Bakı, 12 fevral, AZƏRTAC

Gənclər hər bir cəmiyyətin aparıcı qüvvəsi olaraq dövlətçiliyin inkişafında əsas rol oynayır və tarixdə yeni səhifələrin açılmasına təkan verənlərin özəyini təşkil edirlər. Azərbaycan gəncliyinin potensialının ortaya çıxarılması, onun genişləndirilməsi bilavasitə ümummilli lider Heydər Əliyevin adı ilə bağlıdır. Belə ki, Heydər Əliyevin Sərəncamı ilə 1996-ci ilin 2 fevral tarixində keçirilən forum davamlı xarakter alaraq ölkədə Gənclər Günü kimi təsdiq edildi və onların həyatında mühüm tarixə çevrildi. Həmin uzaqgörən addım gənclərlə bağlı bır sıra digər strateji dövlət proqramlarının qəbul edilməsinə və Azərbaycan Respublikası Gənclər Fondunun təsis olunmasına gətirib çıxardı. Davamlı gənclər siyasətinin nəticəsidir ki, bu gün gənclər müxtəlif imkanlardan yararlanır və öz təşəbbüslərini həyata keçirə bilirlər. Bizi gözləyən gələcəyin formalaşmasında gənclərin rolu və iştirakı onlara yetirilən xüsusi diqqət nəticəsində danılmaz reallığa çevrilib.

Bu fikirləri AZƏRTAC-a ADA Universitetinin məzunu Nurlan Süleymanov bildirib.

Gənc nəslə qayğı göstərmək, gənclərin problemlərini həll etmək, istedad və qabiliyyətlərini üzə çıxararaq inkişaf etdirmək təkcə dövlətin və ya hansısa qurumun vəzifəsi deyil. Bu, bizim hər birimizi hər gün narahat etməli olan məsələyə, gündəlik fəaliyyətimizin bir hissəsinə çevrilməlidir. Birinci vitse-Prezident Mehriban Əliyevaya məxsus olan bu sözlər hər bir gəncin inkişafına təkan verməlidir.

Bu gün əhalinin təxminən 25 faizini təşkil edən gənclər cəmiyyətin gələcək rifahının təmin edilməsində böyük potensiala sahibdirlər. Gəncliyə edilmiş investisiya gələcəyə edilmiş investisiya kimi qəbul olunmalıdır. Bunun müqabilində gənclər də əldə etdikləri müvəffəqiyyətlərlə kifayətlənməməli, özünüinkişaf sahəsində çalışmalı, təhsil almalıdırlar ki, həm özləri, həm cəmiyyət, həm də vətəndaşı olduqları dövlətlərə faydalı üzv olsunlar. Bu, sadəcə arzu deyil, günümüzün reallığının gənclərin qarşısına qoyduğu tələbdir. Onlar özləri və ölkələri üçün daşıdıqları məsuliyyəti yalnız güclü, məlumatlı, təşəbbüskar və fəal olmaqla daşıya bilərlər. Bu prinsip əsasında həyata keçirmək istədiyim kiçik layihə üçün məşhur texnologiya nəhəngi “Google” şirkətinə müraciət etdim. Onun sahibi olduğu “Android” əməliyyat sisteminin maraqlı xüsusiyyətlərindən biri odur ki, əməliyyat sisteminin hər yeni təqdim olunan versiyasına Latın əlifbası sırası ilə bir kod adı verilir. Kod adlar müxtəlif şirniyyat adını təmsil edir. Bu ənənə “Android 1.5” versiyasından başlamışdı: “1.5 Cupcake”, “7.0 Nougat”, və “8.0 Oreo”. Növbəti Android 9.0-un kod adı “P” hərfi ilə başlamalı idi. Ağlıma ilk gələn fikir Novruz süfrəsinin bəzəyi olan paxlavanı təklif edib “Android” əməliyyat sistemini kod adında əbədiləşdirmək idi. Əvvəldən müsbət nəticəyə böyük ümid bəsləməsəm də, məni ruhlandıran o idi ki, bu, alınsa dünyada milyonlarla insan Azərbaycan şirniyyatının adını daşıyan əməliyyat sistemindən istifadə edərək ölkəmiz barədə öyrənəcək. Araşdırmaya başladığım andan etibarən bir sıra problemlərlə qarşılaşdım: “Google”a məktub yazmaq üçün məlumat toplamalı idim, lakin internetdəki axtarışlarım nəticəsiz oldu. Milli Kulinariya Mərkəzi ilə əlaqə saxladım, əldə etdiyim məlumatları ADA Universitetindəki müəllimlərimlə bölüşdüm və onlar mənə paxlavanın tarixini, mədəniyyətimizdəki rolunu izah edən peşəkar bir məktub yazmağa dəstək oldular. “Google”un “Android” əməliyyat sistemi üzrə departamenti və ya marketinq departamentlərinin işçilərini Linkedİn sosial şəbəkəsindən axtarır və orada həqiqətən də çalışan və mənim təklifimlə maraqlanan birini tapa bilmirdim. Buna baxmayaraq, ümidimi itirmədim və nəticədə bir neçə rəsmi e-mail ünvanı tapıb təklifimi göndərdim. Əfsuslar olsun ki, “Google Android 9.0” “paxlava” adını daşımadı, amma mən əlimdən gələni etdim. Mənə qalan bu araşdırma və müraciət prosesində əldə etdiyim təcrübə idi. Özüm birinci addımı atdım və ilk çətinlikdə geri çəkilmədim. Biz, öz fəaliyyətimizi yalnız nəticəyə yönəltməməliyik. Layihənin uğurlu olma ehtimalı az olsa belə, təşəbbüsümüzü həyata keçirməyə çalışmalıyıq, çünki yerimizdə durduğumuz halda uğur qazanmaq ehtimalı sıfıra bərabərdir. Bu yanaşmanın əsasında könüllülük prinsipi durur. Biz, gənclər, öz təşəbbüslərimizi inkişaf etdirmək üçün könüllü şəkildə vaxt və enerji sərf etməliyik. Nəticədən asılı olmayaraq fəaliyyət prosesində özümüz inkişaf edəcək və qlobal hədəflərimizə bir addım daha yaxınlaşacağıq. Qeyd etmək lazımdır ki, bu sahənin inkişafı üçün könüllülük fəaliyyəti ilə məşğul olanlara yetirilən dövlət qayğısının bariz nümunələrindən biri Prezident İlham Əliyevin Sərəncamı ilə Azərbaycan Respublikasında 2020-ci ilin “Könüllülər ili” elan edilməsidir. Hər ideya reallaşmaya bilər, lakin biz cəhd etməliyik. Dövlət başçısının təbirincə desək, biz Azərbaycan gəncləri kimi böyük potensial, uğurumuzun aparıcı qüvvəsi ilə gələcəkdə daha böyük nailiyyətlərə imza atacağıq.