İQTİSADİYYAT


Keçən il SOCAR “Petkim”ə 120 milyon dollar sərmayə qoyub

Bakı, 3 dekabr, AZƏRTAC

SOCAR ötən il “Petkim” neft-kimya kompleksinə 120 milyon ABŞ dolları investisiya yatırıb.

AZƏRTAC xəbər verir ki, bu barədə şirkətin 2019-cu ilə dair “Davamlı inkişaf üzrə illik hesabat”ında deyilir.

Hesabatda qeyd olunur ki, 2019-cu il “SOCAR Enerji Türkiyə” üçün şirkətin qoyduğu investisiyaların nəticələrini əldə etməyə başladığı il kimi xüsusi əhəmiyyət daşıyır. 2018-ci ilin oktyabr ayında Azərbaycan və Türkiyə prezidentlərinin iştirakı ilə Türkiyədə real sektorun ən böyük investisiya layihəsi olan 6,3 milyard ABŞ dolları dəyərinə və ildə 10 milyon ton xam neft emalı gücünə malik olan “Star” neft emalı zavodunun açılış mərasimi keçirilib. Dizel yanacağı, nafta, aviasiya yanacağı və mayeləşdirilmiş neft qazı kimi məhsullar istehsal edən zavod 2019-cu ildə tam gücü ilə işləməyə başlayaraq daxili bazara məhsul satışı həyata keçirib. 2019-cu ilin iyununda “Bursagaz”, “Kayserigaz”, “SOCAR Enerji Ticaret”, “Enervis” və “Millenicom”un satın alınması ötən ilin daha bir mühüm nəticəsi kimi qiymətləndirilə bilər. Bununla “SOCAR Enerji Türkiyə” şirkəti təbii qazın paylanması prosesində də iştirak etməyə başlayaraq “neft emalı-neft-kimya-energetika-logistika-paylama-tədarük” halqasını tamamlayıb.

2008-ci ildə səhmlərinin 51 faizini Özəlləşdirmə İdarəsindən satın alınan “Petkim” neft-kimya kompleksi Türkiyədə ilk və yeganə inteqrə olunmuş neft-kimya zavodudur. Türkiyə neft-kimya bazarının ən etibarlı tədarükçüsü olan “Petkim”in 15 əsas və 6 köməkçi müəssisəsində 60-dək neft-kimya məhsulu istehsal edilir. “Petkim” 2019-cu ildə ümumilikdə 3,4 milyon ton həcmində məhsul istehsal etməklə rekorda imza atıb və 2020-ci ildə bu uğurlu dinamikanın davam etdirilməsi planlaşdırılır. Dünyanın 78 ölkəsinə məhsul ixrac edən neft-kimya kompleksi məhsullarının yüksək keyfiyyəti ilə seçilir. 2020-ci ildə “Petkim”də fəaliyyətin rəqəmsallaşdırılması və zavodların modernləşdirilməsinin davam etdiriləcəyi planlaşdırılır. Ötən il Türkiyədə yerləşən “Petkim” neft-kimya kompleksinə 120 milyon dollar investisiya qoyulub. Modernləşmə və istehsalatın səmərəliliyinin artırılması üçün “Petkim”də “Petkim Benim” adlı xüsusi proqram işə salınıb. Bu, zavodun əməkdaşlarının idarəetmədə daha intensiv iştirakını, onlar tərəfindən əməliyyatların səmərəliliyinin artırılması üçün təkliflərin verilməsini nəzərdə tutur. Əməkdaşların təklifləri təhlil edilib və ən perspektivliləri seçilib. Nəticədə 5 milyon dollar investisiya qoyulub ki, bu da ümumilikdə 120 milyon dollar həcmində investisiyaya yol açıb. Bu investisiyalar kompleksin işində müsbət əks olunub və əlavə gəlir gətirib. İzmirin Əliağa Xüsusi iqtisadi zonasında BP ilə birgə layihə çərçivəsində 2019-cu il ərzində reallaşdırılması nəzərdə tutulan neft-kimya kompleksinin layihəsi üzrə ilkin mühəndis və layihələndirmə işləri davam etdirilmişdir. 2020-ci il ərzində layihə üzrə yekun investisiya qərarının verilməsi planlaşdırılır. Bu obyektin istifadəyə verilməsi ilə Türkiyəyə xalis tereftal turşusunun idxalının sıfıra enəcəyi gözlənilir. Eyni zamanda, bu kompleksdə ölkəyə hazırda 800 min ton həcmində idxal olunan paraksilol məhsulunun istehsalı mümkün olacaq.

SOCAR-ın Türkiyədə dəniz yanacaqları sektorunda fəaliyyət göstərən törəməsi “SOCAR Marine” 2019-cu ildə 600 min ton həcmində dəniz yanacaqları satışı həyata keçirib. Şirkət beynəlxalq dəniz yanacaqları satışı sektorunda lider olub. Satış Türkiyənin boğazlarından tranzit olaraq istifadə edən və Türkiyə limanlarında yük əməliyyatları reallaşdıraraq xaricə çıxış və ya giriş edən gəmilərlə həyata keçirib. 2013-cü ildə yaradılan “SOCAR Marine” şirkətinin bazardakı payı artaraq 25 faizdən çox olub.

2019-cu ildə Azərbaycandan Türkiyə bazarına ümumilikdə 9,2 milyard kubmetr, o cümlədən, Cənub Qaz Dəhlizi və TANAP vasitəsilə 2,8 milyard kubmetr təbii qaz çatdırılıb. Beləliklə, Azərbaycanın ümumi qaz ixracında Türkiyə bazarının payı 79 faiz təşkil edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.