Kommersiya hüquqi şəxslərin ləğv olunması ilə əlaqədar prosedurların təkmilləşdirilməsi müzakirə olunub

Bakı, 14 dekabr, AZƏRTAC

Biznes mühiti və beynəlxalq reytinqlər üzrə Komissiyanın “Biznesə başlama, vergi və hesabatlılıq” İşçi Qrupunun növbəti onlayn iclası keçirilib.

Dövlət Vergi Xidmətindən AZƏRTAC-a bildirilib ki, tədbirdə İşçi Qrupun əvvəlki iclasında qəbul edilmiş qərarlar üzrə görülmüş işlər və 2022-ci il üçün Fəaliyyət Planı müzakirə edilib.

İşçi Qrupun rəhbəri, Dövlət Vergi Xidmətinin rəis müavini İlkin Vəliyev iclas iştirakçılarını gündəliklə tanış etdikdən sonra əvvəlki iclasın protokolunda qərara alınmış tədbirlər üzrə təklif və layihələrin hazırlandığını diqqətə çatdırıb. 2021-ci il üçün Fəaliyyət Planının müvafiq bəndlərinin icrası üzrə görülmüş işlər və İşçi Qrupun əvvəlki iclasının protokolunda qərara alınmış tədbirlərin icra vəziyyəti barədə məlumat diqqətə çatdırılıb.

Dövlət Vergi Xidmətinin Dövlət Qeydiyyatı Baş İdarəsinin rəis müavini Hüsniyyə Abdullayeva hüquqi şəxslərin ləğvi proseslərinin təkmilləşdirilməsi ilə əlaqədar hazırlanmış və Ədliyyə Nazirliyinə təqdim edilmiş layihə barədə məlumat verib.

Ədliyyə Nazirliyinin Qeydiyyat və Notariat Baş İdarəsinin Nəzarət-analitik iş üzrə qrupunun rəhbəri Leyla Bərxudarzadə müvafiq beynəlxalq təcrübə və mövcud iş praktikasının detalları barədə danışıb, məsələ ilə bağlı təkliflərini diqqətə çatdırıb.

İclas iştirakçıları kommersiya hüquqi şəxslərin ləğv olunması ilə əlaqədar prosedurların təkmilləşdirilməsi ilə bağlı özəl sektordan daxil olmuş təklifləri müzakirə ediblər.

İşçi Qrupun iclasına dəvət edilmiş konsaltinq şirkətlərinin nümayəndələri qeyd olunan məsələlərə dair fikirlərini bölüşüblər. “Ekvita” şirkətinin hüquq meneceri Sevil Yəhyayevanın təcrübədə rast gəlinən çətinliklərlə bağlı qaldırdığı məsələlər də müzakirə edilib. İclasda, həmçinin vergitutmanın digər məsələləri də diqqət mərkəzində olub.

“İSR Auto” şirkətinin nümayəndəsi Cavid Axundov istifadə olunmuş avtomobillərin rəsmi diler tərəfindən satın alınması və sonrakı satışı zamanı ƏDV-nin tətbiq olunması ilə bağlı məsələ qaldırıb. İşçi Qrupun rəhbəri İlkin Vəliyev Dövlət Vergi Xidmətinin məsələyə mövqeyini açıqlayaraq, aidiyyəti müzakirələrin aparılacağını bildirib.

Tədbirdə “Biznesə başlama, vergi və hesabatlılıq” sahəsində məlumatlığın artırılması və ictimai iştirakçılığın təmin edilməsi üzrə Kommunikasiya Strategiyası” layihəsi müzakirə olunub, sənədin təsdiqlənmək üçün təqdim olunması məqbul hesab edilib, eləcə də 2022-ci il üçün Fəaliyyət Planının ətraflı müzakirəsi aparılıb.

İşçi Qrupun rəhbəri maraqlı tərəflərdən layihə üzrə daxil olmuş təkliflərin Fəaliyyət Planına daxil edilməsini və Fəaliyyət Planı üzrə qarşıdakı ildə də biznesin qeydiyyatı və vergi hesabatlılığı sahəsində təkmilləşdirmələrin davam etdiriləcəyini vurğulayıb.