SİYASƏT
Kristian Faythinger: Əminəm ki, Bakıda keçiriləcək Beynəlxalq Astronavtika Konqresi bir irs qoyacaq VİDEO
Vaşinqton, 27 oktyabr, AZƏRTAC
Oktyabrın 25-də ABŞ-ın paytaxtı Vaşinqtonda Beynəlxalq Astronavtika Federasiyasının Baş Assambleyasında keçirilmiş seçkilərdə Bakı şəhəri 2022-ci ildə keçiriləcək Beynəlxalq Astronavtika Konqresinə ev sahibliyi etmək hüququnu qazanıb. Bu uğurlu nəticə ilə bağlı, Beynəlxalq Astronavtika Federasiyasının icraçı direktoru Kristian Faythinger AZƏRTAC-ın Vaşinqton bürosuna xüsusi müsahibə verib.
Konqresin əhəmiyyətindən və Bakının qalib gəlməsindən danışan Faythinger deyib:
“Son bir neçə ildə Beynəlxalq Astronavtika Konqresi dünya kosmik ailəsinin üzvlərini bir araya gətirən əsas platformaya çevrilib. Kosmik sənayedə çalışan bütün insanların bu konqresdə iştirak etməsi zəruridir. Bu illər ərzində iştirakın sayı dedikcə artıb. Bundan əlavə, Beynəlxalq Astronavtika Konqresinin proqramı da son bir neçə ildə genişləndirilib. Düşünürəm ki, konqresə gələn hər bir iştirakçı onu həmişə böyük təəssüratla tərk edir. Məhz buna görə, Beynəlxalq Astronavtika Konqresi yalnız bilik və təcrübə mübadiləsi, son inkişaflar və əldə olunmuş nailiyyətlərin nümayişi deyil, həm də digər insanlarla görüşmək və əlaqə qurmaq üçün əlverişli və əhəmiyyətli imkanlar yaradır.
Hər bir keçirilən konqres irs qoyub gedir. Əminik ki, Bakıda keçiriləcək Beynəlxalq Astronavtika Konqresi də bir irs qoyacaq. Konqresin Bakıya gətirməyin əhəmiyyəti və önəmi həm də ondan ibarətdir ki, artıq 50 ilə yaxındır ki, konqres bu bölgədə keçirilməyib. Biz bu bölgəyə qayıtmaqdan çox məmnunuq, çünki biz Azərbaycanı və ətrafda olan ölkələri bütün kosmik ictimaiyyət ilə daha yaxından tanış edib, sıx əlaqələr qurmaq istəyirik. Bakıda keçiriləcək Beynəlxalq Astronavtika Konqresi həm Beynəlxalq Astronavtika Federasiyası, həm bütün kosmik ictimaiyyət üçün, həm də Azərbaycan üçün çox əhəmiyyətli hadisəyə çevriləcək. Bütün kosmik ictimaiyyət üzvləri Bakıya gələcək və Azərbaycanın son illərdə kosmik sənayedə qazandığı bütün uğurları və ölkənin bu sahədəki gələcək planları ilə tanış olacaq.
Beynəlxalq Astronavtika Konqresinə 2022-ci ildə ev sahibliyi etmək üçün namizədlər arasında çox güclü rəqabət var idi. Prosesin əvvəlində beş namizəd var idi, sonda isə dörd güclü iddiaçı qaldı. Bakıdan başqa Sinqapur, Rio-de-Janeyro, Yeni Dehli şəhərləri namizəd qismində çıxış edirdi. Bütün təkliflər cəlbedici idi. Buna görə konqresin Bakıda keçirilməsi üçün qəbul etdiyimiz qərar həqiqətən də çətin qərar oldu. Qeyd etmək istərdim ki, Bakıda konqresin keçirilməsinə dair təklif materiallarının hazırlanması, təklifin təşviq olunması baxımından Azərbaycan komandası təqdirəlayiqdir. 2022-ci ildə Bakıda keçiriləcək Beynəlxalq Astronavtika Konqresinin böyük uğurla nəticələnməsi üçün Azərbaycan komandası ilə işləməyi səbirsizliklə gözləyirik”.
Xatırladaq ki, 68 ölkəni təmsil edən 398 təşkilatın üzv olduğu Beynəlxalq Astronavtika Federasiyası kosmik sahədə fəaliyyət göstərən ən mötəbər beynəlxalq təşkilatdır. 1950-ci ildən bəri fərqli ölkələrdə keçirilən Beynəlxalq Astronavtika Konqresi təşkilatın əsas tədbiridir. Beynəlxalq Astronavtika Konqresi ulu öndər Heydər Əliyevin təşəbbüsü ilə 1973-cü ilin oktyabrın 7-dən 13-dək keçmiş Sovet İttifaqında yalnız bir dəfə və məhz Bakı şəhərində keçirilib.
Yusif Babanlı
AZƏRTAC-ın xüsusi müxbiri
Vaşinqton