REGİONLAR
Lənkəranda Milli Teatr Günü qeyd olunub
Lənkəran, 10 mart, Bağır Əliyev, AZƏRTAC
Martın 10-da Nəcəf bəy Vəzirov adına Lənkəran Dövlət Dram Teatrında Azərbaycan teatrının yaranmasının 145-ci ildönümü qeyd olunub.
AZƏRTAC-ın bölgə müxbiri xəbər verir ki, teatrla sıx əməkdaşlıq edən Lənkəran Dövlət Universitetinin (LDU) kollektivi ənənəsinə sadiq qalaraq teatrın aktyorlarının bayram sevincini bölüşüblər.
Teatrın direktoru Tofiq Heydərov Milli Teatr Günü münasibətilə rəhbərlik etdiyi kollektivi və bütün teatrsevərləri təbrik edərək, universitetin rəhbərliyinə sıx əməkdaşlığa görə minnətdarlığını bildirib.
Azərbaycanda milli teatrın yaranma tarixindən, Lənkəran Dövlət Dram Teatrının inkişaf yolundan danışan T.Heydərov bu gün ölkəmizdə mədəniyyətə və sənət adamlarına böyük diqqət və qayğı göstərildiyini, paytaxtda və bölgələrdə yeni teatr binalarının tikildiyini, əsaslı təmir edildiyini və ya yenidən qurulduğunu diqqətə çatdırıb.
Qeyd olunub ki, dövlətimizin başçısının “Azərbaycan Respublikasında Milli Teatr Gününün təsis edilməsi haqqında” 2013-cü il 1 mart tarixli Sərəncamına əsasən, hər il martın 10-u ölkəmizdə Milli Teatr Günü kimi qeyd edilir.
Tofiq Heydərov bildirib ki, 127 yaşını qeyd edən Lənkəran teatrı dərin mənalı əsərlər tamaşaya qoymaqla, teatr tariximizdə özünəməxsus ənənə formalaşdırıb. Həmin əsərlər bu sənət ocağında istedadlı aktyor və rejissor nəslinin yetişməsinə səbəb olub, bütöv bir tamaşaçı nəslinin estetik zövqünün formalaşmasında əhəmiyyətli rol oynayıb.
Diqqətə çatdırılıb ki, ötən illər ərzində Lənkəran teatrı dəfələrlə respublikamızda, eləcə də xarici ölkələrdə keçirilən beynəlxalq festivallarda bir sıra nailiyyətlər qazanıb. Hazırda kollektiv yeni tamaşalar üzərində işləyir. Belə ki, gənc rejissor Emil Əsgərov Belçika dramaturqu Moris Meterlinkin “Korlar” pyesinin məşqlərini aparır. Bundan əlavə, cari mövsümdə Sofokolun “Antiqona”, N.B.Vəzirovun “Pəhləvani-zəmanə”, başqırd dramaturqu Süleyman Lətipovun “Evlən, oğul, evlən!” və daha bir neçə uşaq əsərinin də tamaşaya qoyulması nəzərdə tutulub.
Tədbirdə teatrın aktyorları Şahrud Mehdiyevaya, Qızılgül Quliyevaya, Şəbnəm Hüseynovaya, Günel Abbaszadəyə və rejissor assistenti Ziba Bədəlovaya teatr sənəti sahəsində səmərəli fəaliyyətlərinə görə fəxri fərmanlar və pul mükafatları verilib, “ARB Cənub” TV-nin yaradıcı kollektivi Lənkəran Dövlət Dram Teatrının fəaliyyətini mütəmadi işıqlandırdığına görə təşəkkürnamə ilə təltif edilib.
Daha sonra teatrın aktyorlarının ifasında görkəmli Azərbaycan dramaturqu Cəlil Məmmədquluzadənin “Danabaş kəndinin məktəbi” tamaşası nümayiş olunub.
Əməkdar İncəsənət Xadimi Oruc Qurbanovun quruluş verdiyi səhnə əsərində əsas rolları Xalq Artisti Qabil Quliyev, Əməkdar Artist Sücəddin Mirzəyev, aktyorlardan Şahrud Mehdiyeva, Allahverən Babayev, Miraslan Ağayev, Əlibala Əsgərov, Səyad Əliyev, Hikmət Cəfərov, Nizami Qurbanov və digərləri ifa ediblər.
Anşlaqla keçən tamaşanı Lənkəran Dövlət Universitetinin professor, müəllim və tələbələri izləyiblər.