CƏMİYYƏT
Kitabxanada “Narkomaniya ilə mübarizə sağlam həyata təminatıdır” adlı tədbir keçirilib
Bakı, 18 iyun, AZƏRTAC
Respublika Gənclər Kitabxanası Narkomaniya və Narkobiznesə qarşı Beynəlxalq Mübarizə günü ilə əlaqədar iyunun 18-də “Zoom” proqramı üzərindən “Narkomaniya ilə mübarizə sağlam həyata təminatıdır” adlı tədbir təşkil edib.
AZƏRTAC xəbər verir ki, tədbiri kitabxananın elmi işlər üzrə direktor müavini Xalidə Musayeva açaraq Azərbaycan Respublikasının Prezidenti İlham Əliyevin 22 iyul 2019-cu il tarixli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın icrası ilə əlaqədar təşkil edilən tədbirlərdən, narkomaniyanın müasir dünyada cəmiyyəti narahat eləyən problemlər içərisində ən mürəkkəb və faciəvi nəticələrə gətirib çıxaran bəla olmasından danışıb.
Kitabxananın direktoru, tarix üzrə fəlsəfə doktoru Oruc Quliyev çıxışına ümummilli lider Heydər Əliyevin “Narkomanlığa və narkotik vasitələrin qanunsuz dövriyyəsinə qarşı mübarizə ümumdövlət vəzifəsidir” ifadəsilə başlayıb və “Narkomaniya bəşəriyyət üçün təhlükə mənbəyidir” adlı məruzə ilə çıxış edib. O, məruzəsində müasir gəncləri narkotik vasitələrdən istifadədən çəkinməyə, elmə, maarifə səsləyib.
Yasamal rayonu Narkoloji Dispanserin həkimi, tarix elmləri namizədi, psixiatr-narkoloq Fəzail Sadıqov “Narkomaniya, psixoloji səbəbləri, xilas yolları” adlı məruzəsində narkotik vasitələrin insan psixikasına, təfəkkürünə, emosiyasına təsir qüvvəsindən, sosial faktorlardan, özündən asılılıq vermə xüsusiyyətlərindən, həmçinin narkotik aludəçilərinə kritik dövrdən başlayaraq davamlı müalicə üsullarından, bu sahədə tibbi təbabətin inkişafı barədə geniş məlumat verib.
Məruzələr bitdikdən sonra tədbir iştirakçıları olan gənclərin narkotik vasitələrin növləri, qəbulu, əsas istifadə səbəbləri, mübarizə yolları və sair mövzularda sualları psixiatr-narkoloq Fəzail Sadıqov tərəfindən cavablandırılıb.
Respublika Gənclər Kitabxanası 24 iyun - Narkomaniya və Narkobiznesə qarşı Beynəlxalq Mübarizə Günü ilə əlaqədar olaraq tədbirləri davam etdirəcək və bu mövzuda yeni materialları istifadəçilərə təqdim edəcəkdir.