SİYASƏT
KONSTİTUSİYA MƏHKƏMƏSİ PLENUMUNUN NÖVBƏTİ İCLASI OLMUŞDUR
İclasda vətəndaş Elxan Təyyar oğlu Abbasovun vətəndaş Rüfət Əliyeviç Aslanova qarşı alqı–satqı müqavilələrinin etibarsız hesab edilməsinə, qeydiyyat vəsiqələrinin ləğv olunmasına dair və Rüfət Əliyeviç Aslanovun Elxan Təyyar oğlu Abbasova və Səriyyə İsa qızı Yaqubova qarşı mənzilə hüququnun itirilməsi, mənzildən çıxarılması barədə qarşılıqlı iddiasına dair mülki iş üzrə Azərbaycan Respublikası Ali Məhkəməsi Plenumunun 2004-cü il 24 mart tarixli qərarının Azərbaycan Respublikası Konstitusiyasına və qanunlarına uyğunluğunun yoxlanılmasına dair konstitusiya işinə baxılmışdır.
Azərbaycan Respublikası Ali Məhkəməsi sədrinin 2004-cü il 25 iyun tarixli məktubuna əsasən konstitusiya işinə cavabverən tərəfin nümayəndəsinin iştirakı olmadan baxılmışdır.
İş üzrə hakim F. Babayevin məruzəsini, ərizəçinin nümayəndəsi Z.Məmmədovanın çıxışını dinləyib, işin materiallarını müzakirə edərək Azərbaycan Respublikası Konstitusiya Məhkəməsinin Plenumu qərar qəbul etmişdir.
Qərarda deyilir ki, Elxan Təyyar oğlu Abbasovun Rüfət Əliyeviç Aslanova qarşı alqı–satqı müqavilələrinin etibarsız hesab edilməsinə, qeydiyyat vəsiqələrinin ləğv olunmasına dair və Rüfət Əliyeviç Aslanovun Elxan Təyyar oğlu Abbasova və Səriyyə İsa qızı Yaqubovaya qarşı mənzilə hüququnun itirilməsi, mənzildən çıxarılması barədə qarşılıqlı iddiasına dair mülki iş üzrə Azərbaycan Respublikası Ali Məhkəməsi Plenumunun 2004-cü il 24 mart tarixli qərarı Azərbaycan Respublikası Konstitusiyasının 60-cı maddəsinə və Azərbaycan Respublikası Mülki Prosessual Məcəlləsinin 424.1-ci və 429-cu maddələrinə uyğun olmadığı üçün qüvvədən düşmüş hesab edilsin və işə Azərbaycan Respublikası mülki–prosessual qanunvericiliyi ilə müəyyən edilmiş qaydada yenidən baxılsın.
Qərar dərc olunduğu gündən qüvvəyə minir, qətidir, heç bir orqan və ya şəxs tərəfindən ləğv edilə, dəyişdirilə, yaxud rəsmi təfsir edilə bilməz.