REGİONLAR
Lənkəranda əlillərin problemlərinin həlli daim diqqət mərkəzindədir
Lənkəran, 3 dekabr, Bağır Əliyev, AZƏRTAC
3 dekabr-Beynəlxalq Əlillər Günü ölkəmizin hər yerində olduğu kimi, Lənkəranda da geniş qeyd edilib.
AZƏRTAC xəbər verir ki, Lənkəran şəhərindəki Heydər Əliyev Mərkəzində keçirilən tədbirin iştirakçıları əvvəlcə Mərkəzin foyesində əllilərin əl işlərindən ibarət sərgi ilə tanış olublar.
Tədbirdə çıxış edənlər əlilləri əlamətdar gün münasibətilə təbrik edərək, ölkəmizdə əlil vətəndaşlara göstərilən diqqət və qayğıdan danışıblar. Qeyd olunub ki, Azərbaycanın müstəqilliyi uğrunda sağlamlıqlarını itirənlərin, Böyük Vətən müharibəsi, 20 Yanvar, Qarabağ müharibəsi, Çernobıl əlillərinin, fiziki cəhətdən əlilliyi olan insanların problemlərinin həlli daim ölkə rəhbərliyinin diqqət mərkəzindədir. Regionlarda əlillər üçün tikilən çoxmərtəbəli yaşayış binaları bunun bariz nümunəsidir.
Bildirilib ki, Lənkəranda 2006-cı ildə Əlillərin Bərpa Mərkəzi fəaliyyətə başlayıb, onların həyat şəraitinin yaxşılaşdırılması üçün 90 nəfər əlil mənzillə təmin olunub, 10 nəfər əlil üçün isə fərdi yaşayış evi tikilərək istifadəyə verilib.
Bildirilib ki, hazırda Lənkəranda 13 min 636 nəfər fiziki sağlamlıqlarını itirən vətəndaş vardır. Onlardan bir qismi ünvanlı sosial yardım, digər qismi isə əmək pensiyası alır. Bayramla əlaqədar poçt vasitəsilə 220 nəfər əlilə maddi yardım edilib.
Tədbirdə bir qrup əlilə maddi yardım verilib.
Azərbaycan Qızıl Aypara Cəmiyyətinin Lənkəran rayon bölməsi tərəfindən isə birinci qrup əlillər-Cil kənd sakini Möhübbət Nəsirova və Osakücə kənd sakini Gülşən Kazımovaya əlil arabaları təqdim edilib.
Əlillər göstərilən diqqət və qayğıya görə dövlətimizin başçısına minnətdarlıqlarını bildiriblər.