilən beynəlxalq avianəqliyyat sistemində BYT-nin öz layiqli yeri var.
Heydər Əliyev adına beynəlxalq hava limanı böyük nəqliyyat qovşağıdır və ona görə də burada “Silk Way Sechnic” texniki mərkəzini açmaq planlaşdırılır. O, müəyyən spektrli servis aviatexniki işlər aparmağa imkan verən müasir avadanlıqla təchiz ediləcəkdir.
C.Əsgərov daha sonra demişdir ki, aviaşirkətimiz MDB, Avropa, Asiya, Amerika ölkələrinin bir çox agentlikləri ilə işləyir. Aviadaşımaların təşkilində və planlaşdırılmasında zəngin ənənələri və təcrübəsi olan Carqolux, Lüfthansa, British Mediterranean, Turkish Airlines, Austrian Airlines kimi aviaşirkətlər Bakıda öz nümayəndəliklərini açmışdır və aviaşirkətlərimizlə sıx əməkdaşlıq edir.
Müxtəlif istiqamətlərdə uçuşları həyata keçirən Azərbaycanın Silk Way Karqo şirkəti yüklərin təyinatı üzrə fasiləsiz daşınmasını təmin edir. Onun Aktau, Atırau, Tbilisi və Lüksemburqa müntəzəm reyslər açması bu istiqamətlərin səmərəli olmasına sübutdur.
Qeyd etmək lazımdır ki, Azərbaycanda, Qazaxıstanda və regionun digər ölkələrində yüksək iqtisadi fəallıq müşahidə olunur. Məsələn, keçən il Azərbaycanda iqtisadi artım 26 faiz, cari ilin birinci rübündə 40 faiz təşkil etmişdir və bu, hələ son hədd deyildir. Bütün bunlar sübut edir ki, biz böyük iqtisadi nailiyyətlərin astanasındayıq.
Bakı hava limanına texniki enmələrin intensivliyi gündən-günə artır. Bu isə yanacağın münasib qiymətdə və xidmətin yüksək səviyyədə olması ilə bağlıdır. Azərbaycanın mülki aviasiyası müasir struktura, yüksəkixtisaslı kadrlara malikdir və istənilən layihələri həyata keçirməyə hazırdır.
Sonra zirvə toplantısında müxtəlif şirkətlərin nümayəndələri çıxış etmiş və iş təcrübələrindən danışmışlar.
Zirvə toplantısı mayın 17-də başa çatacaqdır.