İQTİSADİYYAT


Kreditlər dövlətin sahibkara ən böyük dəstəyidir

Bakı, 8 iyul, AZƏRTAC

Pandemiya ilə əlaqədar görülən tədbirlərin biznesə mənfi təsirlərinin aradan qaldırılması üçün dövlət sahibkarlara dəstəyini davam etdirir.

AZƏRTAC Dövlət Vergi Xidmətinə istinadla xəbər verir ki, iqtisad üzrə fəlsəfə doktoru, ekspert Xalid Kərimli bu məsələ ilə bağlı şərhində dövlətin sahibkarlığa dəstəyinin bir neçə istiqamət üzrə qiymətləndirməyin mümkün olduğunu qeyd edib:

1. Sahibkarların mövcud maliyyələşdirmə xərclərinin minumumlaşdırılması və pandemiya ilə əlaqədar ziyanın aşağı salınması. 2020-ci ilin mart ayına qədər 5 milyon manatadək kredit qalığı olan sahibkarlara mart ayından başlayaraq 12 ay ərzində faiz xərclərinin 10 faiz bəndi dövlət tərəfindən qarşılanır. Bunun üçün şirkətin pandemiyadan zərərçəkən sahələrdə olmasının tanınması və kreditin dövlət zəmanətli olmaması lazımdır. Bu istiqamətdə 1 milyard manat kredit dəstəyi nəzərdə tutulur.

2. Sahibkarların müflisləşmə riskinin aşağı salınması və borclarının restrukturizasiyasına və maliyyə resurslarından səmərəli istifadəsinə şərait yaradılması. Sahibkarlığa İnkişafı Fondu ilə İpoteka və Kredit Zəmanət Fondu vasitəsilə verilmiş kreditlərin restrukturizasiyası və ödənişinə möhlət verilməsi dəstəyi sahibkarlara satış gəlirlərinin kəskin azaldığı indiki dövrdə likvidlik problemlərilə üzləşməsi riskini aşağı salmağa və sərbəst maliyyə resurslarından daha səmərəli istifadə etmələrinə şərait yaradacaq.

3. Biznesin inkişaf etdirilməsi. Girovu olmayan sahibkarlara avadanlıq almaq üçün kreditlər həm mövcud avadanlıq parkının yenilənməsinə, həm də yeni avadanlıqların alınmasına imkan verəcək ki, bu da müəssisələrin yenidən inkişafa yönəlməsinə imkan yaradacaq. Bu istiqamətdə bankların faiz dərəcəsinin 7 faiz olacağı nəzərdə tutulur, çünki bu faizdən yuxarı hissəni dövlət qarşılayacaq.

4. Kənd təsərrüfatı üzrə uzunmüddətli investisiya tələb edən sahələrdə kiçik kreditlərin müddətinin artırılması və güzəşt müddətinin kredit dövrünün yarıyadək qaldırılması bu sahədə fəaliyyət göstərən sahibkarların kredit resurslarına əlçatanlığını artıracaq.

5. 500 milyon manat həcmində yeni biznes kreditinin 60 faizədək hissəsinə dövlət zəmanəti verilməsi, həmçinin həmin kreditlərin faizlərinin yarısının dövlət tərəfindən qarşılanması sahibkarlara yeni layihələrə başlamağa və öz bizneslərini genişləndirməyə imkan verəcək. Nəzərə almaq lazımdır ki, 3 ilədək verilən bu kreditlərin məbləği 3 milyon manatadək ola bilər ki, bu da özlüyündə böyük maliyyə resursudur. Bundan əlavə, ilk 12 ay sahibkar üçün güzəşt müddəti hesab edilir, yəni bu müddətdə o yalnız bank faizlərini ödəyəcək. Yeri gəlmişkən, bank faizlərinin yarısı da dövlət tərəfindən qarşılanır.

Kreditlərin verilməsində şəffaflıq və operativliyin təmin edilməsi məqsədilə yaradılmış elektron platforma da (https://e-edf.gov.az/) nəzərdə tutulmuş dəstək paketinin effektiv reallaşdırılmasına imkan verəcək. Elektron portalın əsas üstünlüyü odur ki, operativliyi və şəffaflığı təmin edir, həmçinin tərəflərin izlənməsinə şərait yaradır. Elektron Kredit Platformasının əsas üç istiqamətdə - şəffaflıq, operativ xərclərin aşağı salınması və nəzarət tədbirlərinin genişləndirilməsi kimi üstünlüyü var.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.