CƏMİYYƏT


Külli miqdarda narkotik vasitə qanunsuz dövriyyədən çıxarılıb VİDEO

Bakı, 30 oktyabr, AZƏRTAC

Baş Narkotiklərlə Mübarizə İdarəsinin əməkdaşları narkotik vasitələrin və psixotrop maddələrin satışı ilə məşğul olan şəxslərə qarşı silsilə əməliyyatları davam etdirirlər.

Daxil İşlər Nazirliyinin mətbuat xidmətindən AZƏRTAC-a bildiriblər ki, daxil olmuş əməliyyat məlumatı əsasında həyata keçirilən tədbir zamanı əvvəllər məhkum olunmuş Abşeron rayon sakini Xəyal Əsədli saxlanılıb. Onun üzərinə baxış zamanı 3 qram heroin, 2 qramdan artıq tiryək, 3 qram metamfetamin aşkarlanaraq götürülüb. Əməliyyat tədbirlərinin davamı olaraq Xəyal Əsədlinin Masazır qəsəbəsində yerləşən evinə baxış zamanı 1 kiloqram 55 qram heroin, 995 qram tiryək, 3 kiloqram 110 qram metamfetamin, 5 kiloqram 500 qram qurudulmuş marixuana, həmçinin satışı və istifadəsi qadağan olunan psixotrop tərkibli 700 ədəd “Metadon M 40”, 150 ədəd tramadol həbi və 2 elektron tərəzi aşkar olunaraq götürülüb.

Baş İdarənin əməkdaşları tərəfindən Sabirabad rayonunda keçirilən əməliyyat zamanı isə rayon sakini Elman Muradov saxlanılıb. Onun üzərinə baxış zamanı 30 qram, yaşadığı rayonun Cəngan qəsəbəsindəki evindən isə 7 kiloqram 245 qram qurudulmuş marixuana aşkar edilərək götürülüb. Elman Muradov ifadəsində yaşadığı evin həyətində sonradan qurudub satmaq məqsədilə narkotik tərkibli bitkilərin kultivasiyası ilə məşğul olduğunu etiraf edib.

Baş İdarənin əməkdaşları tərəfindən Cəlilabad rayonunda keçirilən əməliyyat zamanı isə paytaxt sakini Anar Məmmədov tutulub. Saxlanılan zaman onun üzərindən 3 kiloqram heroin və 300 qram psixotrop maddə metamfetamin aşkarlanıb.

Həyata keçirilən sonuncu əməliyyatlar zamanı Baş İdarənin əməkdaşları tərəfindən ümumilikdə 21 kiloqram 245 qram narkotik vasitə və psixotrop maddə qanunsuz dövriyyədən çıxarılıb.

Faktlarla bağlı Cinayət Məcəlləsinin müvafiq maddələri ilə cinayət işi başlanılıb, adları çəkilən şəxslərin hər biri tutularaq istintaqa təqdim olunub. Cinayət işi üzrə zəruri istintaq və əməliyyat-axtarış tədbirləri davam etdirilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.