MƏDƏNİYYƏT


Konfransda Türk xalqlarına məxsus ortaq musiqi dəyərləri müzakirə olunub

Bakı, 23 sentyabr (AZƏRTAC). Heydər Əliyev Fondunun və Mədəniyyət və Turizm Nazirliyinin təşkilatçılığı ilə Üzeyir Hacıbəyli VI Beynəlxalq Musiqi Festivalı davam edir.

AZƏRTAC xəbər verir ki, sentyabrın 23-də festival çərçivəsində Azərbaycan Bəstəkarlar İttifaqında “Türk xalqlarının musiqisi ortaq dəyərlər müstəvisində” mövzusuna həsr olunmuş konfrans keçirilib.

Konfransı giriş sözü ilə ittifaqın sədri, Xalq Artisti, professor Firəngiz Əlizadə açaraq dahi bəstəkarımız Üzeyir Hacıbəylinin adını daşıyan festivala ilbəil artan maraqdan, bu musiqi bayramı çərçivəsində təşkil edilən bir-birindən maraqlı silsilə konsertlərdən söz açıb.

Türk xalqlarının musiqisinin dərindən araşdırılmasının vacibliyindən danışan F.Əlizadə qeyd edib ki, son illərdə türk mədəniyyətinə, türk xalqlarının etnoqrafiyasına və musiqisinə maraq xeyli artıb.

Tədbirdə Azərbaycan Milli Elmlər Akademiyasının müxbir üzvi, Əməkdar Elm Xadimi, professor Zemfira Səfərova “Üzeyir Hacıbəylinin elmi irsi türk xalqlarının musiqisi kontekstində” mövzusunda məruzə ilə çıxış edib.

Məruzəçi zəngin tarixi köklərə malik Azərbaycan musiqisinin inkişafında əvəzsiz xidmətləri olan dahi bəstəkarımız Üzeyir Hacıbəyli əsərlərini milli musiqi irsimizin, eləcə də türk xalqlarına məxsus ifaçılıq sənətinin öyrənilməsi baxımından dəyərli mənbə olduğunu vurğulayıb.

Tədbirdə macarıstanlı bəstəkar və musiqişünas Şandor Sabonun “Qədim Macar Şərq musiqisi haqqında araşdırmalar” mövzusunda məruzəsi dinlənilib. O, çıxışını əyani olaraq nadir hallarda ifa edilən ənənəvi hind aləti – esracda səsləndirdiyi musiqi parçaları ilə nümayiş etdirib.

Konfransda dinlənilən “Türk xalqlarının musiqisində məqam problemlərinə dair”, “Bəzi qədim türk melodiyaları və musiqi janrlarının Yaxın Şərq xalqlarının ənənəvi musiqisinə inteqrasiyası haqqında”, “Üzeyir Hacıbəyli yaradıcılığında türkçülük ideyaları” və digər mövzularda məruzələr maraqla qarşılanıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.