SİYASƏT
Latviyada Vətən müharibəsi qurbanlarının xatirəsi yad olunub VİDEO
Riqa, 28 sentyabr, AZƏRTAC
Sentyabrın 27-də Azərbaycanın Latviyadakı səfirliyində Anım Günü münasibətilə rəsmi tədbir keçirilib.
AZƏRTAC xəbər verir ki, tədbirdə Latviyada fəaliyyət göstərən Azərbaycanın diaspora təşkilatlarının nümayəndələri iştirak ediblər.
Tədbirdə, əvvəlcə, Azərbaycan Respublikasının Dövlət Himni səsləndirilib. Sonra ölkəmizin suverenliyi və ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Səfiri Elnur Sultanov 30 ilə yaxın Ermənistanın işğalı altında olan doğma torpaqlarımızın Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsi nəticəsində azad olunmasından, Vətən uğrunda qəhrəmancasına canından keçmiş şəhidlərimizin əziz xatirəsindən, qalib Azərbaycan xalqının birlik və həmrəyliyindən, bizi Qələbəyə aparan yoldan, qazandığımız Zəfərin tarixi əhəmiyyətindən, işğaldan azad edilən ərazilərimizdə dövlətimiz tərəfindən hazırda aparılan quruculuq işlərindən ətraflı bəhs edib.
Səfir E.Sultanov Azərbaycan Prezidenti İlham Əliyevin 2020-ci il 2 dekabr tarixli müvafiq Sərəncamı ilə hər il 27 sentyabr tarixinin Azərbaycan Respublikasında Anım Günü kimi qeyd olunduğunu diqqətə çatdırıb.
Tədbirdə Qarabağ qazisi Tərxan Xudiyev söz alaraq keçdiyi döyüş yolundan danışıb. O, Müzəffər Ali Baş Komandan İlham Əliyevə xalqımıza tarixi zəfəri bəxş etdiyinə görə Latviyada yaşayan həmvətənlərimiz adından dərin təşəkkürünü bildirib.
Daha sonra 27 sentyabr – Anım Gününə həsr olunmuş videoçarx və Azərbaycan Respublikası Mədəniyyət Nazirliyi, Bakı Media Mərkəzi və “Azərbaycanfilm” kinostudiyasının birgə istehsalı olan Vətən müharibəsinə həsr edilmiş “Biz” adlı tarixi-sənədli film nümayiş olunub.
Filmdə müharibə dövründə fenomenə çevrilən, videosu və fotosu ən çox paylaşılan, ən çox müzakirə olunan sadə insanların müsahibələrinə yer verilib, əsgərlərimizin, sadə vətəndaşların müharibə dövründə keçirdiyi mənəvi və psixoloji ruh yüksəkliyi, emosiyalar, hisslər və ən əsası, hər bir azərbaycanlının Qələbəyə sona qədər inam bəsləməsi öz əksini tapıb.
Tədbirin sonunda iştirakçılar çay süfrəsinə dəvət olunublar.
Qeyd olunmalıdır ki, Anım Günü münasibətilə səfirliyin qarşısında Vətən müharibəsini əks etdirən fotolardan ibarət tər güllərlə bəzədilmiş guşə təşkil olunub və şəhidlərimizin xatirəsinə şamlar yandırılıb. Guşədə, həmçinin Anım Günü ilə bağlı hazırlanmış müxtəlif dillərdə broşürlər təqdim olunub. Həmçinin səfirlik tərəfindən tədbir iştirakçılarına üzərində Vətən müharibəsində Qələbəmizin rəmzi hesab olunan Xarıbülbül təsvirli nişanlar hədiyyə olunub.
Asiman Əsədov
AZƏRTAC-ın xüsusi müxbiri
Riqa