Bakı, 17 iyun, AZƏRTAC

2014-cü il mövsümündən “Red Bull” komandasının heyətində çıxış edən avstraliyalı avtoyürüşçü, 2009-cu ildə Britaniya “Formula-3” yarışlarının çempionu olmuş Daniel Rikkardo növbəti iki mövsümü “Red Bull Racing” komandasında keçirəcəyini bildirib. Bu komandanın Maks Ferstappen ilə vidalaşmağı planlaşdırmadığını, Milton-Kinsdə vakansiya yaranmayacağını nəzərə alan Karlos Sayns, bununla belə, təslim olmağa hazırlaşmır.

Ralli üzrə ikiqat dünya çempionun oğlu ispaniyalı avtoyürüşçü Karlos Sayns deyib: “Yəqin ki, “Red Bull Racing” komandası Rikkardo və ya Ferstappen ilə vidalaşmayacaq. Buna görə də mənim bu komandaya keçmək şansım olmaya bilər. Lakin mənim planların dəyişmir. Mən təslim olmuram, axı “Formula-1”də nə istəsəniz ola bilər. Bilirəm ki, “Red Bull Racing” komandasında məndən əvvəlki kimi razıdırlar və 2017-ci ildə “Toro Rosso” komandasında qalmaq fikrindəyəm.

Əlbəttə, müxtəlif variantları qiymətləndirmək lazımdır. Qarşıda bir neçə mühüm yürüş var. Mən həmin yürüşlərdə uğur qazanmaq istəyirəm. Baxarıq. Kontraktlar barədə söhbətlər çox tez başlanıb, lakin sözün düzü, mən iri komandada çalışmaq istəyirəm.

İndi komandada mənim üçün rahatdır, lakin buna əsas səbəb tərəf-müqabilimin dəyişməsi deyil, mənim təsir göstərə bilmədiyim məsələlərin həll edilməsidir. Bu, yaxşı nəticələr göstərməkdə mənə kömək edir. Ferstappenin komandadan getməsinin mənə kömək edib-etmədiyini deyə bilmərəm, lakin Maks burada qalacağı təqdirdə vəziyyətin necə olacağını bilmirəm.

Biz yürüşləri problemsiz keçirməliyik. Barselonada hər şey yaxşı oldu, Monakoda isə keçənilki çətinliklər təkrarlandı. Kanadada mənim strategiyam əla oldu, pit-stoplar az qala ideal səviyyədə idi, nəticə də yaxşı alındı. Buna görə komandaya təşəkkürümü bildirmək istəyirəm. Monakoda uğursuzluğun əvəzini yaxşı çıxdıq”.

Karlos Sayns Bakı trası barədə təəssüratlarını da söyləyib: “Bakı trası başqa traslara oxşamır. Onun başqalarından daha maraqlı olub-olmadığını deyə bilmərəm - sadəcə, fərqli trasdır, Formula-1-ə də məhz bu lazımdır. Yeni trasların bəziləri yürüşçülərin xoşuna gəlməyib. Biz klassik və ya Avropa traslarına üstünlük veririk, bu tras isə ən azı heç bir başqa trasa oxşamır”.

Birinci yürüşün nə dərəcədə uğurlu olacağına baxarıq. Görək burada ötüşmək, slipstrimdən istifadə etmək olurmu... yaxşı ki, hündürlüklər artıb-azalır, trasın yaxınlığında hasarlar var, təhlükəsizlik zonalarının sayı azdır, pit-leynə giriş mürəkkəbdir. Bir azdan burada nəyi dəyişməyin mümkünlüyünü müzakirə edəcəyik.

Bu tras təzə olduğu üçün “Pirelli” şırkətində şinlərin seçimi konservativ yolla aparılıb. Bir pit-stoplu strategiya ehtimalı yüksəkdir. 16-cı döngənin qarşısında tormozlama və həmin döngədən çıxış mühüm rol oynayır, ondan sonra iki kilometrlik hissədə ayağımızı qaz pedalından götürməyəcəyik. İkinci sektor yetərincə ləngdir, orada xeyli vaxt itirmək olar.

Bu tras “Toro Rosso” maşını üçün o qədər də münasib deyil. Burada bircə döngə də yoxdur ki, onu saatda 120 kilometr sürətlə qət etmək mümkün olsun. Düzxətli uzun hissədə vaxt itirəcəyik, lakin görək bunun əvəzini çıxa biləcəyikmi”.