REGİONLAR
Lənkəranda bu ilin birinci yarısının yekunları və qarşıda duran vəzifələr müzakirə edilib
Lənkəran, 19 iyul, Bağır Əliyev, AZƏRTAC
İyulun 19-da Lənkəran şəhərindəki Heydər Əliyev Mərkəzində şəhər icra hakimiyyəti başçısı yanında Şuranın geniş iclasında bu ilin altı ayında rayonda sosial-iqtisadi inkişafı sahəsində görülmüş işlər və qarşıda duran vəzifələr müzakirə edilib.
AZƏRTAC-ın bölgə müxbiri xəbər verir ki, toplantıda çıxış edən Lənkəran Şəhər İcra Hakimiyyətinin başçısı Taleh Qaraşov bildirib ki, bu ilin birinci yarısı əvvəlki illərdə olduğu kimi bir sıra uğurlarla yaddaqalan olub.
Prezident İlham Əliyevin Lənkərana davamlı qayğısı sayəsində rayonun sosial-iqtisadi və mədəni inkişafı sahəsində yeni nailiyyətlərin qazanıldığını, genişmiqyaslı quruculuq-abadlıq işlərinin, iri həcmli investisiya layihələrinin icra edildiyini vurğulayan T.Qaraşov cari ilin birinci yarısında rayonun sosial-iqtisadi inkişafı sahəsində qazanılmış uğurları diqqətə çatdırıb.
Qeyd olunub ki, bu ilin altı ayında rayonda ümumi məhsul buraxılışının həcmi 169,1 milyon manat təşkil edib. Sənayedə 16,2 milyon manatlıq və ya ötən ilin müvafiq dövrünə nisbətən 4,8 faiz çox məhsul istehsal olunub.
Bildirilib ki, bu müddətdə rayonda bir sıra sosial layihələr həyata keçirilib. Azərbaycan Respublikası Prezidentinin təşəbbüsü ilə Lənkəranda inşa edilən Olimpiya İdman Kompleksi rayonda idmanın, turizmin inkişafına geniş imkanlar açacaq.
İcra hakimiyyətinin başçısı rayonda “İstisu” istirahət və sağlamlıq mərkəzinin tikilməsini, çətin dağlıq ərazidən keçən Hirkan-Biləsər avtomobil yolunun yenidən qurulmasını, şəhərdə 4 çoxmənzilli yaşayış binasında təmir-bərpa işlərini və 5 çoxmənzilli yaşayış binasının dam örtüyünün dəyişdirilməsini dövlətimizin öz vətəndaşlarına göstərdiyi qayğının təzahürü kimi dəyərləndirib. O, yeni tikiləcək xalça fabrikinin qadınlar üçün yeni iş yerlərinin açılmasında mühüm rol oynayacağını da qeyd edib.
Bildirilib ki, hesabat dövründə şəhərdaxili küçələrin təmiri və asfaltlanması sahəsində işlər davam etdirilib. Ümumilikdə şəhərdaxili küçələrə 4,5 kilometr ərazidə 22 min 500 kvadratmetr sahəyə isti asfalt döşənib. Əşlə kəndində ötən ilin oktyabr ayında sel sularının yuyub sıradan çıxartdığı və şəhərdə qəzalı vəziyyətə düşmüş 2 körpü yenidən tikilərək istifadəyə verilib.
T.Qaraşov Lənkəran şəhərində, kənd və qəsəbələrdə məktəb, uşaq bağçası, xəstəxanaların və digər sosialyönümlü obyektlərin, yolların, körpülərin təmir və tikintisinin, elektrik təsərrüfatının yenidən qurulmasının, o cümlədən, aqrar sahədə çəltikçiliyin, sitrus meyvəçiliyinin, çayçılığın inkişafına dair qəbul edilmiş Dövlət Proqramlarının icrası ilə əlaqədar görülən mühüm işlərin, xüsusilə uzun illərdən sonra rayonda ilk dəfə barama yetişdirilməsinə başlanmasını və 3,7 ton yüksək keyfiyyətli barama məhsulunun tədarük edilməsini hesabat dövrünün uğurları kimi dəyərləndirib.
Toplantıda şəhər icra hakimiyyəti başçısının birinci müаvini Möhübbət Babayevin hesabat məruzəsi dinlənilib.
Müzakirələrdə rayon maliyyə idarəsinin rəisi İqbal Rəcəbov, rayon kənd təsərrüfatı idarəsinin rəisi Tofiq Rzayev və Yuxarı Xanbulançay Hidroqovşağı idarəsinin rəisi Allahyar Salayev çıxış edərək cari ilin altı ayında görülən işlər və qarşıda duran vəzifələrlə bağlı təkliflərini bildiriblər.
İclası yekunlaşdıran Lənkəran Şəhər İcra Hakimiyyətinin başçısı Taleh Qaraşov görülmüş işlərin növbəti yarımildə daha geniş vüsət alacağına əminliyini ifadə edərək, qarşıda duran vəzifələri uğurla icra etmək, mövcud problem və nöqsanları aradan qaldırmaqdan ötrü idarə, müəssisə və təşkilat rəhbərlərinə müvafiq tövsiyə və tapşırıqlarını verib.
Şura iclasında müzakirə edilən məsələ ilə bağlı müvafiq qərar qəbul edilib.