Lənkəran, 13 iyul, Bağır Əliyev, AZƏRTAC

Lənkəranlı gənclərdən bir qrupu - Sosial Xidmətlər Agentliyinin 13 saylı filialının müdiri Ramin Hüccətov, Dini Qurumlarla İş üzrə Dövlət Komitəsinin Lənkəran bölgəsi üzrə şöbəsinin əməkdaşı Emin Həmidli və Lənkəran Sosial və Aqrar–Texnoloji Kollecin ictimaiyyətlə əlaqələr üzrə direktor köməkçisi, tarix üzrə fəlsəfə doktoru Cəmil Quliyev Lənkəran rayonunun Boladı kəndində şəhid mayor İbadov Aqşin Nazim oğlunun ailəsi ilə görüşüb.

AZƏRTAC-ın bölgə müxbiri xəbər verir ki, ailənin problemləri və qayğıları ilə maraqlanan gənclər Birinci Qarabağ və Vətən müharibəsində Azərbaycan Ordusunun əsgər və zabitlərinin, o cümlədən lənkəranlı döyüşçülərin qəhrəmanlıqlarından danışıblar.

Şəhid atası Nazim İbadov lənkəranlı gənclərə minnətdarlığını ifadə edərək bildirib ki, dörd oğlundan üçü hərb sənətinə yiyələnib. Böyük oğlu Emil İbadov Birinci Qarabağ müharibəsində Ağdam və Tərtər istiqamətlərində döyüşlərdə iştirak edib. Evin ikinci oğlu Cəmil İbadov gizir tankçı, ortancıl oğlu-kəşfiyyat bölüyünün komandiri polkovnik-leytenant Məmmədhüseyn İbadov 44 günlük Vətən müharibəsi döyüşlərinin iştirakçısıdır.

Evin sonbeşiyi-Xüsusi Təyinatlı Qüvvələrin mayoru Aqşin İbadov Türkiyədən təlimdən yenicə gəlməsinə baxmayaraq, Vətən müharibəsində döyüşlərə qatılıb və Xocavənd rayonunun Tuğ kəndi yaxınlığında qəhrəmancasına şəhid olub.

Azərbaycan Respublikasının Prezidenti İlham Əliyevin müvafiq Sərəncamları ilə igid döyüşçü Aqşin İbadov ölümündən sonra “Cəbrayılın azad olunmasına görə”, “Kəlbəcərin azad olunmasına görə”, “Xocavəndin azad olunmasına görə”, “Vətən uğrunda” medalları və ikinci dərəcəli “Rəşadət” ordeni ilə təltif edilib.

İbadovların yaşadığı evdə şəhid Aqşin İbadovun xatirəsinə muzey yaradıb. Muzeydə erməni silahlı qüvvələri tərəfindən atılan mərmi nəticəsində Aqşinin baş geyiminə (kaskaya) və cibində gəzdirdiyi müqəddəs “Qurani-Kərim”ə dəyib yaranmış dəlik daha çox diqqəti cəlb edir.

Lənkəranlı gənclər Boladi kənd qəbiristanlığında şəhid Aqşin İbadovun məzarı önünə gül dəstələri düzərək xatirəsini ehtiramla yad edib, ruhuna dualar oxuyublar.