CƏMİYYƏT


Keniyada Əhali və İnkişaf üzrə Beynəlxalq Konfransın 25 illik yubileyinə həsr olunan Sammit keçirilir

Bakı, 13 noyabr, AZƏRTAC

Noyabrın 12-14-də Keniya Respublikasının Nayrobi şəhərində Əhali və İnkişaf üzrə Beynəlxalq Konfransın 25 illik yubileyi münasibətilə (İCPD 25) Nayrobi Sammiti keçirilir. Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Hicran Hüseynovanın rəhbərliyi ilə nümayəndə heyəti həmin tədbirdə iştirak edir.

Komitədən AZƏRTAC-a bildiriblər ki, tədbirdə BMT-yə üzv dövlətlərdə bu istiqamətdə əldə olunan nailiyyətlər, qarşıda duran vəzifə və perspektivlər müzakirə edilir.

Sammitdə çıxış edən Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Hicran Hüseynova deyib: “Əhali və İnkişaf üzrə Beynəlxalq Konfransın 25 illik yubileyinə həsr edilmiş bu mötəbər tədbirdə Azərbaycan hökumətini təmsil etməkdən şərəf duyuram. Məmnunluqla bildirmək istəyirəm ki, hər hamiləliyin arzulandığı, hər uşağın sağlam doğulduğu və hər gəncin potensiallarının reallaşdırıldığı bir dünya tərəfdarıyıq. Bu məqsədlə biz gender əsaslı ayrı-seçkilik və zorakılıqlara qarşı beynəlxalq standartlara uyğun mübarizə apara bilmək üçün qanuni və siyasi çərçivələri möhkəmləndirməyə davam edəcəyik. Nayrobidəki bu görüş əldə edilən uğurları artırmağa və hamı üçün daha yaxşı dünya qurmaq üçün bizə gözəl imkan verir”.

Daha sonra Sammit ayrı-ayrı panellər üzrə işini davam etdirib.

Qızların qərar qəbuletmədə iştirakı və bunun inkişaf prosesinə təsiri mövzusunda keçirilən panel iclasına rəhbərlik edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova panel iştirakçılarını salamlayaraq Azərbaycanda bununla bağlı görülən işlərdən ətraflı məlumat verib.

Qeyd olunub ki, qızların liderlik bacarıqlarının inkişafına investisiyaların qoyulması, yalnız onların gələcəyinə yox, həmçinin cəmiyyətin gələcək rifahına təsir göstərir. Hər bir qız öz gələcəyinə cavabdeh olmalıdır. Etiraf edək ki, səlahiyyətlərin gücləndirilməsi evdən və cəmiyyətdən başlayır. Atalar və qızlar arasındakı etimad və hörmət mühiti müvəffəqiyyətli qadın yetişdirmək üçün zəruri komponentlərdən biridir. Ataların ailədə qərarverici rolunu əsas tutaraq, qız uşaqlarının ailədə və cəmiyyətdə dəyərlərinin təbliği və ailədə zorakılığın qarşısının alınması məqsədi ilə biz “"Atalar və Qızlar&quot” layihəsini başlatdıq. UNFPA ilə keçirdiyimiz birgə layihənin bir hissəsi olaraq bu layihə qız uşağının yetişdirilməsində atanın həlledici rolunu gücləndirmək məqsədi daşıyır.

“Biz, həmçinin dini və yerli icma rəhbərlərinin qız uşaqlarının hüquqlarının təşviqi üçün geniş təbliğat kampaniyaları başlatdıq. Həmçinin problemlərin həlli, komanda qurma, ünsiyyət və liderlik bacarıqlarının artırılmasına xidmət edən idman proqramlarının rolu da nəzərə alınır, bu istiqamətdə bir sıra kampaniyalar reallaşdırılır. Futbol Federasiyaları Assosiasiyasının, UNICEF-in, Gənclər və İdman Nazirliyinin birgə təşkilatçılığı ilə qızların ictimai həyatın müxtəlif sahələrində fəallıqlarının artırılması istiqamətində keçirilən “"Qızlar Bacarır&quot” Gənclər forumlarını vurğulamaq lazımdır.

Hər bir qızın məktəbə getmək, zorakılığın və şiddətin hər hansı bir formasından qorunmaq, səhiyyə xidmətlərindən istifadə etmək, habelə ictimai həyatda tam iştirak etmək hüququ vardır. Bunları edən zaman həssas kateqoriyadan olan şəxslərə xüsusi diqqət yetirməliyik, əsas da qaçqın və məcburi köçkün qızların cəmiyyətə tam inteqrasiya olunmalarına şərait yaratmalıyıq. Ailələrlə daha çox işlər görməliyik, o cümlədən güclü qadın modellərini nümayiş etdirməliyik. Qızların və qadınların iş seçimində gender stereotiplərinə qarşı mübarizənin gücləndirilməsi, onların iqtisadiyyatın qeyri-ənənəvi sahələrinə marağının artırılması və işlə təmin olunması istiqamətində maarifləndirmə işlərinin aparılması mühüm əhəmiyyətə malikdir.

Gənc qızların potensiallarını reallaşdırmasına və inamlı olmalarına kömək etmək üçün fürsətlər yaratmaq çox vacibdir. Məsələn, Azərbaycanda indi daha çox qızların elm, texnologiya, mühəndislik və rəqəmsal sahibkarlıq sahələrində karyera qurmaları üçün çalışırıq. Biz həqiqətən də çalışırıq ki, ölkəmizdə gender bərabərliyini təmin etmək üçün daha çox işlər görək”, - deyə Hicran Hüseynova vurğulayıb.

Panel digər dövlət nümayəndələrinin məruzələri ilə davam edib.

Sonda ətraflı müzakirələr aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.