Rayonun pambıq sahələrindən bu günədək 7500 ton məhsul tədarük olunub

Biləsuvar, 27 oktyabr, İsmayıl Cəfərli, AZƏRTAC

Bu il Biləsuvarın pambıq tarlalarında bol məhsul yetişdirilib. Qısa vaxtda pambıq sahələrindən 7500 tondan çox yüksəkkeyfiyyətli xam məhsul toplanaraq emal müəssisələrinə təhvil verilib.

AZƏRTAC xəbər verir ki, son illər pambıqçılığın inkişafına göstərilən dəstək Biləsuvarı yenidən ölkənin pambıqçılıq rayonları arasında qabaqcıl təcrübənin ünvanına çevirib. Rayon fermerlərinin bu ənənəvi və əməktutumlu sahəyə marağı daha da artıb. Kütləvi məhsul yığımı davam edən Biləsuvarda bu il 955 fermer və sahibkar 4 tədarükçü şirkətlə müqavilə əsasında 7 min 459 hektar sahədə çiyid səpini həyata keçirib. Böyük zəhmət bahasına yetişdirilən bol məhsulun tez və itkisiz yığılması üçün hazırda rayon Dövlət Aqrar İnkişaf Mərkəzinin nəzarəti ilə 50-yə yaxın kombayn və 100-dən artıq qoşqulu nəqliyyat vasitəsi pambıq tarlalarına səfərbər olunub. Sahələrdən gündəlik 550-600 tondan çox pambıq tədarük olunur. Bu günədək istehsalçılar 7500 tondan artıq məhsulu emal müəssisələrinə təhvil veriblər.

Əkdiyi pambığı vaxtında və itkisiz yığmağa çalışan fermer Qabil Bağırov deyir ki, məhsuldarlıq yüksəkdir: “Məhsulumuz 45 sentneri keçəcək. Bu torpaqlar aşağı keyfiyyət qrupuna aid - 3–cü qrup torpaqlardır. Sovet dövründə 20 sentnerdən artıq məhsul götürmək olmurdu. Hazırda bu torpağa düzgün yanaşma, düzgün becərmə, aqrotexniki qulluq nəticəsində yüksək məhsul əldə etmişik. Yüksək texniki qulluq nəticəsində məhsulumuz çox yaxşıdır. Dövlətimiz də bizi daim himayə edir. Pambıq əkininə normal subsidiyalar verilir. Güzəştli gübrə, dərman preparatlarından da yararlanırıq. Bu da öz nəticəsini məhsuldarlıqda göstərir”.

Müasir texnikalarla təmin olunduqlarını söyləyən fermer Əliyar Rzayev isə bildirib ki, subsidiyalardan faydalanaraq əkin sahələrini daha da genişləndiriblər. “Əkdiyimiz pambıq Türkiyə sortudur. Özəlliyi ondan ibarətdir ki, bizim torpaqlara uyğunlaşıb, yəni regionlaşıb. Məhsuldarlıq da əvvəlki toxumlara baxanda qat-qat yüksəkdir”, - deyə o əlavə edib.

Fermer Atəş Məmmədov da sahəsində yığım aparır. Onun sözlərinə görə, sahəni vaxtında arat etdiklərinə görə, məhsuldarlıq da yüksəkdir: “Vaxtında arat eləmişik. Ziyanvericilərə qarşı bütün tədbirləri görmüşük. Kultivasiyası, dərmanlaması vaxtlı-vaxtında aparılan sahənin məhsulu da bax belə olmalıdır. Aşağısı 35-40 sentner məhsul gözləyirik. Bəzi sahələrdən isə daha yüksək - 50 sentner məhsul götürəcəyimizə ümid edirik”.

Kənd Təsərrüfatı Nazirliyinin şöbə müdiri Vüqar Hüseynovun sözlərinə görə, builki mövsümdə pambıqçılıqda atılan mütərəqqi addımlardan biri Aqrar Subsidiya Şurası tərəfindən əkin subsidiyasının əvəzinə məhsul subsidiyasının hesablanmasıdır. Bu il həm də pambıq mövsümündə ilk dəfə olaraq tədarükçü şirkətlərin qərarı ilə iki dəfə ayrı-ayrı tarixlərdə pambığın alış qiymətinin artırılması, istehsalçıların da böyük marağına səbəb olub. Yerli mütəxəssislər bildirirlər ki, ötən il rayon pambıqçıları topladıqları 21 min tona yaxın “ağ qızıl”dan təxminən 6 milyon manatdan çox gəlir əldə ediblər. Bundan əlavə, toplanmış məhsula görə fermerlərin kartlarına 2 milyon 67 min manat məbləğində subsidiya ödənilib.

Qeyd edək ki, 2022-ci ildə pambıq emalı və tədarükü məntəqələri satın alınan məhsulun hər tonuna görə qiyməti 100 manat artırıblar. Ötən il 1-ci sort pambığın bir tonu 700 manata alınırdısa, bu il qiymət 800 manata qaldırılıb. Aqrar Subsidiya Şurası 2022-ci il pambıq mövsümü üçün yalnız məhsul subsidiyası vermək barədə qərar qəbul edib. Məhsul subsidiyasının miqdarı hər tona görə 70 manat artırılıb. Bu il fermerlər tədarük məntəqələrinə təhvil verdikləri pambığın hər tonuna görə dövlətdən 170 manat məhsul subsidiyası alacaqlar. Dövlət dəstəyi tədbirlərinin gücləndirilməsi pambıq becərən fermerlərin bu il milyonlarla manat əlavə gəlir əldə etməsinə səbəb olacaq. Çünki məhsul subsidiyasına keçid və pambığın alış qiymətinin artırılması fermerləri aqrotexniki becərməni daha yaxşı aparmağa, daha çox məhsul istehsal edərək daha çox gəlir əldə etməyə sövq edir.