İQTİSADİYYAT
Komitə: İyunun ilk hərracında özəlləşməyə 85 dövlət əmlakı çıxarılıb
Bakı, 6 may, AZƏRTAC
Əmlak Məsələləri Dövlət Komitəsi (ƏMDK) tərəfindən iyunun 4-də təşkil olunacaq hərraca ümumilikdə 85 dövlət əmlakı çıxarılıb. Onlardan 22-si səhmdar cəmiyyəti, 48-i kiçik dövlət müəssisə və obyekti, 11-i qeyri-yaşayış sahəsi, 4-ü isə nəqliyyat vasitəsidir.
Komitədən AZƏRTAC-a bildirilib ki, ƏMDK-nın keçirdiyi hərraclar dövlət əmlaklarının özəlləşdirilməsində rahat iştirak üçün fürsətlər yaradır. Müxtəlif iqtisadi sahələrə aid səhmdar cəmiyyətləri, kiçik müəssisələr və digər dövlət obyektlərinin hərraca çıxarılması iştirak etmək istəyənlərə geniş seçim imkanı vəd edir.
Budəfəki hərraca çıxarılan səhmdar cəmiyyətləri Ağdaş, Salyan, Bərdə, Yevlax kimi şəhər və rayonlarda yerləşir. Ümumi səhmlərinin 30-45 faizlik səhm paketləri özəlləşməyə çıxarılan dövlət əmlakları sənaye, aqrar, tikinti, nəqliyyat və digər sahələrə aiddir. Onlar arasında “Qax Taxıl”, “İsmayıllı Təmir Tikinti”, “Ağdaş Quşçuluq” kimi gəlirli fəaliyyət potensialı olan səhmdar cəmiyyətləri var.
Kiçik dövlət müəssisə və obyektlərinə gəldikdə isə onların ümumi faydalı sahəsi 20 kvadratmetr ilə 3,3 min kvadratmetr arasındadır. Şəki rayonunun Qudla kəndində yerləşən xidmət obyektinin ümumi faydalı sahəsi 372,1 kvadratmetrdir. İnvestor bu obyektin fəaliyyətini turizm sahəsi üzrə davam etməklə yanaşı, onu digər xidmət sahələrində də gəlirli sahəyə çevirə bilər. İstirahət mərkəzinin geniş torpaq sahəsi ilə birgə özəlləşdirilməsi onun effektiv fəaliyyət imkanlarını artırır.
Biznesə yeni başlayanlar, eləcə də ofis və ya xidmət obyekti axtaran şəxslər seçimlərini qeyri-yaşayış sahələri üzrə edə bilər. Bu kateqoriyadan olan dövlət əmlaklarının ümumi faydalı sahəsi 21,7 kvadratmetr ilə 140 kvadratmetr arasındadır. Qeyri-yaşayış sahələrindən 6-sı Bakıda, 5-i isə Sumqayıtda yerləşir. Paytaxtın Qaradağ rayonu, Qızıldaş qəsəbəsindəki binada yerləşən dövlət obyektinin ümumi faydalı sahəsi 84,3 kvadratmetrdir. Qeyri-yaşayış sahəsinin özəlləşdirilməsi üçün təyin olunan ilkin hərrac qiyməti 6 min manatdır.
“Nissan Maxima” və “Kia Sportage” markalarından olan nəqliyyat vasitələrinin buraxılış tarixləri 1998-2007-ci illərdir. Avtomobil sahibi olmaq istəyənlər 3 min manat ilə 5 min 400 manat aralığında ilkin qiymət təyin olunan bu dövlət əmlakları üzrə seçim edə bilər.
Hərraca çıxarılan hər bir dövlət əmlakı haqqında ətraflı məlumat əldə etmək və onlayn sifariş vermək istəyən şəxslər komitənin rəsmi saytına (emdk.gov.az) və Özəlləşdirmə portalına (privatization.az) daxil ola bilər. İştirakçılar və prosesə marağı olan hər kəs açıq hərraclara həm məkana gəlməklə, həm də onlayn formada qoşula bilər.