İQTİSADİYYAT


Kiyev Şəhər Administrasiyasının nümayəndələri Azərbaycanın tullantıların idarəolunması sahəsində təcrübəsini öyrənir

Bakı, 5 fevral, AZƏRTAC

Kiyev Şəhər Administrasiyasının nümayəndələri Azərbaycanın tullantıların idarəolunması sahəsində təcrübəsini öyrənmək üçün "Təmiz Şəhər" ASC-də olublar.

İqtisadiyyat Nazirliyinin mətbuat xidmətindən AZƏRTAC-a bildiriblər ki, qonaqlara səhmdar cəmiyyətin fəaliyyəti, reallaşdırılan layihələr barədə məlumat verilib.

"Təmiz Şəhər" ASC-nin idarə heyətinin sədri Etibar Abbasov bildirib ki, Bakı Bərk Məişət Tullantılarının Yandırılması Zavodu ən sərt ekoloji tələblərə cavab verir və 4-cü nəsil texnologiyalarla inşa edilib, il ərzində 500 min ton bərk məişət, 10 min ton tibbi tullantını utilizə etmək və 231 milyon kilovat-saat elektrik enerjisi hasil etmək gücünə malikdir. İl ərzində zavodda əldə edilən enerji ilə 300 min nəfər əhalisi olan şəhəri elektrik enerjisi ilə tam təmin etmək mümkündür.

Qonaqlar, həmçinin Balaxanı bərk məişət tullantılarının zərərsizləşdirilməsi poliqonu ilə tanış olublar. Məlumat verilib ki, poliqon bütün sanitar normalara uyğundur. Poliqonun yenidən qurulması işləri İqtisadiyyat Nazirliyi və Dünya Bankı tərəfindən həyata keçirilən "Bərk məişət tullantılarının vahid idarəçiliyi layihəsi" çərçivəsində həyata keçirilib. Burada tullantılardan ayrılan çirkab sular filtrlər vasitəsilə süzülərək texniki suya çevrilir və poliqonun ərazisində əkilən 10 mindən artıq ağacın suvarılmasında istifadə olunur. Tullantılardan yığılan qazlar isə xüsusi generatorlar vasitəsilə elektrik enerjisinə çevrilir. Bu enerji poliqonun daxili ehtiyacları üçün istifadə olunur.

Balaxanı Bərk Məişət Tullantılarının Çeşidlənməsi Zavodu ilə tanış olan qonaqlara məlumat verilib ki, Almaniya texnologiyaları ilə inşa edilən zavod il ərzində 200 min ton tullantı çeşidləmək gücünə malikdir. Tullantılar plastik, PET, kağız, sellofan, şüşə və digər növlərə çeşidlənərək preslənib təkrar emal müəssisələrinə yollanır.

Kiyev Şəhər Administrasiyasının nümayəndələrinə, həmçinin ölkəmizdə "yaşıl iqtisadiyyat"ın inkişaf etdirilməsi məqsədilə yaradılmış 7 hektar sahəni əhatə edən Balaxanı Sənaye Parkı barədə də məlumat verilib. Sahibkarlar üçün əlverişli şəraitin yaradıldığı Balaxanı Sənaye Parkında təkrar emal müəssisələri fəaliyyət göstərir.

Kiyev Şəhər Administrasiyasının nümayəndələri "Təmiz Şəhər" ASC-nin fəaliyyətini, zavodların işini yüksək qiymətləndirib, tullantıların idarəolunması sahəsində Azərbaycan təcrübəsinin Ukraynada tətbiqinin faydalı olacağını vurğulayıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.