İDMAN
Kolumbiyalı üçqat dünya çempionu Bakı mundialında növbəti qələbəsini qazana biləcəkmi?
Bakı, 4 sentyabr, AZƏRTAC
Sentyabrın 20-dən 27-dək Bakıdakı Milli Gimnastika Arenasında keçiriləcək cüdo üzrə dünya çempionatında Kolumbiyanı 3 idmançı təmsil edəcək. Üçqat dünya çempionu Yuri Alvear qadın cüdoçuların yarışında 70 kiloqram çəki dərəcəsində mübarizə aparacaq.
AZƏRTAC xəbər verir ki, 1986-cı ildə anadan olan cüdoçu Kolumbiyada yeganə üçqat dünya və dördqat Panamerika çempionu olan idmançıdır. Beynəlxalq Cüdo Federasiyasının açıqladığı sonuncu reytinq cədvəlində 2360 xalla 15-ci pillədə qərarlaşan idmançı irimiqyaslı yarışlarda 41 dəfə fəxri kürsüdə yer alıb.
Kolumbiyalı atlet 2009-cu ildə Rotterdamda, dörd il sonra Rio-de-Janeyroda, 2014-cü ildə isə Çelyabinskdə təşkil olunan dünya çempionatında qızıl medal qazanıb.
Cüdoçu “Rio-2016” Yay Olimpiya Oyunlarında puerto-rikolu Maria Perezə, İspaniya idmançısı Maria Bernabeuyə və britaniyalı Selli Kanvoya qalib gələrək finala adlayıb. O, qızıl medal uğrunda görüşdə yaponiyalı Haruka Taçimotoya məğlub olaraq gümüş medalla kifayətlənib. Yuri Alvear “London-2012” Yay Olimpiya Oyunlarında bürünc medal qazanıb.
Qeyd edək ki, artıq 133 ölkə mundialda iştirakını təsdiqləyib. Bu ölkələrdən 827 cüdoçu tatami üzərinə çıxacaq. Onlardan 506-sı kişi, 321-i isə qadın cüdoçudur.
Dünya çempionatında ölkəmizi 9 kişi və 6 qadın cüdoçu təmsil edəcək.
Qeyd edək ki, çempionata bilet satışı davam edir. Yarış üçün biletləri “ASAN xidmət” mərkəzlərindən, şəhərimizin bütün kassalarından, eləcə də onlayn qaydada “iTicket.az” saytından almaq olar. Biletlərin qiyməti kateqoriyalara uyğun olaraq səhər yarışları üçün 1,5, VIP yerlərə 25, final mərhələsi üçün isə 2 və 10, VIP yerlərə 50 manatdır.
Çempionatda 150-dək ölkədən cüdoçuların iştirakı gözlənilir. Dünya çempionatının təntənəli açılış mərasimi sentyabrın 20-də saat 15:00-da keçiriləcək.