CƏMİYYƏT
KİV əməkdaşlarına mənzillərin verilməsi qaydaları və şərtləri açıqlanıb YENİLƏNİB VİDEO
Bakı, 16 may, Əsəd Məmmədov, AZƏRTAC
Kütləvi informasiya vasitələrinin əməkdaşlarına mənzillərin verilməsi qaydaları və şərtləri açıqlanıb.
AZƏRTAC xəbər verir ki, bununla bağlı mayın 16-da Beynəlxalq Mətbuat Mərkəzində mətbuat konfransı keçirilib.
Mətbuat konfransında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) icraçı direktoru Vüqar Səfərli bildirib ki, 2013-cü ildə jurnalistlər üçün növbəti yaşayış binasının təməli qoyulub. Bununla bağlı dövlətimizin başçısının müvafiq Sərəncamı olub. Artıq tikintisi başa çatdırılan bu binanın iyulun 22-də istifadəyə verilməsi gözlənilir.
Vüqar Səfərli qeyd edib ki, dünyanın heç bir yerində jurnalistlərə dövlət tərəfindən evlər hədiyyə olunmur. Dünyada son illər müşahidə olunan iqtisadi böhranlara və bunun Azərbaycan iqtisadiyyatından da yan keçməməsinə baxmayaraq, Prezident İlham Əliyev bu məsələni diqqət mərkəzində saxladı və lazım olan vəsait ayrıldı.
Məlumat verilib ki, jurnalistlərə mənzillərin verilməsi ilə bağlı sənədlərin qəbulunu şəffaf və obyektiv həyata keçirmək üçün Prezident Administrasiyasının tövsiyəsi əsasında doqquz üzvdən ibarət komissiya yaradılıb. Bu gün komissiyanın ilk iclası keçirilib və kütləvi informasiya vasitələrinin əməkdaşlarına mənzillərin verilməsi qaydaları və şərtləri müəyyənləşdirilib.
Həmin qaydalar və şərtlər aşağıdakılardır:
-Ən azı son 3 il fasiləsiz fəaliyyət göstərən kütləvi informasiya vasitəsi (televiziya və radio yayımçıları, qəzet, jurnal, informasiya agentliyi, internet xəbər portalı və saytı) komissiya tərəfindən müəyyənləşdirilmiş şərtlərə uyğun olaraq Bakı şəhərində fəaliyyət göstərən əməkdaşlarının namizədliyini irəli sürür;
-Televiziya və radio yayımçıları 10, gündəlik qəzetlər və informasiya agentlikləri 6, həftəlik qəzetlər, jurnallar, xəbər portalları və saytları 3 namizəd müəyyənləşdirə bilərlər;
-Namizədliyi verilən KİV əməkdaşı həmin redaksiyada ən azı fasiləsiz 3 il, KİV-lərdə isə ən azı fasiləsiz 10 il fəaliyyət göstərməlidir.
KİV-lər:
- ümumi iclas çağırmalı;
- Komissiyanın şərtlərinə uyğun namizəd(lər)ini müəyyənləşdirməli;
- Komissiyaya təqdimat verməlidirlər (möhürlü və imzalı).
KİV-lərin təqdimatına:
- namizədin şəxsiyyət vəsiqəsinin surəti;
- namizədin əmək kitabçasının surəti (KİV rəhbəri tərəfindən təsdiq olunmuş formada);
- namizədin ailə tərkibi haqqında arayış;
- namizədin müəyyənləşdirilməsi ilə bağlı iclasın protokolundan çıxarış (möhürlü və imzalı);
- Daşınmaz Əmlakın Dövlət Reyestri Xidmətindən namizədin, onun həyat yoldaşının və övladlarının adına mənzil şəraiti ilə bağlı arayışın əsli;
- namizədin tərcümeyi-halı (hazırda yaşadığı ünvan və əlaqə telefonları əlavə olunmalıdır).
Təqdimatlarda namizədin mənzil-məişət şəraitinin yaxşılaşdırılması meyarlarına uyğun gəldiyi əsaslandırılmalıdır (jurnalistikanın inkişafında xidmətləri, peşəkarlığı, cəmiyyət tərəfindən tanınması və mənzilə ehtiyac kimi meyarlara üstünlük veriləcək).
Dövlət orqanlarının mətbuat xidmətlərinin əməkdaşları barədə komissiyaya müvafiq şərtlərə və qaydalara uyğun təqdimatlar verilə bilər.
Azərbaycanda jurnalistikanın inkişafında xidmətləri olan veteran jurnalistlər müvafiq şərtlərə və qaydalara uyğun komissiyaya fərdi qaydada müraciət edə bilərlər.
Adları Mətbuat Şurasının "qara siyahısı”na daxil edilmiş, barələrində məhkəmə qərarı olan və qanunvericiliyin tələblərini pozduqlarına görə Azərbaycan Respublikasının Baş Prokurorluğu tərəfindən xəbərdarlıq almış KİV-lər təqdimat verə bilməzlər.
Göstərilən sənədlər 2017-ci il may ayının 22-dən iyun ayının 22-dək komissiyaya təqdim edilməlidir.
Komissiya toplanmış sənədləri iyunun 30-dək Azərbaycan Respublikası Prezidentinin Administrasiyasına təqdim etməlidir.
Sənədlər iş günləri saat 10:00-dan 17:00-dək (nahar fasiləsi 13.00-dan 14.00-dək) Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun ofisində qəbul olunur (Ünvan: Bakı şəhəri, Yasamal rayonu, Mətbuat Prospekti, 529-cu məhəllə (AZ 1073), Beynəlxalq Mətbuat Evi, 3-cü mərtəbə. Əlaqə telefonları: (012) 537 19 41, (012) 538 40 48).
x x x
Mətbuat konfransında çıxış edən Milli Televiziya və Radio Şurasının sədri Nuşirəvan Məhərrəmov deyib: “Biz adətən yalnız televiziya və radioları əsas yayımçı kimi qəbul etmişik. Lakin bundan əlavə kabel şəbəkələri və İP TV yayımları ilə məşğul olanlar da var. Ancaq komissiyanın gəldiyi qərara əsasən, bu dəfə onlar müraciət edə bilməzlər. Çünki onlar sırf yayımla məşğul olmurlar, daha çox xidmət göstərirlər. Komissiyanın qərarına görə, yalnız televiziya və radio yayımçılarının müraciətlərinə baxılacaq”.
Dünyanın heç bir yerində mövcud olmayan bir praktikanın Azərbaycanda uğurla həyata keçirildiyini deyən Mətbuat Şurasının sədri Əflatun Amaşov jurnalistlərə mənzillərin verilməsi ilə bağlı sənədlərin qəbulunu həyata keçirmək üçün yaradılan komissiyanın şəffaflığın və obyektivliyin təmininə xidmət edəcəyini bildirib.
Sonda suallar cavablandırılıb.