SİYASƏT


Könül Nurullayeva: Brüssel görüşü status məsələsinin gündəmdə olmadığını bir daha təsdiqlədi

Bakı, 24 may, AZƏRTAC

Belçikanın Brüssel şəhəri Azərbaycan Prezidenti İlham Əliyev və Ermənistanın baş naziri Nikol Paşinyan arasında keçirilən görüşə bir daha ev sahibliyi etdi. Artıq üçüncü dəfə keçirilən görüşün beş saat davam etməsi müzakirələrdə bütün məsələlərin nəzərdən keçirildiyini göstərir. Verilən bəyanatlardan aydın olur ki, əslində Brüssel görüşündə uğurlu nəticələr əldə olunub. İlk növbədə onu qeyd etməliyik ki, görüşdə və səslənən bəyanatda “Dağlıq Qarabağ” ifadəsi yenə işlədilmədi. Eyni zamanda, status məsələsi, ümumiyyətlə, müzakirə olunmadı, yalnız Azərbaycanda yaşayan erməni əhalinin hüquqları barədə danışıldı ki, rəsmi Bakı hər zaman onların təhlükəsizliyinə təminat verəcəyini bəyan edib.

Bu fikirləri AZƏRTAC-a açıqlamasında Milli Məclisin deputatı Könül Nurullayeva bildirib.

Deputatın sözlərinə görə, Avropa İttifaqı Şurasının Prezidenti Şarl Mişelin iştirakı ilə keçirilən görüşdə diqqət çəkən məqamlardan biri də humanitar məsələlərin - işğaldan azad olunmuş ərazilərin minalardan təmizlənməsi və itkin düşmüş şəxslərin taleyinin müzakirə olunmasıdır. Rəsmi Bakı Azərbaycan üçün prinsipial olan bu məsələnin həlli üçün bütün platformalarda İrəvana öz öhdəliklərini xatırladır.

“Brüsseldə yaxın zamanlarda Azərbaycan-Ermənistan sərhədində Sərhəd Komissiyalarının ilk birgə iclasının keçirilməsinə dair də razılıq əldə olundu. Belə ki, komissiya sərhədlərin delimitasiyası və sabit vəziyyətin ən yaxşı şəkildə necə təmin edilməsi ilə bağlı məsələlərlə məşğul olacaq. Əslində, tərəflər aprel ayının 6-da baş tutan görüşdə aprelin sonunda sərhəd məsələləri ilə bağlı görüşün keçirilməsinə dair razılığa gəlmişdilər. Lakin Ermənistan etimad mühitini pozaraq, aprelin sonunda və mayın əvvəlində baş tutmalı olan mümkün görüşlərdən imtina etdi. Şarl Mişelin ilk birgə iclasın keçirilməsinə dair növbəti bəyanatı da Ermənistanın artıq təmasdan yayınmaq şansının olmadığını deməyə əsas verir”, - deyə K.Nurullayeva qeyd edib.

Deputat vurğulayıb ki, kommunikasiyaların açılması istiqamətində işin davam etdirilməsi, o cümlədən Zəngəzur dəhlizinin reallaşdırılması, beynəlxalq daşımaların tənzimlənməsi və digər məsələlər barədə də razılığa gəlinməsi sülhlə bağlı olan ümidləri artırır. Eyni zamanda, sərhəd idarəçiliyi, təhlükəsizlik, torpaq haqları, həmçinin beynəlxalq daşımalar kontekstində gömrük prinsipləri barədə də razılıq var.

“Bütövlükdə, Brüssel görüşü Ermənistan və Azərbaycan arasında dövlətlərarası münasibətləri tənzimləyən gələcək sülh müqaviləsi üzrə müzakirələrin irəli aparılması baxımından müsbət qiymətləndirilməlidir”, - deyə K.Nurullayeva bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.