Qahirə, 26 iyun, AZƏRTAC

Küveytin geniş oxucu kütləsinə malik “Əl Vəsat” qəzeti 26 İyun - Silahlı Qüvvələr Günü ilə bağlı Azərbaycanın bu ölkədəki səfirliyinin mətbuat üçün açıqlamasını dərc edib.

AZƏRTAC xəbər verir ki, qəzetin materialında Azərbaycan Ordusunun yaranması tarixi, 104 il öncə çar Rusiyasının süqutu ilə Cənubi Qafqazda baş verən mürəkkəb proseslər fonunda azərbaycanlı generalların fədakarlığı, Qafqaz İslam Ordusu ilə birlikdə Bakını işğaldan azad etmələri barədə məlumat verilib. Yazıda qeyd olunub ki, 1920-ci ilin aprelində bolşevik qoşunlarının işğalı nəticəsində Azərbaycan Xalq Cümhuriyyəti süqut edib və ilk milli ordumuzun generalları qətlə yetirilib.

Küveyt ictimaiyyətinin diqqətinə çatdırılıb ki, 1991-ci ilin oktyabrında Azərbaycan müstəqilliyini bərpa edib və Ermənistanın hərbi təcavüzü şəraitində milli ordu formalaşıb. Azərbaycanın nizami ordusunun yaranması dahi siyasətçi, xalqımızın ümummilli lideri Heydər Əliyevin adı ilə bağlıdır. Ulu Öndər 1993-cü il oktyabrın 10-da keçirilən inaqurasiya mərasimindəki nitqində vurğulayırdı ki, müstəqil dövlətimizin ərazilərimizi düşməndən qoruya biləcək və azad edəcək qüdrətli orduya ehtiyacı var. Həmin vaxtdan Silahlı Qüvvələrin maddi-texniki bazasının möhkəmlənməsi, müasir ordu quruculuğu istiqamətində böyük işlər görülməyə başladı. Bu prosesi davam etdirən Prezident İlham Əliyevin səyləri sayəsində Cənubi Qafqazın ən güclü Silahlı Qüvvələri cəmi 44 gün ərzində torpaqlarımızı düşmən işğalından azad etdi. Bu şanlı Zəfərlə Müzəffər Ali Baş Komandanın rəhbərlik etdiyi rəşadətli Ordunun qəhrəmanlığı tarix səhifələrinə qızıl hərflərlə yazıldı. Bu gün Azərbaycan xalqı azad olunmuş ərazilərdə bərpa-quruculuq işləri aparır, gələcəyə böyük inamla baxır.

Oqtay Bayramov

AZƏRTAC-ın xüsusi müxbiri

Qahirə