CƏMİYYƏT


Liderlik məktəbinin yeni tədris ilinin açılışı olub

Bakı, 4 noyabr, AZƏRTAC

Azərbaycan Respublikasının İnsan Hüquqları üzrə Müvəkkili Elmira Süleymanovanın təşəbbüsü ilə yaradılmış və Ombudsmanın uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsinin (AUGSŞ) Liderlik Məktəbində on səkkizinci tədris ilinin açılış mərasimi keçirilib.

AZƏRTAC xəbər verir ki, tədbirə Ombudsman Aparatının, Təhsil, Gənclər və İdman nazirliklərinin, Ailə, Qadın və Uşaq Problemləri üzrə Dövlət Komitəsinin, Bakı şəhəri üzrə Təhsil İdarəsinin məsul nümayəndələri, adı çəkilən məktəbə cəlb olunmuş yeni üzvlər, habelə əvvəlki buraxılışların məzunları, ümumilikdə 150-dən artıq uşaq və gənc, həmçinin valideyn və müəllimlər qatılıblar.

İnsan Hüquqları üzrə Müvəkkili Elmira Süleymanova Liderlik məktəbinin açılışında çıxış edərək müstəqillik yollarında ilk addımlarını atarkən Azərbaycanın dərin siyasi, iqtisadi və sosial böhranla yanaşı, Ermənistanın hərbi təcavüzü, azərbaycanlılara qarşı yürütdüyü etnik təmizləmə siyasəti və Dağlıq Qarabağ problemi ilə üzləşdiyini, ulu öndər Heydər Əliyevin 1993-cü ildə hakimiyyətə qayıdışı və apardığı müdrik siyasət nəticəsində ölkənin inkişaf etdiyini vurğulayıb.

Ombudsman ümummilli liderimiz Heydər Əliyevin rəhbərliyi ilə Azərbaycanda bütün sahələrin inkişafı istiqamətində atılan addımlardan danışıb, insan hüquqlarının, o cümlədən uşaq hüquqlarının qorunması, təhsil, səhiyyə, sosial və mədəni sahələrdə, milli mənəvi dəyərlərimizin qorunmasında böyük uğurların əldə edildiyini bildirib. Ulu öndərin layiqli davamçısı olan dövlət başçısı İlham Əliyevin uğurlu siyasəti nəticəsində ölkəmizdə uşaq hüquqlarının təmin olunması istiqamətində mühüm işlər görüldüyü, eyni zamanda Azərbaycanın Birinci vitse-prezidenti Mehriban xanım Əliyevanın rəhbərlik etdiyi Heydər Əliyev Fondunun bu sahəyə xüsusi diqqət yetirdiyi vurğulanıb.

Müvəkkil uşaq hüquqlarının müdafiəsi ilə bağlı Ombudsmanın çoxşaxəli fəaliyyəti, uşaq hüquqları üzrə pilləli tədris layihəsi barədə ətraflı məlumat verib, uşaqlar üçün Ümumdünya hərəkatının respublikamızda geniş vüsət aldığı, on səkkiz ilə yaxın müddətdə müntəzəm fəaliyyət göstərən Liderlik Məktəbinin bunun bariz nümunəsi olduğu bildirilib. Həmçinin oktyabrın 20-dən noyabrın 20-dək respublikamızda elan olunmuş Uşaq Hüquqları Aylığı çərçivəsində paytaxt və rayonlarda Ombudsmanın Aparatı və regional mərkəzləri, dövlət qurumları, şəhər və rayon icra hakimiyyətləri, QHT-lər, icmalar tərəfindən uşaqların fəal iştirakı ilə çoxsaylı silsilə tədbirlərin həyata keçirildiyi bildirilib.

Tədbirdə qeyd olunub ki, Liderlik məktəbi uşaqların öz iştirakı ilə onların həyatında dönüş yaratmaq, hərtərəfli inkişafına, dünyagörüşünün zənginləşməsinə, Uşaq Hüquqları Konvensiyasının müddəalarına uyğun olaraq öz hüquqlarının öyrənməsinə və təlimçilər, trenerlər kimi bu hüquqları öz yaşıdlarına öyrətməsinə, onlara vətənpərvərlik hissinin aşılanmasına, uşaqların liderlər kimi yetişməsinə xidmət edir.

Bakının müxtəlif rayonlarındakı ümumtəhsil məktəbləri şagirdlərinin təmsil olunduğu Liderlik məktəbini bu günədək 1500-dən çox məzunun bitirdiyi, burada “Azərbaycan – yurdum mənim!” devizi ilə ölkəmizin tanınmış şəxsləri, elm, təhsil, mədəniyyət xadimləri tərəfindən uşaqlara ölkəmizin tarixi, təbii sərvətləri, ekologiyası, mədəniyyəti, incəsənəti, eləcə də insan və uşaq hüquqları, vətənpərvərlik, nitq mədəniyyəti, təhsil, sağlamlıq, din, sağlam həyat tərzi və digər mövzularda interaktiv təlim metodundan istifadə edərək öyrədildiyi qeyd olunub. Bu məktəbdə Azərbaycanın tanınmış ziyalıları ilə görüşlərin, interaktiv məşğələlərin uşaqların daha çox bilik əldə etməsinə, layiqli vətəndaş ruhunda yetişməsinə kömək etdiyi bildirilib.

Tədbirdə iştirak edən qonaqlar respublikamızda uşaq və gənclər siyasətinin uğurla davam etdirildiyini, təmsil etdikləri qurumların uşaq hüquqları ilə bağlı prioritetlərini qeyd edib, bu gün böyük uğurlara imza atmış Liderlik məktəbində birləşən uşaqların bilik və intellektual səviyyəsindən, fəal vətəndaşlar kimi tərbiyələnməsindən məmnun olduqlarını vurğulayıblar.

Müvəkkil E.Süleymanova Liderlik məktəbini uğurla başa vuran və Avropa Uşaq Ombudsmanları Şəbəkəsi tərəfindən həyata keçirilmiş Avropa Gənc Məsləhətçilər Şəbəkəsinin layihəsinin müvafiq tədbirində fəal iştirakına görə məktəblilərə sertifikatlar təqdim edib. Şəbəkəyə yeni qoşulan uşaqlara yeni dərs ilində nailiyyətlər arzulayıb, biliklərə mükəmməl yiyələnməyi, ahəngdar inkişaf etməyi, Vətənə, xalqımıza sadiq övladlar kimi yetişməyi tövsiyə edib.

Sonda Liderlik Məktəbinin üzvləri AUGSŞ-nin fəaliyyəti, həyata keçirdiyi tədbirlər, treninqlər, iştirak etdikləri ölkədaxili və beynəlxalq konfranslar, sərgilər barədə ətraflı məlumat verib, məktəbin istedadlı üzvləri şeirlər söyləmiş, vətənə aid mahnılar ifa ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.