Füzuli, 8 dekabr, Aydın Yavərzadə, AZƏRTAC

Ötən il sentyabrın 27-də başlanan Vətən müharibəsində ordumuzun cəbhəboyu endirdiyi sarsıdıcı zərbələr erməni hərbi birləşmələrinin darmadağın olmasına gətirib çıxardı. Qəhrəman Azərbaycan əsgəri bir-birindən uğurlu əməliyyatlar keçirərək, 30 ildən sonra torpaqlarımızı yağı düşməndən azad etdi. Vətən müharibəsinin uğurlu əməliyyatlarından biri də Kənd Horadiz döyüşləridir. AZƏRTAC-ın bölgə müxbiri Kənd Horadizdə xüsusi təyinatlı qüvvələrin mənsubları ilə həmsöhbət olub, onların döyüş təəssüratlarını qələmə alıb.

Daxili İşlər Nazirliyinin əməkdaşlarının xidmət apardığı postlardan keçdikdən sonra 2016-cı ildə uğurlu Aprel döyüşləri zamanı azad olunan yolla irəliləyirik. İstiqamət isə Vətən müharibəsinin ilk günündə azad edilən Kənd Horadizədir. Döyüşlərin ilk başlandığı və düşmənin məhv edildiyi yer. Yol yoldaşlarımız həmin döyüşlərin qəhrəmanlarından olan xüsusi təyinatlı qüvvələrin qaziləri Kamran Dadaşzadə və Asim Əliyev, həmçinin həkim, baş leytenant Cəmşid Qiyaslıdır.

İşğal dövründə düşmən bu ərazidə dəfələrlə təxribata əl atıb. Hər zaman da Azərbaycan Ordusu tərəfindən layiqli cavab alaraq geri otuzdurulub. Vətən müharibəsində ilk əks-həmlənin başlandığı yeri görən qazi gizir Kamran Dadaşzadə avtomobili saxlamağımızı xahiş edir. Deyir ki, bu yerlər onun yaddaşında illərdir gözlədiyi arzunun gerçəkləşdiyi ərazi kimi qalıb: “Uğurlu əməliyyatlarımızdan biri Kənd Horadizdə elə döyüşlərin ilk günündə oldu. Biz yüksəkliklərlə irəliləyirdik. İlk olaraq Yastıtəpə yüksəkliyini götürdük, digər iki qrupumuz qarşıdakı yüksəklikləri tutdu. Üçüncü qrupumuz düşmənin 40 nəfərlik qrupu ilə açıq döyüşə girdi. Biz digər yüksəklikdən onları görsək də, rabitə əlaqəsi yarada bilmirdik. Çünki yaxın döyüşlərdə düşmən xüsusi qurğularla rabitə əlaqəsini kəsirdi. Amma bizim qrup döyüşə atıldı və erməniləri darmadağın etdi. Hakim yüksəklikləri tutaraq, əraziyə nəzarəti ələ keçirmək istəyirdik və buna da nail olduq. Həmin döyüşdə qrupumuz ilk şəhidini verdi. Emin Məmmədov burada döyüşlərdə şəhidlik məqamına yüksəldi. İlkin Abbasov isə yaralandı”.

Kamran bildirir ki, döyüşlər çox ağır keçib. “Bu yerlər çökəklik və meşəlik olduğu üçün erməni hərbçilərinin ən yaxşı möhkəmləndiyi ərazi idi. Kənd Horadizə xeyli qüvvə yığmışdılar. Biz irəlilədikcə digər bölmələrə koordinatları ötürürdük və quru qoşunları da həmin yerləri götürərək arxamızla gəlirdi. Heç zaman unutmaram, Yastıtəpədə açıq döyüşdə bir piyada maşınımız vurulmuşdu. Hərəkət edə bilməsə də, vurulmuş halda belə bizi atəşlə dəstəkləyirdi. Növbəti tapşırıqlardan birində isə başqa bir qrupumuz düşmənin pusqusuna düşdü. Biz dəstəyə getdik və elə bir məqam yarandı ki, iki qrupa bölündük. Erməni qüvvələri pusqu qurmaq istəsə də, özləri pusquya düşdülər. Həmin döyüşdə xeyli erməni hərbçi məhv edildi. Bu yerlərin hər qarışında döyüşçü yoldaşlarımızın qan izləri, hərəsindən bir xatirə var”, - deyə o əlavə edir.

Düşmən bu ərazilərdə məhv edilsə də, Azərbaycan əsgəri ancaq irəli can atırdı. Müşahidə aparan düşmən ordumuzun sol cinahla irəli getdiyini görüb, yenidən Kənd Horadizin sağ tərəfindən bütöv bir hərbi hissə ilə hücuma keçmək və Araz çayına qədər irəliləmək istəsə də, bu hücumun qarşısı da əks-həmlə ilə alınıb.

Xüsusi təyinatlı qrupun komandir müavini, qazi gizir Asim Əliyev deyir ki, qısa müddətdə sol cinahdakı yüksəkliklər ordumuzun nəzarətinə keçmişdi: “Biz sol cinahla irəlilədiyimiz üçün, düşmən sağ tərəfdən yenidən hücuma keçmək istədi. Lakin ərazi tam olaraq nəzarətimizdə idi, düşmənin bütün hərəkətlərini izləyirdik. Bilirdik ki, hücuma keçmək istəyəcəklər. Belə də oldu. Düşmən tankları, döyüş maşınları, piyada bölmələri hərəkətə keçdi. Bunu təyin edərək, koordinatları dərhal artilleriya bölmələrimizə məruzə etdik. Artilleriyamız dəqiq atəşlərlə burada, Kənd Horadizin sağ tərəfində düşmənin qüvvəsini darmadağın etdi. Kənd Horadizin azad edilməsi digər əraziləri azad etmək üçün bizə üstünlük yaratdı. Daha sonra Cəbrayıl, Hadrut azad edildi. Bundan sonra planlı şəkildə aparılan əməliyyatlar sayəsində Füzuli şəhərində yerləşən düşmən qüvvəsi tam mühasirəyə düşdü. Ümumiyyətlə Füzulinin azad edilməsində Kənd Horadiz döyüşlərinin mühüm əhəmiyyəti oldu”.

Həmin günlərdə hərbçilərimizə həyat bəxş edən həkim baş leytenant Cəmşid Qiyaslı isə o günləri xatırlayaraq deyir ki, şanlı, şərəfli bir yolun şahidi olmaq çox qürurverici hisslərdir. “Biz həkim olsaq da, həyatı bəxş edən Allahdır, biz vasitəçiyik. Düşmən təxribatına qarşı əks-hücum əmri gələndə tabor komandirimiz, Vətən Müharibəsi Qəhrəmanı, şəhid polkovnik Orxan Əkbərovdan xahiş etdim ki, hərbçi yoldaşlarımla cəbhəyə yollanım. Sağ olsun, icazə verdi. Cəbhəyə gəldikdə hərbçilərimizdəki böyük ruh yüksəkliyini gördüm. Hər bir əsgər torpaqlarımızı azad etmək üçün ancaq irəli getməyə can atırdı. Çox qürurlu anlar idi. Döyüşlərin gedişatında hətta hərbçilərimiz məni qorumaq üçün özlərini sipər edirdilər. Deyirdilər ki, sizə bir şey olsa, bizə, yaralılara kim kömək edəcək?! Sənin sağ qalmağın daha vacibdir. İlk yaralımız İlkin Abbasov oldu. Döyüşçü yoldaşları ona ilkin tibbi yardım göstərdiyindən, mən onu təxliyə etdim. Sonra Emin adlı döyüşçü yoldaşımız ağır yaralandı. Güllə onun üz nahiyəsinə girərək boynundan çıxmışdı. Lakin Allahın möcüzəsi nəticəsində sağ qaldı. Bizim bir məqsədimiz var idi, nəyin bahasına olursa-olsun, döyüşçülərimizə can verək, onları yaşadaq”.

Hərbçilər bu Qələbənin memarının Ali Baş Komandan İlham Əliyev olduğunu söyləyərək bildirdilər ki, məhz Prezidentin rəhbərliyi ilə uzun illər aparılan ordu quruculuğu, peşəkar hərbçi kadrların yetirişdirilməsi, gənclərin vətənpərvər ruhda tərbiyə alması bu Zəfərin qazanılmasında öz rolunu oynadı. Əlbəttə ki, xalqımızın öz rəhbərinin, ordusunun ətrafında bir yumruq tək birləşməsi Azərbaycan əsgərinə əlavə güc verirdi.

İndi azad edilən ərazilərdə yenidənqurma, tikinti-abadlıq, quruculuq işləri aparılır. Çox yaxın vaxtlarda həmin ərazilərdə firavan həyata yenidən başlayacaq.