REGİONLAR
Lənkəranın qəhrəman kəndi - Gəgiran VİDEO
Lənkəran, 5 yanvar, İsmayıl Cəfərli, AZƏRTAC
Vətən müharibəsində möhtəşəm qələbə qazanan Azərbaycan öz ərazi bütövlüyünü təmin etməklə yeni tarix yazdı. Bu tarixdə ölkəmizin hər bir bölgəsi kimi Lənkəranın da payı var. Rayonun ən ucqar dağ kəndlərindən olan Gəgiran indi qəhrəman kəndlərdən sayılır.
AZƏRTAC xəbər verir ki, Gəgiran kəndində ilk olduğumuz ailə haqq savaşımızda tarix yazan igidlərimizdən şəhid Mirzəyev Rasim Fətta oğlunun ailəsi oldu. 1998-ci ildə Lənkəranın ucqar dağ kəndi Gəgiranda doğulan Rasim həqiqi hərbi xidmətini bir il idi bitirmişdi. Vətən müharibəsi başlayan gündən ordu sıralarına çağırılan 22 yaşlı cəsur əsgərimizin döyüş yolu Füzulidən başlayır. Cəbrayıl və Qubadlının azad olunması uğrunda qəhrəmancasına vuruşan Rasimin sonuncu döyüşü oktyabrın 19-da olur. Qubadlı istiqamətində adsız yüksəklikləri işğalçılardan azad edən rəşadətli Ordumuzun əsgəri Rasim qəhrəmancasına şəhid olur. Vətən müharibəsində 25 gün igidliklə vuruşan Rasim döyüşə girdiyi hər günü şəxsi kitabçasında qeydə alır.
Şəhidin atası Fətta Xosrovov: “Cibində gəzdirdiyi şəxsi kitabçasında iştirak etdiyi döyüşləri yazıb. Kitabçaya oktyabrın 19–dək qeydlər etmişdi. Həmin gündən sonra vərəqlər qeydsiz idi. Ondan bildim ki, elə həmin gün oğlum qəhrəmancasına şəhid olub. Allah bütün şəhidlərimizə rəhmət eləsin. Vətən sağ olsun!”.
Şəhidin anası Zəkiyyə Xosrovova: “Rasim yaxşı oğul idi, Vətən üçün canından keçdi. Öz ölümü ilə tarixə çevrildi. Oğlumla fəxr edirəm”.
2019-cu il noyabrın 6-da həmkəndlisi Şəlalə xanımla ailə həyatı quran Rasim özündən sonra 6 aylıq oğlu Asimi Vətənə əmanət etdi.
Şəhidin həyat yoldaşı Şəlalə Bayramzadə: “Müharibə başlayanda deyərdi ki, Ordumuz düşməni torpaqlarımızdan qovmalıdır. Arzusu döyüşlərdə iştirak etmək idi. Arzusuna çatdı, müharibədə iştirak etdi və şəhid oldu. Yeri cənnət olsun. Fəxr edirəm, belə bir igidin həyat yoldaşıyam”.
Rasim ölümündən sonra Ali Baş Komandanın Sərəncamı ilə "Vətən uğrunda" və "Qubadlının azad olunmasına görə" medalları ilə təltif olunub.
Gəgiran kəndində Vətən müharibəsində xüsusi igidlik göstərərək Şuşaya kimi döyüş yolu keçən şəhid əsgərlərimizdən biri də 2002-ci il yanvarın 10-da dünyaya göz açan Əhədli Baloğlan Şakir oğludur. Sentyabrın 27-də Vətən müharibəsi başlayan zaman Baloğlan artıq 9 ay idi ki, həqiqi hərbi xidmətini keçməklə Vətənə olan borcunu ləyaqətlə yerinə yetirirdi. Müharibə başlayan gündən döyüş meydanına atılan 18 yaşlı qəhrəman cəbhənin bütün istiqamətlərində gedən döyüşlərdə igidliklə vuruşur. Onun sonuncu döyüşü noyabrın 6-da Daşaltı kəndində olur.
Şəhidin atası Şakir Həbibov: “Füzulinin bütün kəndləri uğrunda gedən döyüşlərdə qəhrəmancasına iştirak edib. Füzuli, Cəbrayıl, Qubadlı, Zəngilan, Suqovuşan və Şuşada şiddətli döyüşlərdə vuruşub. Şuşa istiqamətində Daşaltı kəndində şəhid olub. Silahdaşları deyir ki, oğlum azad olunan ərazidə daş üstündə yazıb – “Qarabağ Azərbaycandır!”. Bir təsəlli kimi aidiyyəti qurumlardan xahişim var. Gəgiranda yeni müasir orta məktəb binası tikilib. İstəyirdim ki, oğlumun adı yeni məktəbə verilsin”.
Şəhidin anası Xanım Əhədova: “Üç bacının bir qardaşı idi. Evimin də sonuncu uşağı idi. Çox cəsur uşaq idi. Bir ana kimi ondan razı idim. Çox tərbiyəli, cəsur və mərd oğul idi. Baloğlanla fəxr edirəm. Onun arzuları çox idi. Öz arzusu ürəyində qaldı. Amma bütün Azərbaycanın arzusunu yerinə yetirdi”.
Rəşadətli Ordumuzun ən gənc və cəsur döyüşçülərindən biri olmuş şəhid Baloğlan ölümündən sonra Ali Baş Komandanın Sərəncamı ilə "Vətən uğrunda" və "Qubadlının azad olunmasına görə" medalları ilə təltif olunub. Bəli, 44 günlük Zəfər mübarizəmizin azman igidlərinin hər biri düşmənlə savaşda göstərdiyi rəşadətin, torpaq sevgisinin şərəf mükafatını aldı. Bu torpaq uğrunda canlarından keçən şəhidlərimizin müqəddəs haqq mübarizəsi qiymətləndirildi... Amma o oğulların, o Vətən sevdalıların, o Vətən fədailərinin ən ali mükafatı, ən uca qiyməti xalqımızın ürəyində fəth etdikləri sevgi, qürur zirvəsidir...