Yevlax, 25 fevral, Tahir Ağaməmmədov, AZƏRTAC

Azərbaycan Respublikasının Prezidenti İlham Əliyevin tapşırıq və tövsiyələrinə əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün müxtəlif tədbirlər görürlər.

AZƏRTAC xəbər verir ki, kənd təsərrüfatı naziri Heydər Əsədov fevralın 25-də Yevlax şəhərində Yevlax, Samux, Göygöl, Daşkəsən, Goranboy, Xocalı və Kəlbəcər rayonlarından olan vətəndaşları qəbul edib. Nazirliyin idarə və tabeli qurumlarının rəhbərlərinin də iştirakı ilə keçirilən qəbulda 30-dan artıq vətəndaşın müraciətinə baxılıb.

Qəbula gələn vətəndaşlar əsasən fermerlərə güzəştli kreditlərin verilməsi, kənd təsərrüfatı texnikası ilə təminat, torpaq mübahisələrinin həllinə kömək, su problemi, özəl aqroservislərin yaradılmasına dəstək verilməsi, ixtisasa uyğun işlə təmin olunma və digər məsələlərlə bağlı müraciətlər ediblər.

Qəbulda nazir Heydər Əsədov vətəndaşların müraciətlərini, şikayət və təkliflərini dinləyərək, hərtərəfli öyrənilməsi və qanunvericiliyə uyğun tədbirlərin görülməsi üçün nazirliyin müvafiq strukturlarının rəhbərlərinə tapşırıqlar verib.

Heydər Əsədov sakinlərlə görüş zamanı dövlətimizin başçısının aqrar sahəyə göstərdiyi diqqət və qayğıdan danışıb, kənd təsərrüfatının inkişafı ilə bağlı Sərəncam və tapşırıqları şərh edib, pay torpaqlarının birləşdirilməsi, korporativlərin yaradılmasının vacibliyini vurğulayıb.

Vətəndaşların müraciətlərinin bir qismi yerindəcə həllini tapıb, qaldırılan digər məsələlər isə araşdırılması üçün nəzarətə götürülüb. Nazirliyin fəaliyyət dairəsinə aid olmayan müraciətlər müvafiq qurumlara çatdırılmaq üçün qeydiyyata alınıb.

Qəbula gələn vətəndaşlar göstərilən diqqət və qayğıya görə Prezident İlham Əliyevə minnətdarlıqlarını bildiriblər.

Nazir Heydər Əsədov həmin gün “Aqrolizinq” ASC-dən kənd təsərrüfatı texnikalarını lizinqə götürən hüquqi və fiziki şəxslərlə də görüşüb. Məlumat verilib ki, Yevlax, Samux, Göygöl, Daşkəsən, Goranboy, Xocalı, Kəlbəcər və ətraf rayonlardan 109 istifadəçiyə lizinqə verilmiş, ümumilikdə, 4 milyon 170 min 931,17 manat məbləğində 224 ədəd müxtəlif kənd təsərrüfatı texnikasına 1 milyon 602 min 127,67 manat məbləğində güzəşt tətbiq edilib.

Xüsusi Komissiyanın qərarına görə, güzəşt əsasında istifadəçilərlə yeni lizinq müqavilələrinin bağlanılması, o cümlədən 49 ədəd müxtəlif kənd təsərrüfatı texnikasının istifadəçilərin mülkiyyətinə verilməsi və onların Baş Dövlət Texniki Nəzarət Müfəttişliyinin rayonlar üzrə bölmələrində qeydiyyata alınması həyata keçirilib və sənədlər vətəndaşlara təqdim edilib. Eyni zamanda, “Aqrolizinq” ASC-dən lizinq yolu ilə əldə etdiyi kənd təsərrüfatı texnikalarının ilkin dəyərinin 20 faizini ödəmiş istifadəçilərə də güzəşt üçün elektron ərizə verilməsi ilə bağlı Cəmiyyətin əməkdaşları tərəfindən xidmət göstərilib.

Bildirilib ki, Xüsusi Komissiyanın respublikanın 42 rayonunu əhatə etməklə keçirilmiş səyyar iclaslarında 852 istifadəçiyə lizinqə verilmiş 1701 ədəd müxtəlif kənd təsərrüfatı texnikasına 10 milyon 46 min 57,24 manat məbləğində güzəşt tətbiq edilib. İstifadəçilərlə yeni lizinq müqavilələrinin bağlanılması, o cümlədən güzəşt tətbiq edildikdən sonra 520 ədəd müxtəlif kənd təsərrüfatı texnikasının istifadəçilərin mülkiyyətinə verilməsi, hüquqi sənədlərin yerində vətəndaşlara təqdim edilməsi təmin edilib. “Aqrolizinq” ASC-dən kənd təsərrüfatı texnikalarını lizinqə götürən hüquqi və fiziki şəxslər tərəfindən daxil olmuş elektron müraciətlər üzrə Xüsusi Komissiyanın qərarına əsasən, 4737 istifadəçinin lizinqə götürdüyü kənd təsərrüfatı texnikasına, ümumilikdə, 56 milyon 41 min 618,16 manat məbləğində güzəşt tətbiq olunub.

Nazir Heydər Əsədov görüş zamanı dörd nəfər şəhid ailəsi və bir nəfər Qarabağ müharibəsi veteranına MTZ-892 markalı traktorun sənədlərini növbədənkənar təqdim edib.