KOBİA Slovakiyanın müvafiq qurumları ilə əməkdaşlıqda maraqlıdır

Bakı, 19 oktyabr, AZƏRTAC

Kiçik və Orta Biznesin İnkişafı Agentliyi (KOBİA) sahibkarlığın dəstəklənməsi sahəsində Slovakiyanın müvafiq qurumları ilə əməkdaşlıqda və birgə təşəbbüslərin həyata keçirilməsində maraqlıdır.

AZƏRTAC xəbər verir ki, bu barədə KOBİA-nın İdarə Heyətinin sədri Orxan Məmmədov oktyabrın 19-da Bakıda İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə keçirilmiş Azərbaycan-Slovakiya biznes forumunda deyib.

KOBİA sədri qeyd edib ki, agentlik yerli və xarici iş adamları arasında əlaqələrin qurulmasına və birgə təşəbbüslərin reallaşdırılmasına dəstək göstərir. Belə ki, KOBİA Slovakiya iş adamlarına ölkəmizdə müvafiq qurumlarla əlaqələndirmə, yerli tərəfdaşların tapılması və digər istiqamətlərdə dəstək göstərə bilər.