Brüssel, 13 sentyabr (AZƏRTAC). Alman politoloqu, İspaniya üzrə ekspert, Barselonadakı Pompeu Fabra Universitetinin politologiya professoru Klaus Yurgen Nagel bu qənaətdədir ki, London Şotlandiyada referendum keçirilməsinə icazə verməklə Madriddən müstəqillik tələb edən kataloniyalılarda müəyyən ümid yaradıb. O, belə bir fikirlə razıdır ki, Edinburq nümunəsi Kataloniyanın müstəqilliyinə tərəfdar olanlara stimul verir.

Sentyabrın 11-də yüz minlərlə belə tərəfdar bu əyalətin müstəqilliyinə dair referendum keçirilməsini tələb etmək üçün Barselonanın küçələrinə çıxıb.

Politoloq deyir: “Əlbəttə, Şotlandiya nümunəsi kataloniyalılar üçün stimuldur. Britaniya hökuməti sentyabrın 18-də Şotlandiyanın müstəqilliyi haqqında referendum keçirilməsinə icazə verib. Kataloniyalıların əksəriyyəti də İspaniya hökumətindən müstəqillik tələb edir, lakin Madrid hələ ki, “yumşalmır”. Amma burada referendum keçirilməsi üçün zəmin də yoxdur. İspaniya hökuməti kimi, Madriddə müxalifət də, parlamentin aşağı palatası da bu istiqamətdə bütün təklifləri ardıcıl surətdə rədd ediblər.

Kataloniya əhalisinin əksəriyyəti müstəqilliyə tərəfdardır və Kataloniya hökuməti Madridin müqavimətinə baxmayaraq, noyabrın 9-da referendum keçirməyi qərara alıb. Lakin mərkəzi hökumət referendum keçirilməsinə razılıq verməsə, bu addım hüquqi nöqteyi-nəzərdən rəy sorğusundan başqa bir şey olmayacaqdır” (bax: http://www.dw.de/эксперт-пример-шотландии-окрыляет-каталонцев/a-17917945)....

Beləliklə, professor təsdiqləyib ki, dövlətin ərazisinin bir hissəsində onun ayrılması məsələsinə dair referendum keçirilməsinə mərkəzi hökumətin razılığı olmadan sesessiya (ayrılma) istiqamətində atılan bütün addımlar birtərəfli xarakter daşıyır və buna görə də qeyri-legitimdir, heç bir hüquqi nəticə daşımır.

Xatırladırıq ki, əgər Şotlandiyada referendum iştirakçılarının əksəriyyəti müstəqilliyə səs verərsə, o zaman belə plebisitin keçirilməsinə Londonun razılığını nəzərə alaraq Şotlandiyanın ayrılması legitim hesab ediləcəkdir. Cənubi Sudanda olduğu kimi. Xartumda mərkəzi hökumət referendumun yekunlarını tanımağa razılıq verdikdən sonra Cənubi Sudan müstəqillik əldə edib.

Dağlıq Qarabağda, Cənubi Osetiyada, Abxaziyada, Dnestryanı zonada, Krımda belə bir şey müşahidə edilməyib və buna görə də dünya birliyi bu regionlarda keçirilmiş birtərəfli referendumları haqlı olaraq qeyri-legitim və hüquqi nəticələri olmayan referendumlar hesab edərək onları tanımaqdan imtina edib. Nə isə, qoy Dumanlı Albionda baş verən hadisələr çoxdan çürümüş “Miatsum” tərəfdarlarına qol-qanad verməsin. Bunun onlara heç bir dəxli yoxdur. Qarabağ Azərbaycanın bütün sakinlərinin iradəsindən daha çox ilk növbədə qarabağlıların özlərinin – Qarabağın yuxarı və aşağı hissələrində hər halda sayı Cənubi Qafqazda keçmiş Türkmənçay erməni köçkünlərinin başqa dövlətdə yaşamaq arzusunda olmayan nəvə-nəticələrindən daha çox etnik azərbaycanlılardan ibarət qarabağlıların özlərinin iradəsi ilə Azərbaycanın tərkibinə qayıdacaqdır.