Kürdəmir, 8 sentyabr, AZƏRTAC 

Kürdəmir rayonunda bir neçə gündür ki, kütləvi pambıq yığımına başlanılıb və qısa vaxtda 200 tondan çox məhsul yığılıb.

AZƏRTAC xəbər verir ki, yığılan məhsul 30 ədəd lafet karvanında aidiyyəti idarə, müəssisə və təşkilatların rəhbərlərinin, pambıq istehsalçılarının, fermerlərin, torpaq mülkiyyətçilərinin iştirak ilə qəbul məntəqələrinə göndərilib.

Bu münasibətlə keçirilən tədbirdə rayon icra hakimiyyətinin başçısı Ceyhun Cəfərov strateji məhsul olan pambıqçılığın inkişafı ilə əlaqədar görülən tədbirlərdən, bu sahəyə göstərilən dövlət dəstəyindən ətraflı danışıb. Qeyd edib ki, cari ildə rayonda 4027 hektarda pambıq yetişdirilib, bununla bağlı ümumilikdə 200 nəfər pambıq istehsalçısı ilə müqavilə bağlanılıb. Vaxtlı-vaxtında həyata keçirilən aqrotexniki tədbirlər yaxşı məhsul yetişdirməyə imkan verib.

Vurğulanıb ki, artıq tədarük edilən xam pambıq bu mövsümdən başqa rayonlara deyil, Sor-Sor kəndi ərazisində “MKT-İK” MMC tərəfindən və Kənd Təsərrüfatı Nazirliyinin sifarişi ilə Qarabucaq qəsəbəsi ərazisində tikilən 2 qəbul məntəqəsinə təhvil veriləcək.

Qeyd olunub ki, rayonda məhsul yığımına ilk günlərdə 1500 nəfərədək sakin cəlb olunub. Hazırda yığım kampaniyası sürətlə davam edir. Carlı, Sığırlı, Qocalı, Köhünlü, Şilyan, Qarasu və bir sıra digər ərazi vahidlərində bol məhsul yetişdirilib.

Pambıq istehsalçısı Şakir Teyyubov bildirib ki, ötən il 20 hektar sahədə pambıq əkib və 25,5 sentner məhsul istehsal edib. Bu il isə əkin sahəsini artıraraq 40 hektara çatdırıb. Bol məhsul yetişdirdiyini bildirən Ş.Teyyubov artıq bir neçə gündür ki, yığıma başladığını söyləyib. Pambıq istehsalçıları üçün yaradılan şəraitə, dəstəyə görə də ölkə başçısına minnətdarlığını bildirib.

Sonda şəhərin Bakı prospektindən yola salınan lafet karvanı rayon musiqiçilərinin ifasında şən mahnı sədaları ilə müşayiət olunub.