SİYASƏT
LİTVA PARLAMENT NÜMAYƏNDƏ HEYƏTİNİN AZƏRBAYCANA SƏFƏRİ
Martın 12-də axşam Litva parlamentinin xarici işlər komitəsinin sədri Gediminas Kirkilas başda olmaqla, bu ölkənin qanunvericilik orqanlarının nümayəndə heyəti Bakıya gəlmişdir.
Ertəsi gün qonaqlar Şəhidlər xiyabanını ziyarət edərək, Vətənimizin müstəqilliyi və ərazi bütövlüyü uğrunda canlarından keçmiş qəhrəman oğul və qızlarımızın xatirəsini anmış, “Əbədi məşəl” abidəsinin önünə əklil, şəhidlərin məzarları üstünə gül dəstələri qoymuşlar.
X X X
Nümayəndə heyəti həmin gün Milli Məclisin Beynəlxalq münasibətlər və parlamentlərarası əlaqələr daimi komissiyasının sədri Səməd Seyidovla görüşmüşdür.
S.Seyidov AŞPA sədrinin müavini və Büro üzvü İlham Əliyevin səmimi salamlarını qonaqlara çatdıraraq dedi ki, o, Litva parlamentinin nümayəndə heyəti ilə görüşmək arzusunda idi, lakin indi xarici səfərdədir.
Komissiyanın sədri bildirdi ki, Azərbaycan Baltikyanı respublikalarla əməkdaşlığa da xüsusi əhəmiyyət verir. Litvanın inkişafı, Avropa strukturlarında onun rolunun artması bizim diqqətimizdən kənar qala bilməz. Avropa Şurasında bəzi məsələlərin müzakirəsi zamanı Azərbaycan və Litva deputatları eyni mövqedən çıxış edirlər.
Qonaqlara Ermənistanın Azərbaycana təcavüzü və bunun ölkəmiz üçün ağır nəticələri, bu problemin sülh yolu ilə həlli sahəsində ölkəmizin göstərdiyi səylər haqqında məlumat verildi.
Səmimi salamına görə İlham Əliyevə təşəkkürünü bildirən Gediminas Kirkilas dedi ki, əvvəllər Azərbaycan Avropa ilə Şərq arasında körpü rolunu oynayırdı. İndi isə Azərbaycanla Avropanın birləşməsi layihəsi başa çatmaq üzrədir və bu da Litvanın diqqətindən yayına bilməz. Litva Avropa Birliyinə daxil olmaq üçün mayın 11-də referendum keçirəcəkdir. Cənubi Qafqaz ölkələrinin, o cümlədən Azərbaycanın parlament nümayəndə heyəti referendumu müşahidə etmək üçün Litvaya dəvət olunurlar. Litva NATO-ya da dəvət alıb və bu təşkilata üzvlük məsələsi də öz müsbət həllini tapacaqdır. Avropa məkanına daxil olduqdan sonra Litvanın imkanları daha da artacaqdır. Odur ki, Litva hökuməti Azərbaycanla siyasi, iqtisadi, mədəni və digər sahələrdə əməkdaşlıq etmək istəyir.
Görüşdə qarşılıqlı maraq doğuran digər məsələlər haqqında da fikir mübadiləsi oldu.
X X X
Litva parlamenti Xarici işlər komitəsinin sədri Gediminas Kirkilasın başçılıq etdiyi nümayəndə heyəti martın 13-də Milli Məclis sədrinin birinci müavini Arif Rəhimzadə ilə görüşmüşdür.
A.Rəhimzadə qonaqları salamlayaraq xatırlatdı ki, Azərbaycanla Litva arasında əlaqələr keçmişdən mövcuddur. Azərbaycan Xalq Cümhuriyyəti hökumətinin tərkibində milliyyətcə litvalı vətəndaş da vardı. Ölkəmiz Avropa Şurasına üzv qəbul olunarkən litvalı deputatlar Azərbaycanın mövqeyini müdafiə etmişlər. Biz Avropa məkanında mühüm yer tutan Litva ilə əlaqələrin inkişafında maraqlıyıq və çox istərdik ki, Litva da Azərbaycanın regiondakı mövqeyini qiymətləndirə bilsin.
Milli Məclis sədrinin birinci müavini dedi ki, Azərbaycan parlamentinin nümayəndə heyəti 1995-ci ildə Litvada olmuş və bu ölkənin iqtisadi, aqrar, eləcə də qanunvericilik sahələrindəki təcrübəsini öyrənmişdir. Hazırda Azərbaycan iqtisadi inkişaf yolundadır, lakin Ermənistanın hərbi təcavüzünün davam etməsi, torpaqlarımızın 20 faizinin işğal altında qalması buna çox mane olur.
A.Rəhimzadə münaqişənin əsl səbəbləri, Ermənistanın qeyri-konstruktiv mövqeyi barədə danışaraq bildirdi ki, erməni lobbisinin təsiri nəticəsində bəzi dövlətlər və beynəlxalq təşkilatlar məsələyə ikili standartlardan yanaşırlar. Ümid edirik ki, Litva Azərbaycanın ədalətli mövqeyini dəstəkləyəcəkdir.
Parlament sədrinin birinci müavini ölkələrimiz arasında iqtisadi əlaqələrin hələ istənilən səviyyədə olmadığını da xatırlatdı.
Cənab Kirkilas dedi ki, onun ölkəsi Azərbaycana xüsusi maraq göstərir. Azərbaycan indi təkcə iqtisadi cəhətdən deyil, coğrafi-siyasi baxımdan da diqqət mərkəzindədir. Ölkəniz öz təbii sərvətləri ilə hamını cəlb edir. Qonaq bildirdi ki, Litvanın baş naziri iqtisadi əlaqələrin inkişafına dair hökumətin hazırladığı layihəni Azərbaycanın Nazirlər Kabinetinə göndərmişdir və hesab edirik, bu, ölkələrimizin iqtisadi və digər sahələrdə əməkdaşlığının inkişafına təkan verəcəkdir.
Nümayəndə heyətinin başçısı dedi ki, biz Azərbaycan Prezidenti Heydər Əliyevin Litvaya səfərini səbirsizliklə gözləyirik.
Gediminas Kirkilas onu da bildirdi ki, yaxın vaxtlarda Litva parlamentində Azərbaycan parlamenti ilə dostluq qrupu yaradılacaqdır.
A.Rəhimzadə dedi ki, hazırda Milli Məclis prezident, parlament və bələdiyyə seçkilərinin, eləcə də referendum keçirilməsi qaydalarını özündə əks etdirəcək Seçki Məcəlləsinin layihəsini müzakirə edir. Bu il Azərbaycanda prezident seçkiləri keçiriləcək və əminik ki, Heydər Əliyev yenidən 5 il müddətinə dövlət başçısı seçiləcəkdir.
Görüşdə digər məsələlər ətrafında da söhbət getdi.
Milli Məclisdə keçirilən görüşlərdə Litvanın Türkiyə və Azərbaycandakı səfiri Qalina Kobeskayte iştirak edirdi.
X X X
Litvalı qonaqlar daha sonra xalça muzeyinə getdilər, Azərbaycan paytaxtının görməli yerləri ilə tanış oldular.
Martın 14-də Litva parlamentinin nümayəndə heyəti Tbilisiyə yola düşmüşdür.