SİYASƏT
Kamal Cəfərov: Ermənistan Xocalı soyqırımı və Edilli kütləvi məzarlığına görə məhkəmə qarşısında cavab verməlidir VİDEO
Strasburq, 14 oktyabr, AZƏRTAC
Ermənistan Xocalıda bir gecədə erməni silahlı qüvvələri tərəfindən işgəncə ilə öldürülmüş 613 azərbaycanlı qadın, uşaq və qocaların ölümünə görə cavab verməlidir. Ermənistan Edilli kəndində aşkarlanmış erməni silahlı qüvvələri tərəfindən dəhşətli işgəncələrlə öldürülmüş azərbaycanlılara məxsus 3 kütləvi məzarlıqla bağlı məhkəmə qarşısında cavab verməlidir. Bütün bu cinayətlərlə bağlı Ermənistan təhqiqat və araşdırmaya başlayıbmı? Əlbəttə, yox.
AZƏRTAC xəbər verir ki, bu fikirləri Azərbaycanın AŞPA-da nümayəndə heyətinin üzvü Kamal Cəfərov qurumun payız sessiyasının sonunda azad debatlar zamanı erməni deputatın çıxışına etiraz olaraq səsləndirib.
Bildirib ki, erməni silahlı qüvvələri azərbaycanlı mülki əhaliyə qarşı, eləcə də hərbiçilərə qarşı dəhşətli işgəncələr verib. Ancaq buna görə Ermənistan bu günə qədər heç bir tədqiqata başlamayıb. Erməni silahlı qüvvələrinin azərbaycanlılara işgəncə verməsinə dair yayılan video ilə bağlı heç bir tədqiqat başlamayıb. Ancaq Azərbaycan tərəfi hər bir hadisəyə diqqətlə yanaşır və araşdırmalar aparır. Ermənilərin yaydığı videoların heç bir əsası yoxdur.
Qeyd edib ki, tək bir videoya baxmaqla, nəyinsə cinayət olub-olmadığı qənaətinə gəlinirsə, onda ittiham və məhkəmə nəyə lazımdır?
“Videoda çox şey görə bilərsiniz, ancaq görüntü və fakt eyni şey deyil. Bəs, videodakı fakt nədir? Bu, çox həssas məsələdir, araşdırılmalıdır. Hüquqi baxımdan iddia edilən cinayətin bütün faktları müəyyən edilməlidir. İddia edilən cinayətin maddi və mənəvi elementləri sübut olunmalıdır. Ədalət baxımından isə müharibənin hər iki tərəfi bütün müharibə cinayəti iddialarını araşdırmalıdır”, - deyə K. Cəfərov deyib.
Bildirib ki, Azərbaycan Hərbi Prokurorluğu iddia edilən cinayətlə bağlı cinayət işini başlayıb və bunu Azərbaycanın məhz beynəlxalq humanitar hüquqa sıx bağlılığına görə edib: “Ermənistan tərəfindən onların hərbçilərinin bizim həlak olmuş əsgərlərimizə qarşı etdikləri qeyri-insani və alçaldıcı davranışı əks etdirən videolarla bağlı heç nə eşitmədik. Yalnız onu eşitdik ki, Ermənistan hüquq mühafizə orqanları bizim azad etdiyimiz ermənilərə qarşı cinayət işi açırlar. Erməni deputatlar bura gəlir, saxlanılan erməni cinayətkarların azad olunması ilə bağlı çağırış edirlər. Ancaq biz onları azad edən kimi, öz ölkələrində onlara qarşı cinayət işi açırlar. Bu ikiüzlülüyün ən bariz nümunəsidir ki, o da buradakı bəzi deputatların içində dərin kök saldığı aydın görünür. Hər kəs bilsin ki, Xocalı genosidini unutmadıq və unutmayacağıq. Erməni silahlı qüvvələri bir gecədə 613 mülki əhalini qəddarlıqla qətlə yetiriblər. Birinci Qarabağ müharibəsindən sonra, dörd min azərbaycanlı hələ də itkindir. Biz Ermənistanın hərbi-siyasi rəhbərliyindən tələb edirik ki, kütləvi məzarlıqların yerini bizə təqdim etsinlər.
İki həftə bundan əvvəl, işgəncə verilmiş və öldürülmüş Azərbaycan hərbiçilərin kütləvi məzarlığı Edilli kəndində tapılıb. Edilli kəndi Ermənistan hərbiçiləri tərəfindən azərbaycanlı girovlar üçün həbs düşərgəsi kimi istifadə edilib. 2020-ci ilin noyabr ayından bu günə qədər, Ermənistan tərəfindən bizim ərazimizdə basdırılan minalara görə 250-dən çox insan ölüb və ya ağır yaralanıb. Laçın şəhərinin azad edilməsindən sonra müəyyən etdik ki, Ermənistan 2021-ci ildə Laçında 1400-dən çox mina basdırıb. Belə ki, onlar Azərbaycana saxta mina xəritələrini təqdim edərkən, minlərlə yeni minanı bizim ərazilərdə basdırdıqları aydın görünür”.
Şəhla Ağalarova
AZƏRTAC-ın xüsusi müxbiri
Strasburq