REGİONLAR
Lənkəranda Milli Teatr Günü qeyd olunub
Lənkəran, 9 mart, Bağır Əliyev, AZƏRTAC
Martın 9-da Lənkəran Dövlət Dram Teatrında 10 Mart - Milli Teatr Gününə həsr olunmuş tədbir keçirilib.
AZƏRTAC-ın bölgə müxbiri xəbər verir ki, tədbirdə çıxış edən teatrın direktoru Tofiq Heydərov Azərbaycanda milli teatrın yaranma tarixindən, rəhbərlik etdiyi kollektivin inkişaf yolu və yaradıcılıq planlarından danışıb.
Diqqətə çatdırılıb ki, Prezident İlham Əliyevin “Azərbaycan Respublikasında Milli Teatr Gününün təsis edilməsi haqqında” 2013-cü il 1 mart tarixli Sərəncamına əsasən, hər il martın 10-u ölkəmizdə Milli Teatr Günü kimi qeyd edilir.
Artıq 128 yaşına qədəm qoymuş Lənkəran teatrı da dərin mənalı əsərləri tamaşaya qoymaqla, teatr tariximizdə özünəməxsus ənənə formalaşdırıb. Bu sənət ocağı istedadlı aktyor və rejissor nəslinin yetişməsinə səbəb olub, bütöv bir tamaşaçı nəslinin estetik zövqünün formalaşmasında əhəmiyyətli rol oynayıb. Ötən illərdə Lənkəran teatrı dəfələrlə respublikamızda, eləcə də xarici ölkələrdə keçirilən beynəlxalq festivallarda nailiyyətlər qazanıb.
Perspektiv planlardan söz açan T.Heydərov teatrın qonşu İran İslam Respublikasının Tehran şəhərində keçirilmiş 34-cü Beynəlxalq Fəcr Teatr Festivalında, həmçinin iki dəfə bu ölkənin Həmədan şəhərində keçirilmiş Uşaq və Gənclər Beynəlxalq Teatr Festivalında Azərbaycanı təmsil etdiyini bildirib: “Qazaxıstan və Türkiyə ilə də əməkdaşlıq barədə düşünürük. Hələ 2018-ci ildə Qazaxıstanın Aktau Dram Teatrının rəhbərliyi ilə görüşərək qarşılıqlı əsərlərin hazırlanması, səfərlərin təşkili ilə əlaqədar protokol imzalamışıq. Bundan əlavə, Türkiyədə İstanbul Böyük Şəhər Bələdiyyə Teatrı ilə danışıqlarda festivallarda iştirak etmək məsələləri qaldırılıb. Ümid edirik ki, 2019-cu ilin sonuna kimi Türkiyə və Qazaxıstanla aparılan işlər öz bəhrəsini verəcək”.
Direktorun sözlərinə görə, Mədəniyyət Nazirliyinin təsdiq etdiyi repertuar plana görə, il ərzində teatrda 4 tamaşanın təqdim olunması nəzərdə tutulsa da, əlamətdar bayramlarla əlaqədar repertuar plandan əlavə, daxili imkanlar hesabına məktəblilər üçün əlavə 2-3 tamaşa da hazırlanır. Bu günlərdə qırğız dramaturqu M.Bayciyevin “Şənbə axşamı” tamaşasının premyerası olub. Cari ildə C.Cabbarlının 120 illik yubileyi münasibətilə ədibin “Vəfalı Səriyyə”, serb yazıçısı M.Bulatoviçin “Qodo gəldi”, V.Əlixanlının “Dənizə baxan pəncərə”, Ə.Əmirlinin “Ünvansız qatar” əsərlərinin də səhnələşdirilməsi nəzərdə tutulub.
Tədbirdə səmərəli fəaliyyətlərinə görə teatrın aktyorları, Xalq artisti Qabil Quliyevə, Əməkdar artist Sucəddin Mirzəyevə, aktrisa Qızılgül Quliyevaya və ədəbi-dram hissəsinin rəhbəri Ağaddin Babayevə fəxri fərmanlar təqdim olunub.
“ARB Cənub” Televiziyası isə teatrın fəaliyyətini mütəmadi işıqlandırdığı üçün təşəkkürnamə ilə mükafatlandırılıb.
Sonra teatrın səhnəsində Tərlan Abdullayevin müəllifi və quruluşçu-rejissoru olduğu “Sehirlənmiş qız” musiqili nağıl-tamaşasının premyerası olub.
Dostluq, mehribanlıq ideyasını təlqin edən səhnə əsərinin quruluşçu-rəssamı Tərlan Sadıqov, musiqi tərtibatçısı Fərahim Fərəcovdur. Əsas rolları Sucəddin Mirzəyev, Qızılgül Quliyeva, Təranə Fərəcova, Aysel Cahangirova, Arzu Abbaszadə, Məleykə Cəfərova, Amil İbrahimli və başqaları ifa ediblər.