CƏMİYYƏT


Kiyevdə Azərbaycan Respublikası Xüsusi Dövlət Mühafizə  Xidmətinin nümayəndələri ilə Ukrayna Milli Qvardiyasının rəhbər heyəti arasında görüş keçirilib

Kiyev, 8 aprel, AZƏRTAC

Azərbaycanın Ukraynadakı səfirliyində Azərbaycan Respublikası Xüsusi Dövlət Mühafizə Xidmətinin (XDMX) nümayəndələri ilə Ukrayna Milli Qvardiyasının rəhbər heyəti arasında səfirliyin mühafizəsi mövzusunda işgüzar görüş keçirilib.

AZƏRTAC xəbər verir ki, görüşdə Ukraynada, xüsusən paytaxt Kiyevdəki ictimai-siyasi vəziyyət, kriminogen durum, eləcə də əməliyyat şəraitinə təsir edə biləcək digər məqamlar müzakirə olunub, iki qurum arasındakı əməkdaşlığın mövcud vəziyyəti və inkişaf perspektivləri nəzərdən keçirilib.

Azərbaycan ilə Ukrayna arasında təhlükəsizlik sahəsində səmərəli əməkdaşlığın mövcud olduğunu deyən səfir Azər Xudiyev bildirib ki, ölkələrimiz arasında ənənəvi dostluq və tərəfdaşlıq münasibətləri getdikcə güclənməkdədir. İstər ikitərəfli münasibətlərdə, istərsə də beynəlxalq təşkilatlarda Azərbaycan və Ukrayna bütün sahələrdə bir-birini dəstəkləməkdədir.

XDMX-nin idarə rəisi, polkovnik Ceyhun Qəmərli qeyd edib ki, Azərbaycan Respublikasının Ukraynadakı səfirliyi 2014-cü ilin iyulundan etibarən Xüsusi Dövlət Mühafizə Xidmətinin Diplomatik Nümayəndəliklərin Mühafizə İdarəsinin əməkdaşları tərəfindən mühafizə olunur. Elə həmin tarixdən Ukrayna Milli Qvardiyası ilə əlaqələr və işgüzar münasibətlər yüksək səviyyədədir. Təhlükəsizlik məsələlərində də qarşılıqlı əlaqələr uğurla inkişaf edir.

Ukrayna Milli Qvardiyası qərargahının rəisi vəzifəsini icra edən general-mayor Aleksandr Oleşenko, müavini general-mayor İqor Timoşenko çıxışlarında birgə fəaliyyətin səmərəliliyindən, əməkdaşlığın inkişaf perspektivlərindən danışıblar.

Görüşdə Ukrayna Milli Qvardiyasının 5 illik yubileyi münasibətilə Xüsusi Dövlət Mühafizə Xidmətinin rəisi, general-polkovnik Vaqif Axundovun Ukrayna Milli Qvardiyasının komandanına ünvanladığı təbrik məktubu oxunub. Eyni zamanda qeyd olunub ki, XDMX rəisinin müvafiq əmri ilə iki qurum arasındakı əməkdaşlığın inkişafındakı xidmətlərinə görə Ukrayna Milli Qvardiyasının komandanı, general-polkovnik Y.V.Allerov “Hərbi əməkdaşlıq sahəsində xidmətlərə görə” medalı ilə təltif edilib.

General-mayor A.Oleşenko bildirib ki, Ukrayna Milli Qvardiyası komandanının əmri ilə hərbi əməkdaşlığın inkişaf etdirilməsindəki xidmətlərinə görə Xüsusi Dövlət Mühafizə Xidmətinin rəisi, general-polkovnik V.Ə.Axundov “Ukrayna Milli Qvardiyasının Ordeni” ilə təltif olunub. Eyni zamanda, XDMX Diplomatik Nümayəndəliklərin Mühafizə İdarəsinin bir neçə hərbi qulluqçusu Milli Qvardiyanın “Əməkdaşlıq sahəsində” döş nişanı ilə təltif edilib.

Görüşdə Azərbaycanın Ukraynadakı səfirliyinin hərbi attaşe aparatının rəhbəri, polkovnik İlqar Ağayev və səfirlik kompleksinin mühafizə rəhbəri, mayor Ceyhun Yaqubov da iştirak ediblər.

 

Emil Hüseynli

AZƏRTAC-ın xüsusi müxbiri

Kiyev

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.