REGİONLAR


Kənd Təsərrüfatı Nazirliyi üzrə 250-dən artıq vakant dövlət qulluğu vəzifəsi müsabiqəyə çıxarılacaq

Nazir İnam Kərimov vakant dövlət qulluğu vəzifələrinə qəbulda uğurlu nəticə göstərmiş əməkdaşlarla görüşüb

Bakı, 7 fevral, AZƏRTAC

Kənd təsərrüfatı naziri İnam Kərimov vakant dövlət qulluğu vəzifəsinə qəbulda uğurlu nəticə göstərmiş, Nazirliyin Mərkəzi Aparatında və Dövlət Aqrar İnkişaf Mərkəzlərində (DAİM) işlə təmin olunmuş bir qrup əməkdaşla görüşüb.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, nazir üç ay əvvəl Dövlət İmtahan Mərkəzində keçirilmiş imtahanların müsabiqə və müsahibə mərhələsində müvafiq bal toplamış namizədlərin artıq işə qəbul edildiyini deyib. Nazirliyin yeni əməkdaşlarına uğurlar diləyən İnam Kərimov bildirib ki, artıq Azərbaycanda kənd təsərrüfatı innovativ sahəyə çevrilir: “Prezident İlham Əliyev həmişə gənc kadrların işlə təmin olunmasına dəstək verir. Dövlətimizin başçısının qarşımızda qoyduğu vəzifələrdən biri gənclərə dəstək olmaq, gənc və peşəkar kadrların dövlət strukturlarında işlə təminatına şərait yaratmaqdır. Siz artıq nazirliyin Mərkəzi Aparatında, Dövlət Aqrar İnkişaf mərkəzlərində işləyəcəksiniz, fermerlərlə daim təmasda olacaqsınız. Fəaliyyətiniz nazirliyimizin iş prinsiplərinə - fermerlərə yaxınlıq, şəffaf və səmərəli idarəetmə, innovasiyaların tətbiqi prinsiplərinə uyğun şəkildə qurulmalıdır. Aparılan struktur islahatlarının mahiyyəti fermerlərə yaxınlığı təmin etmək, onlara daha yaxşı xidmət göstərməkdir. Siz fəaliyyətinizdə bu məqamı mütləq nəzərə almalısınız”.

Kənd Təsərrüfatı Nazirliyinin İnsan resurslarının idarə edilməsi şöbəsinin müdiri Elvin Paşayev vakant dövlət qulluğuna müsabiqə və müsahibədə iştirak edərək yüksək nəticə göstərən kadrlar arasında gənclərin çoxluq təşkil etdiyini deyib. O bildirib ki, imtahanlarda uğurlu nəticə göstərənlər nazirlik strukturuna daxil olan qurumlarda və Dövlət Aqrar İnkişaf Mərkəzlərində aparıcı məsləhətçi, baş məsləhətçi vəzifələrinə təyinat alıblar.

Nazir İnam Kərimov görüş iştirakçılarına gələcək fəaliyyətlərində uğurlar diləyib. Bildirib ki, yaxın zamanlarda Kənd Təsərrüfatı Nazirliyi üzrə inzibati vakant dövlət qulluğu vəzifələrinə növbəti elan veriləcək və təxminən 250-dən artıq vakant vəzifə müsabiqəyə çıxarılacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.