SİYASƏT
Kişineuda ulu öndər Heydər Əliyevin anadan olmasının 99-cu ildönümü qeyd edilib
Kişineu, 10 may, AZƏRTAC
Ölkəmizin Moldovadakı səfirliyində Moldovadakı Azərbaycanlılar Konqresi (MAK) ilə birgə müasir Azərbaycanın qurucusu ulu öndər Heydər Əliyevin anadan olmasının 99-cu ildönümünə həsr edilmiş tədbir keçirilib. Tədbir çərçivəsində Ümummilli Liderin həyat və fəaliyyətinə həsr edilmiş fotoşəkillərdən ibarət sərgi təşkil edilib.
AZƏRTAC xəbər verir ki, tədbirdə Moldova parlamentinin hakim Fəaliyyət və Həmrəylik Partiyasından olan deputatı, Moldova-Azərbaycan parlamentlərarası dostluq qrupunun üzvü Vitaliy Jakot, Moldovanın Millətlərarası Əlaqələr Agentliyinin rəhbəri Vera Petuhov, ölkənin ictimai-siyasi xadimləri, Moldovada yaşayan icmaların nümayəndələri, yerli və xarici tələbələr və çoxsaylı həmvətənlərimiz iştirak ediblər.
Qonaqlar, ilk növbədə, Ulu Öndərin səfirliyin önündəki bağçada ucaldılmış büstü önünə gül dəstələri düzüblər.
Tədbirdə giriş nitqi ilə çıxış edən səfir Qüdsi Osmanov qonaqları salamlayaraq dünyaşöhrətli siyasi xadim Heydər Əliyevin doğum gününün hər bir azərbaycanlı, eləcə də bütün dünyada yaşayan həmvətənlərimiz tərəfindən sevinc və qürurla qeyd edildiyini bildirib. Ulu Öndərin həyat və fəaliyyətinin fədakarlığın, Vətənə, xalqa sədaqətli xidmətin bariz nümunəsi olduğunu vurğulayan səfir dahi liderimizin müdrik siyasətinin Azərbaycanın dövlət müstəqilliyini əbədi və sarsılmaz etdiyini diqqətə çatdırıb. Səfir qeyd edib ki, əsası Ümummilli Lider tərəfindən qoyulmuş milli dövlətçilik strategiyası, eləcə də iqtisadi-sosial inkişaf layihələri Azərbaycanın gələcək inkişafını müəyyən edib. Bundan əlavə, Q.Osmanov ulu öndər Heydər Əliyevin layiqli davamçısı Ali Baş Komandan, Prezident İlham Əliyev tərəfindən 44 günlük Vətən müharibəsi nəticəsində ümummilli liderin Azərbaycanın işğal olunmuş torpaqlarının azad edilməsi arzusunun gerçəkləşdirildiyini, bununla da Azərbaycanın ərazi bütövlüyünün bərpa olunduğunu və azad edilmiş ərazilərimizdə quruculuq işlərinin aparıldığını tədbir iştirakçılarının diqqətinə çatdırıb. Sonda səfir Ümummilli Liderin Azərbaycanla bağlı sözlərini xatırladaraq çıxışını yekunlaşdırıb.
Öz növbəsində, deputat V.Jakot çıxış edərək bildirib ki, hər bir xalqın tarixində müstəsna xidmətləri olan, dövlətçilik ənənələrini formalaşdıran ümummilli lider vardır. Azərbaycan xalqının ümummilli lideri isə XX əsrin görkəmli tarixi şəxsiyyətləri sırasında yer almış Heydər Əliyevdir. Deputat qeyd edib ki, Heydər Əliyev dühası 1969-cu ilə qədər SSRİ-nin aqrar respublikası kimi tanınan Azərbaycanı çox qısa müddətdə inkişaf etmiş sənaye ölkəsinə, yüksək mədəniyyəti ilə bütün dünyada tanınmış ölkəyə çevirə bildi. V.Jakot diqqətə çatdırıb ki, Heydər Əliyevin birbaşa rəhbərliyi altında neft sektorunun aparıcı nümayəndələri ilə bağlanmış “Əsrin müqaviləsi” nəticəsində Azərbaycan iqtisadi sahədə mühüm nailiyyətlər əldə edib. Beləliklə, Heydər Əliyevin sovet illərində və daha sonra Azərbaycanın müasir tarixi dövründə fəaliyyəti bir-birini tamamlayan iki mərhələ kimi qiymətləndirilə bilər. Onun müdrik və uzaqgörən rəhbərliyi ilə Azərbaycanın müstəqilliyi, suverenliyi və dövlətçilik ənənələri möhkəmləndirilib.
Eyni zamanda, deputat çıxışında Heydər Əliyevin müdrik və uzaqgörən siyasəti nəticəsində hazırda Azərbaycanın sosial rifah və iqtisadi inkişaf yolu ilə irəliləyən, beynəlxalq birliyin nüfuzlu üzvü kimi mövqeyini qoruyan, eləcə də regionun siyasətində mühüm rolu olan ölkə olduğunu vurğulayıb. Daha sonra, V.Jakot xalqın və dövlətin inkişafında böyük xidmətləri olan lider kimi Heydər Əliyevin həm Azərbaycan tarixində, həm də bütün dünya siyasətində dərin iz qoyduğunu qonaqların diqqətinə çatdırıb. Çıxışının sonunda deputat Moldova xalqı adından Azərbaycan xalqına səmimi təbriklərini çatdırıb, əsası ulu öndər Heydər Əliyev tərəfindən qoyulmuş xalqlarımız arasında sarsılmaz dostluq münasibətlərini və qarşılıqlı dəstəyi yüksək qiymətləndirdiyini dilə gətirib.
Daha sonra Moldovanın Millətlərarası Əlaqələr Agentliyinin rəhbəri V.Petuhov çıxış edərək Azərbaycanın rifahı və inkişafı yolunda misilsiz xidmətləri olmuş Ulu Öndərin görkəmli siyasi xadim, qayğıkeş ailə başçısı, uşaqlara, gənclərə, ahıllara, eləcə də cəmiyyətin bütün üzvlərinə diqqətlə yanaşan tarixi şəxsiyyət olduğunu vurğulayıb. Çoxsaylı azərbaycanlıların Ümummilli Liderin anadan olmasının 99-cu ildönümünü qeyd etmək üçün səfirliyə toplaşmasının təqdirəlayiq sayıb və Moldovada yaşayan digər icma nümayəndələri üçün örnək olduğunu bildirib.
MAK-ın sədri Elçin Bayramov çıxışında qeyd edib ki, bugünkü qüdrətli və nüfuzlu Azərbaycanın memarı ümummilli lider Heydər Əliyevdir. O bildirib ki, Ulu Öndərin əziz xatirəsinə ehtiram olaraq, dünya azərbaycanlıları, habelə Moldovada yaşayan soydaşlarımız Azərbaycanın yüksək səviyyədə tərənnüm edilməsi, sosial-iqtisadi sahədə inkişafının genişləndirilməsi istiqamətində çalışmalı və səylərini əsirgəməməlidir. E.Bayramov çıxışının sonunda xalqımızın liderinin xatirəsini daim uca tutduğunu, Ulu Öndərin ruhunu ehtiramla andığını bildirib.
Bundan əlavə, tədbirdə Moldovada yaşayan azərbaycanlı fəallar Maarif Rəhimov, Yasin Seyidov, Ramil Məmmədov və digərləri çıxış edərək Heydər Əliyevin həyat və fəaliyyətindən söhbət açıb, dahi liderə həsr edilmiş şer nümunələri səsləndiriblər.
Tədbir və sərgi Moldova KİV-də rumın və rus dillərində geniş işıqlandırılıb.
Emil Hüseynli
AZƏRTAC-ın xüsusi müxbiri
Kişineu