Amerika Birləşmiş Ştatlarının Azərbaycandakı səfirliyi iyunun 11-14-də ABŞ Dövlət Departamentinin “Caz səfirləri” Proqramı çərçivəsində Kelli Conson kvartetinin Bakıya səfərini təşkil etmişdir.

AZƏRTAC-ın müxbiri xəbər verir ki, iyunun 12-də Bakı Caz Mərkəzində kvartetin konserti olmuşdur. Kelli Conson kvarteti Vaşinqtonun Kolumbiya dairəsindəki Kennedi Mərkəzinin üzvüdür. Bir sıra musiqi qrupları ilə yarışaraq uğur qazanmış və ABŞ Dövlət Departamentinin “Caz səfirləri” Proqramında iştirak etmək hüququ qazanmışdır. Kelli Conson kvarteti Bakıdan başlayaraq Müstəqil Dövlətlər Birliyinə səfər edəcək və klassik caz musiqisindən ibarət konsertlər verəcəkdir.

Konsertdə vokalçı Kelli Conson, pianoçu Con Hansen, kontrabasçı Natan Pek və zərb alətlərində Con Uikan çıxış edərək rəngarəng caz musiqi nömrələri ilə tamaşaçıları heyran qoymuşlar.

Xanım Kelli konsertdən sonra müsahibəsində demişdir ki, çox şadam, Azərbaycan auditoriyası məni çox yaxşı qarşıladı. Cazsevərlər bizim konsertdən həzz aldılar. Azərbaycan cazı ilə yalnız Vaqif Mustafazadə və onun qızı Əzizə xanımla tanışam. Onlar Azərbaycan musiqisini cazla sintez edirdilər. Bura gəlməmişdən qabaq Azərbaycan haqqında eşitmişdim. Müəyyən məlumatım vardı. İndi isə daha çoxdur. Ölkəniz gözəldir. Sülh barədə mahnı oxudum. Bu, bizim yaşadığımız günlərdə çox aktualdır. Musiqiçilər bunu öz xətti ilə ifa etməlidirlər. Mən öz xəttimi tapmışam, deyə bilərəm ki, sülh ilə əlaqədar nə isə yarada bilərəm. Caz musiqiçiləri bunu sözlə yox, musiqi ilə insanlara çatdıra bilirlər. Biz bir planetdə yaşayırıq, yəni bir torpağın insanlarıyıq. Gərək imkan yaradaq ki, sözlərimizi başqaları da eşidə bilsin.